Video: લેમ્બોર્ગિની, BMW અને મર્સિડીઝનો માલિક નીકળ્યો હત્યારો! ટેક મહિન્દ્રાના પૂર્વ VPની હત્યા કરનાર મોનૂ શર્માનો ગુનાહિત ઈતિહાસ જાણી પોલીસ પણ ચોંકી

ટેક મહિન્દ્રાના પૂર્વ સિનિયર વાઈસ પ્રેસિડેન્ટ પરમજીત ધનખડની હત્યાના કેસમાં પકડાયેલા મુખ્ય આરોપી મોનૂ શર્માનો ચોંકાવનારો ગુનાહિત ઈતિહાસ અને વૈભવી જીવનશૈલી સામે આવી છે. મૂળ હરિયાણાના ફરીદાબાદનો રહેવાસી અને ભંગારનો વ્યવસાય કરતો મોનૂ શર્મા અગાઉ GST ચોરીના એક મોટા કૌભાંડમાં આશરે અઢી મહિના સુધી દિલ્હીની તિહાડ જેલમાં બંધ રહી ચૂક્યો છે.

લેમ્બોર્ગિની અને BMW જેવી લક્ઝરી કારોનો શોખીન

પોલીસ તપાસમાં સામે આવ્યું છે કે સ્ક્રેપનો ધંધો કરતો મોનૂ શર્મા અત્યંત વૈભવી જીવનશૈલી જીવવાનો શોખીન છે. તેના કાફલામાં લેમ્બોર્ગિની (Lamborghini), મર્સિડીઝ-બેન્ઝ GLS, BMW અને મહિન્દ્રા XUV700 જેવી કરોડો રૂપિયાની મોંઘીદાટ લક્ઝરી કારો સામેલ છે. સામાન્ય સ્ક્રેપના વ્યવસાયમાંથી આટલી મોંઘી ગાડીઓ વસાવવાને લઈને પણ હાલ તે ચર્ચામાં છે.

અગાઉ પણ વિવાદો અને પોલીસ કેસમાં ફસાઈ ચૂક્યો છે

આરોપી મોનૂ શર્માનો વિવાદો સાથે જૂનો નાતો રહ્યો છે. ફરીદાબાદમાં અગાઉ બે વખત (2-3 નંબર ચોક અને ડબુઆ વિસ્તારમાં) તેના ઝઘડા થઈ ચૂક્યા છે, જોકે બાદમાં બંને પક્ષો વચ્ચે સમાધાન થઈ ગયું હતું. આ ઉપરાંત, જ્યારે તે થોડા સમય માટે દિલ્હી શિફ્ટ થયો હતો, ત્યારે ત્યાં પણ પાડોશી સાથે ઝઘડો થતા દિલ્હીના કાટજૂ માર્ગ પોલીસ સ્ટેશનમાં બંને પક્ષો તરફથી સામસામે કુલ ચાર કેસ નોંધાયા હતા, જે પાછળથી સમાધાન થતા રદ થયા હતા. આશરે બે વર્ષ પહેલા GST ચોરીના કેસમાં તેની ધરપકડ થઈ હતી અને તેણે અઢી મહિના તિહાડ જેલમાં વિતાવ્યા હતા.

હત્યા બાદ પરિવારને પંજાબ મૂકી આવ્યો, લાયસન્સવાળી પિસ્તોલથી ચલાવી હતી ગોળી

પરમજીત ધનખડની હત્યા (જેની સમગ્ર ઘટના CCTVમાં કેદ થઈ છે) બાદ મોનૂ શર્મા પોતાની પત્ની અને બાળકોને લઈને પંજાબના પટિયાલા જિલ્લાના સમાના ખાતે આવેલા પોતાના સાસરે મૂકી આવ્યો હતો.

હાલ આરોપી 5 દિવસના પોલીસ રિમાન્ડ પર છે, જે 13 નવેમ્બરે પૂર્ણ થઈ રહ્યા છે. પોલીસ પૂછપરછમાં તેણે કબૂલાત કરી છે કે તેની પાસે બે લાયસન્સવાળા હથિયારો છે, જેમાંથી એક લાયસન્સી પિસ્તોલનો ઉપયોગ કરીને તેણે પરમજીત ધનખડ પર ગોળીઓ ચલાવી હતી. ફરીદાબાદ પોલીસ હાલ હત્યામાં વપરાયેલા હથિયાર, તેના લાયસન્સના રેકોર્ડ અને હત્યા બાદ તે કોના-કોના સંપર્કમાં હતો તે દિશામાં ઊંડાણપૂર્વક તપાસ ચલાવી રહી છે.