હાથરસ નાસભાગ કેસનો મામલો પહોંચ્યો સુપ્રીમ કોર્ટ, દાખલ કરાઇ અરજી 

ઉત્તર પ્રદેશના હાથરસમાં મંગળવારે સત્સંગ દરમિયાન થયેલી નાસભાગમાં અત્યાર સુધીમાં 134 લોકોના મોત થયા છે. હવે આ મામલો સુપ્રીમ કોર્ટમાં પહોંચ્યો છે. કોર્ટમાં દાખલ કરાયેલી અરજીમાં મંગળવારે હાથરસમાં બનેલી ઘટનાની તપાસની માંગ કરવામાં આવી છે અને આ ઘટના માટે જવાબદાર લોકો અને અધિકારીઓ સામે કાયદેસરની કાર્યવાહી કરવાની માંગ કરવામાં આવી છે.

અરજીમાં આ ઘટનાની તપાસ માટે સુપ્રીમ કોર્ટના નિવૃત્ત જજની અધ્યક્ષતામાં પાંચ સભ્યોની સમિતિની રચના કરવામાં આવે અને યુપી સરકારને આ મામલે સ્ટેટસ રિપોર્ટ દાખલ કરવાની માંગ કરવામાં આવી છે. સુપ્રીમ કોર્ટના વકીલ વિશાલ તિવારીએ દાખલ કરેલી પિટિશનમાં આવા કાર્યક્રમોના આયોજન માટે માર્ગદર્શિકા બનાવવાની પણ માંગ કરવામાં આવી છે.

અલ્હાબાદ હાઈકોર્ટમાં પણ અરજી દાખલ કરવામાં આવી હતી

સાથે જ અલ્હાબાદ હાઈકોર્ટમાં પણ એક અરજી દાખલ કરવામાં આવી છે. એડવોકેટ ગૌરવ દ્વિવેદીએ ચીફ જસ્ટિસ અરુણ ભણસાલીને પત્ર પિટિશન મોકલી છે. પત્રની અરજીમાં સમગ્ર ઘટનાની સીબીઆઈ અથવા ન્યાયિક તપાસની માંગ કરવામાં આવી છે. સમગ્ર મામલાની તપાસ સ્પેશિયલ ઇન્વેસ્ટિગેટિવ એજન્સી દ્વારા કરાવવાનો આદેશ આપવા પણ માંગ કરવામાં આવી છે. અકસ્માતમાં ઘાયલ અને મૃતકોના પરિવારજનોને યોગ્ય વળતર આપવાની પણ માંગ કરવામાં આવી છે.

આ અકસ્માત મંગળવારે થયો હતો

મંગળવારના રોજ હાથરસ જિલ્લાના સિકંદરરૌ નગરના ફૂલરાઈ ગામમાં નારાયણ હરિ ઉર્ફે ભોલે બાબાનો માનવ મંગલ મિલન સદભાવના સમાગન નામથી સત્સંગ યોજાયો હતો. સત્સંગ પૂરો થતાં જ બાબાની કાર ભીડમાંથી પસાર થઈ, લોકો તેમની તરફ દોડ્યા. આ નાસભાગમાં લોકો એકબીજાની ઉપર પડવા લાગ્યા. વરસાદના કારણે થયેલા કાદવ-કીચડને કારણે પણ સ્થિતિ વધુ ખરાબ થઈ હતી. ઘાયલોને હાથરસ, એટાહ અને અલીગઢ જિલ્લા હોસ્પિટલમાં મોકલવામાં આવ્યા છે. કેન્દ્ર અને રાજ્ય સરકારોએ દરેકને 2 લાખ રૂપિયા આપવાની જાહેરાત કરી છે. આજે યોગી આદિત્યનાથ પોતે હાથરસ પહોંચી રહ્યા છે.