થેની જેલબ્રેક કાંડ: ક્ષમતા કરતાં વધુ કેદીઓ અને સુરક્ષામાં ગંભીર ક્ષતિઓ ખુલ્લી પડી

સોમવારે રાત્રે થેક્કમપટ્ટી સ્થિત ડિસ્ટ્રિક્ટ જેલમાંથી ૧૭ જેટલા કાચા કામના (અન્ડરટ્રાયલ) કેદીઓ ફરાર થઈ જવાની ચકચારી ઘટના સામે આવી છે. આ ઘટના બાદ જેલમાં ક્ષમતા કરતા વધુ કેદીઓનો ભરાવો, અપૂરતો સુરક્ષા સ્ટાફ અને જેલ સુરક્ષા પ્રોટોકોલના કથિત ઉલ્લંઘન જેવા ગંભીર મુદ્દાઓ તપાસના દાયરામાં આવ્યા છે.

આ જેલની માન્ય ક્ષમતા ૨૦૦ કેદીઓની છે, જેની સામે ૨૬ ઓક્ટોબર સુધીમાં ત્યાં ૩૩૪ કેદીઓને રાખવામાં આવ્યા હતા. ફરજમાં બેદરકારી દાખવવાના આરોપસર તંત્ર દ્વારા જેલના ૯ સુરક્ષાકર્મીઓને તાત્કાલિક અસરથી સસ્પેન્ડ કરી દેવામાં આવ્યા છે.

 આ સમગ્ર ઘટનામાં સૌથી ચોંકાવનારી બાબત એ સામે આવી છે કે ૧૭ કેદીઓને એક જ સેલમાં (બેરેક) સાથે રાખવામાં આવ્યા હતા, જે તમિલનાડુ પ્રિઝન રૂલ્સ એન્ડ મેન્યુઅલનું સીધું ઉલ્લંઘન હોવાનું કહેવાય છે. જેલ સુરક્ષા નિયમાવલી મુજબ, કોઈ પણ એક સેલમાં ૫ થી વધુ કેદીઓને રાખવા પર મનાઈ છે. આ નિયમ એટલા માટે બનાવવામાં આવ્યો છે જેથી ઈમરજન્સી કે અન્ય કોઈ કારણોસર જ્યારે સેલનો દરવાજો ખોલવામાં આવે ત્યારે કેદીઓની સંખ્યા વોર્ડરો કરતાં વધી ન જાય અને સુરક્ષા જોખમાય નહીં.

તપાસ દરમિયાન આશંકા વ્યક્ત કરવામાં આવી છે કે એક જ સેલમાં વધુ સંખ્યામાં રહેલા કેદીઓએ સાથે મળીને ભાગવાની પૂર્વઆયોજિત યોજના બનાવી હતી. કેદીઓએ ખેંચ આવવાનું તબીબી નાટક રચી વોર્ડરને દરવાજો ખોલવા માટે મજબૂર કર્યો હતો. નિયમ મુજબ રાત્રિના સમયે સેલનો દરવાજો ખોલતી વખતે પૂરતો બેકઅપ સ્ટાફ હાજર હોવો અનિવાર્ય છે. જોકે, થેક્કમપટ્ટી સબ-જેલમાં તૈનાત વોર્ડર આ નકલી મેડિકલ ઈમરજન્સીની જાળમાં ફસાઈ ગયો અને જરૂરી સુરક્ષા વ્યવસ્થા કે બેકઅપ વગર જ દરવાજો ખોલી નાખ્યો હતો. પરિણામે કેદીઓ સ્ટાફ પર હાવી થઈ ગયા અને સુરક્ષાકર્મીઓને દબાવીને ફરાર થઈ ગયા હતા.

 આ ઉપરાંત જેલમાં મલ્ટિપલ સિક્યુરિટી ગેટ્સ અને આધુનિક સર્વેલન્સ (CCTV) સિસ્ટમનો અભાવ હોવાથી જેલ પ્રશાસનની સુરક્ષા સજ્જતા સામે ગંભીર સવાલો ઊભા થયા છે. ફરાર થયેલા ૧૭ કેદીઓ પૈકી ૭ કેદીઓ સામે હત્યા જેવા ગંભીર ગુનાઓ નોંધાયેલા છે, જ્યારે બાકીના ચોરી, ઘરફોડ અને હુમલાના કેસમાં ટ્રાયલ હેઠળ હતા.

પોલીસે તાત્કાલિક કાર્યવાહી હાથ ધરીને ભાગી ગયેલા ૧૭ પૈકી ૧૩ કેદીઓને ઝડપી પાડ્યા છે, જ્યારે બાકી બચેલા ૪ કેદીઓને પકડવા માટે સઘન શોધખોળ ચાલુ છે.