'ટ્રેની IPS એ મારા પર કૉન્ડમના પેકેટ ફેંક્યા અને..'; પોલીસ એકેડેમીમાં મહિલા ટ્રેની અધિકારીના આક્ષેપથી ખળભળાટ
છેલ્લું અપડેટ : 20 Jul 2026
હૈદરાબાદ: હૈદરાબાદના શિવરામપલ્લી ખાતે આવેલી સરદાર વલ્લભભાઈ પટેલ નેશનલ પોલીસ એકેડેમી (SVPNPA) માંથી એક ચોંકાવનારી ઘટના સામે આવી છે. એક મહિલા ટ્રેની અધિકારીની લેખિત ફરિયાદના આધારે અત્તાપુર પોલીસે ટ્રેની આઈપીએસ (IPS) અધિકારી ઉદય કૃષ્ણા રેડ્ડી સામે જાતીય સતામણી (Sexual Harassment), મારપીટ અને ધમકી આપવા બદલ ગુનો નોંધી તપાસ હાથ ધરી છે.
અભદ્ર મેસેજ અને પ્રાઇવેટ વિડિયો દ્વારા બ્લેકમેલિંગ
પીડિત મહિલા ટ્રેની અધિકારીના જણાવ્યા મુજબ, આ ઉત્પીડન જૂન મહિનાના અંતથી શરૂ થયું હતું. આરોપી IPS અધિકારી ઉદય કૃષ્ણા રેડ્ડીએ તેને અશ્લીલ અને આપત્તિજનક મેસેજ મોકલ્યા હતા તેમજ અન્ય ટ્રેનીઓની સામે તેના વિશે અપમાનજનક ટિપ્પણીઓ કરી હતી.
આટલું જ નહીં, મહિલા અધિકારીનો તેમની મંજૂરી વિના એક ખાનગી વિડિયો (Private Video) રેકોર્ડ કરી લીધો હતો અને બદનામ કરવાના હેતુથી તે વિડિયો પીડિતાના પતિને મોકલીને તેને બ્લેકમેલ (Blackmail) કરવાનો પણ પ્રયાસ કર્યો હતો.
ચપ્પુ બતાવી ગળું દબાવવાનો પ્રયાસ અને ગંભીર આક્ષેપો
એફઆઈઆર (FIR) ની વિગતો મુજબ, ૯ જુલાઈની રાત્રે આરોપીએ મહિલા અધિકારીને બળજબરીપૂર્વક અટકાવીને પોતાના રૂમમાં ખેંચી ગયો હતો. ત્યાં તેના વાળ પકડીને ગળું દબાવવાનો પ્રયાસ કર્યો હતો અને ગળા પર ચપ્પુ રાખી જાનથી મારી નાખવાની ધમકી આપી હતી.
આ ઘટના દરમિયાન આરોપીએ મહિલા પર condoms ના ૩ પેકેટ ફેંક્યા હતા અને તેના પ્રાઇવેટ પાર્ટ્સ (Private Parts) ને અડવાનો પ્રયાસ કરી શારીરિક અડપલાં કર્યા હતા. ત્યારપછી ૧૦ જુલાઈના રોજ પણ તેની સાથે ફરીથી મારપીટ કરવામાં આવી હતી.
એકેડેમીમાં ભારે ચકચાર
દેશના ભાવિ પોલીસ અધિકારીઓને તાલીમ આપતી દેશની ટોચની એકેડેમીમાં જ આવી ઘટના બનતાં પોલીસ બેડામાં ભારે ચકચાર મચી ગઈ છે. અત્તાપુર પોલીસે સંબંધિત કલમો હેઠળ કેસ નોંધીને આગળની કાનૂની કાર્યવાહી શરૂ કરી છે.