આજે દેશમાં પહેલીવાર ઉજવવામાં આવી રહ્યો છે National Space Day, જાણો આ ખાસ દિવસની થીમ

શુક્રવારે એટલે કે 23 ઓગસ્ટના રોજ દેશભરમાં એક વિશેષ તહેવારની ઉજવણી કરવામાં આવી રહી છે. એક એવો ઉત્સવ જે દેશના યુવાનોને સ્પેસ સાયન્સ પ્રત્યે રસ વધારશે અને તેની જટિલતાને ખૂબ જ સરળ ભાષામાં સમજાવશે. આજે આખો દેશ 'નેશનલ સ્પેસ ડે'ની ઉજવણી કરી રહ્યો છે. તમને જણાવી દઈએ કે આ દિવસે 23 ઓગસ્ટ 2023ના રોજ ઈસરોના ચંદ્રયાન-3નું વિક્રમ રોવર ચંદ્રના દક્ષિણ ધ્રુવ પર ઉતર્યું હતું. ચંદ્રના દક્ષિણ ધ્રુવ સુધી પહોંચનાર ભારત પહેલો દેશ હતો. આજે ચંદ્રયાન-3ના સફળ મિશનને એક વર્ષ પૂર્ણ થવા પર સ્પેસ ડેની ઉજવણી કરવામાં આવી રહી છે.

ચંદ્રયાન-3ના ચંદ્ર પરના સફળ મિશનની યાદમાં ISRO 23 ઓગસ્ટે નેશનલ સ્પેસ ડેની ઉજવણી કરી રહ્યું છે. ચંદ્ર પર ચંદ્રયાન-3ની સિદ્ધિઓ જણાવવા અને દર્શાવવા માટે આજે દિલ્હીના ભારત મંડપમ ખાતે એક કાર્યક્રમનું આયોજન કરવામાં આવ્યું છે. આ અવસર પર ISRO ચંદ્રયાન-3 મિશનમાં ચંદ્રની સપાટી પર શું જોવા મળ્યું અને તેના ભવિષ્યમાં શું ઉપયોગ થશે તે વિશે જણાવશે.

સ્પેસ ડે થીમ

ISROએ સ્પેસ ડેની ઉજવણી વિશે ટ્વિટ કર્યું છે. તેની થીમ રાખવામાં આવી છે - 'Touching lives while touching the Moon: India's space saga' ISROએ એવું પણ લખ્યું છે કે, "સ્પેસનો અભ્યાસ આપણા વિશ્વને આકાર આપે છે અને આપણી કલ્પનાને વધારે છે. ભારતના અવકાશ પ્રયાસોની અદ્ભુત યાત્રા અને આપણા જીવન પર તેમની અસરને સન્માનિત કરવા અમારી સાથે જોડાઓ. ચાલો આપણે બધા આ ઐતિહાસિક દિવસને ગૌરવ સાથે ઉજવીએ!"

X પર જુઓ

દેશભરમાં પ્રદર્શન

નેશનલ સ્પેસ ડે નિમિત્તે દેશભરમાં પ્રદર્શનોનું આયોજન કરવામાં આવી રહ્યું છે. જેમાં ચંદ્ર પર ચંદ્રયાન-3ના સફળ ઉતરાણ અંગે માહિતી આપવામાં આવશે. આ ઉપરાંત ચંદ્ર પર ઉતર્યા બાદ લીધેલા ફોટોગ્રાફ્સ પણ બતાવવામાં આવશે. આ સંદર્ભમાં દેશની રાજધાની ભારત મંડપમમાં એક પ્રદર્શનનું આયોજન કરવામાં આવી રહ્યું છે. રાષ્ટ્રપતિ મુર્મુ તેનું ઉદ્ઘાટન કરશે.

ચિત્ર સ્પર્ધા

ISRO નેશનલ સ્પેસ ડે પર દેશભરના બાળકોને આકર્ષશે. વિજ્ઞાન થીમ પર ચિત્ર સ્પર્ધાનું પણ આયોજન કરવામાં આવ્યું છે. ISROએ તેના પેજ પર આ ચિત્ર સ્પર્ધાની વિજેતા યાદી પણ જાહેર કરી છે. જે તમે isro.gov.in/NSPD2024/poster પર જઈને જોઈ શકો છો. બિહારની આશિતા માતિને પ્રથમ, કર્ણાટકની હર્ષિતા કોકુએ બીજું અને પંજાબના અરમાનદીપ સિંહને ત્રીજું સ્થાન મળ્યું છે.