રાજસ્થાનના પૂર્વ સીએમ વસુંધરાના કાફલાનો અકસ્માત, 7 પોલીસકર્મી ઘાયલ

રાજસ્થાનના પૂર્વ મુખ્યમંત્રી વસુંધરા રાજેના કાફલામાં સામેલ પોલીસ વાહન બોલેરો કાર રવિવારે પાલી જિલ્લાના બાલીમાં પલટી ગઈ હતી.  બાઇકસવારને બચાવવા જતાં આ અકસ્માત થયો હતો. આ અકસ્માતમાં 7 પોલીસકર્મીઓ ઘાયલ થયા છે, જેમાંથી 3ને ગંભીર ઈજાઓ પહોંચી છે. તમામ ઇજાગ્રસ્તોને પ્રાથમિક સારવાર બાદ મોટા આરોગ્ય કેન્દ્રમાં રીફર કરવામાં આવ્યા છે.

બાઇક સવારને બચાવવા જતાં અકસ્માત થયો હતો

મળતી માહિતી મુજબ, રાજસ્થાનના પૂર્વ મુખ્યમંત્રી વસુંધરા રાજે મંત્રી ઓતા રામ દેવાસીની માતાના નિધન પર શોક વ્યક્ત કરીને જોધપુર પરત ફરી રહ્યા હતા. આ દરમિયાન એક બાઇક સવારને બચાવવાનો પ્રયાસ કરતી વખતે કાફલામાં સામેલ પોલીસની બોલેરો પલટી ખાઇ ગઇ હતી. 

અકસ્માતની માહિતી મળતાં જ વસુંધરા રાજેએ ઘાયલોની મદદ કરી અને તેમને એમ્બ્યુલન્સમાં બેસાડી સરકારી હોસ્પિટલ બાલી મોકલ્યા. આ ઉપરાંત બાલીના ધારાસભ્ય પુષ્પેન્દ્ર સિંહને પણ તેમની સાથે મોકલવામાં આવ્યા હતા.

બોલેરો ત્રણ વખત પલટી ગઈ

પ્રત્યક્ષદર્શી બીજેપી નેતા રમેશ પરિહારના જણાવ્યા અનુસાર, બાઇક સવારને બચાવવાના પ્રયાસમાં પોલીસની બોલેરો ત્રણ વખત પલટી ગઈ હતી. બોલેરોમાં 7 પોલીસકર્મીઓ બેઠા હતા. જેમાં ત્રણ પોલીસકર્મીઓને ગંભીર ઈજાઓ પહોંચી છે.