સ્પાઈસજેટની ફ્લાઈટ્સ રદ થવાનો સિલસિલો યથાવત, DGCAએ નિયમોના ઉલ્લંઘન બદલ ફટકારી નોટિસ

ગંભીર આર્થિક સંકટ સામે ઝઝૂમી રહેલી બજેટ એરલાઈન સ્પાઈસજેટ (SpiceJet) ની મુશ્કેલીઓમાં વધુ વધારો થયો છે. ઉડ્ડયન નિયમનકાર 'ડિરેક્ટોરેટ જનરલ ઓફ સિવિલ એવિએશન' (DGCA) એ 17 નવેમ્બર 2026 ના રોજ એરલાઈનને કારણદર્શક નોટિસ (Show Cause Notice) મોકલી છે. આ નોટિસમાં વિમાનન નિયમોના વારંવાર ઉલ્લંઘન, ફ્લાઈટના સંચાલનમાં સતત અવરોધો, બાકી લેણાં અને દંડની રકમ ન ચૂકવવી, તેમજ કોઈ નક્કર રિકવરી પ્લાન વગર મોટાભાગના વિમાનો ગ્રાઉન્ડેડ (ઊભા) રાખી દેવા જેવા ગંભીર મુદ્દા ઉઠાવવામાં આવ્યા છે.
OTP માં મોટો ઘટાડો અને 50% થી વધુ ફ્લાઈટ્સ રદ
7 દિવસમાં જવાબ આપવાનો આદેશ: સ્પાઈસજેટને આ નોટિસનો જવાબ આપવા માટે 7 દિવસનો સમય આપવામાં આવ્યો છે. જો એરલાઈન સમયસર જવાબ નહીં આપે તો DGCA એકતરફી આદેશ જારી કરી શકે છે.
માત્ર 25% રહ્યો OTP: નાગરિક ઉડ્ડયન મંત્રાલય (MoCA) ના 19 નવેમ્બરના આંકડા મુજબ, સ્પાઈસજેટનો ઓન-ટાઈમ પરફોર્મન્સ (OTP) માત્ર 25% રહ્યો છે, જ્યારે અન્ય મુખ્ય એરલાઈન્સનો OTP 80% થી વધુ છે. છેલ્લા કેટલાક દિવસોમાં સ્પાઈસજેટે પોતાની 50% થી વધુ ફ્લાઈટ્સ રદ કરી છે, જેના કારણે મુસાફરો ભારે પરેશાન છે.
ઘટતો માર્કેટ શેર અને વિદેશમાં પણ મુશ્કેલીઓ
માર્કેટ શેર ઘટીને 0.6% થયો: રોકડની ભારે અછત, કર્મચારીઓના પગારમાં વિલંબ અને વિમાનોના લીઝર્સને ચૂકવણી ન કરી શકવાને કારણે સ્પાઈસજેટ પાસે હવે 10 થી પણ ઓછા વિમાન બચ્યા છે. વર્ષ 2019 માં જેનો સ્થાનિક માર્કેટ શેર આશરે 15% અને જાન્યુઆરી 2026 માં લગભગ 4% હતો, તે ઓક્ટોબરમાં ઘટીને માત્ર 0.6% રહી ગયો છે. અગાઉ બોર્ડે ₹5,500 કરોડ એકત્ર કરવાની મંજૂરી આપી હતી, પરંતુ ભંડોળ મળવાની સમયમર્યાદા અંગે હજુ સ્પષ્ટતા નથી.
વિદેશી એરપોર્ટ પર પણ અસર: બાકી રકમ ન ચૂકવવાને કારણે ગયા અઠવાડિયે દુબઈ એરપોર્ટ પર સ્પાઈસજેટની ચેક-ઈન સેવાઓ અટકાવી દેવામાં આવી હતી. આ ઉપરાંત, ફરજિયાત વીમા કવચના રિન્યુઅલ અંગે અનિશ્ચિતતા અને આંતરરાષ્ટ્રીય ઉડ્ડયન માટે જરૂરી 20 વિમાન અથવા 20% ક્ષમતાના નિયમનું પાલન ન થવા અંગે પણ નિયમનકારે ચિંતા વ્યક્ત કરી છે.








