EVM વગર પણ કલાકોમાં પરિણામ! અમેરિકામાં કાગળના 10 કરોડ મતો કેવી રીતે ગણાય છે? જાણીને ચોંકી જશો
ભારતમાં ચૂંટણીના પરિણામો ઝડપથી આવવા પાછળ ઇલેક્ટ્રોનિક વોટિંગ મશીન (EVM) મુખ્ય ભૂમિકા ભજવે છે, જ્યાં બટન દબાવતાની સાથે જ મત ડિજિટલ રીતે નોંધાઈ જાય છે. પરંતુ વિશ્વના સૌથી જૂના લોકતંત્ર અમેરિકામાં સ્થિતિ તદ્દન અલગ છે. ત્યાં મોટાભાગના મતદારો કાગળના બેલેટ પેપર પર જ પોતાના મતાધિકારનો ઉપયોગ કરે છે. તેમ છતાં, મતદાન પૂર્ણ થયાના થોડા જ કલાકોમાં 10 કરોડથી વધુ મતોની ગણતરી શરૂ થઈ જાય છે અને પરિણામોના વલણો પણ સામે આવવા લાગે છે.
હાલમાં યોજાયેલી યુએસ મિડટર્મ ચૂંટણીમાં પ્રતિનિધિ સભાની ૪૩૫ બેઠકો, સેનેટની ૩૫ બેઠકો અને ૩૬ રાજ્યોના ગવર્નર પદ માટે મતદાન થયું હતું. યુનિવર્સિટી ઓફ ફ્લોરિડાની ઇલેક્શન લેબ અનુસાર, મતદાનના મુખ્ય દિવસ પહેલાં જ 5.7 કરોડથી વધુ લોકો અર્લી વોટિંગ કરી ચૂક્યા હતા. એસોસિએટેડ પ્રેસ (AP) મુજબ કુલ 10 કરોડથી વધુ બેલેટ પેપર નાખવામાં આવ્યા હતા.
બેલેટ પેપર છતાં આટલી ઝડપી ગણતરી કેવી રીતે શક્ય બને છે?
અમેરિકામાં બેલેટ પેપર પર મતદાન થતું હોવા છતાં ભારતની જૂની બેલેટ પદ્ધતિની જેમ ત્યાં હાથથી એક-એક કાગળ ગણવામાં આવતો નથી. તેની ગણતરી અદ્યતન ટેકનોલોજી દ્વારા કરવામાં આવે છે. મતદાર કાગળના બેલેટ પર મનપસંદ ઉમેદવારના નામ સામે પેન કે માર્કરથી ગોળ કુંડાળું કે બોક્સ ભરે છે. ત્યારબાદ આ બેલેટ પેપરને મતદાન કેન્દ્ર પર જ રાખેલા ડિજિટલ સ્કેનરમાં નાખવામાં આવે છે. સ્કેનર મશીન કાગળ પરના નિશાનને સેકન્ડોમાં રીડ કરી લે છે અને સંબંધિત ઉમેદવારના ખાતામાં મત આપોઆપ ઉમેરી દે છે.
મોટા મતવિસ્તારો અને કાઉન્ટિંગ સેન્ટર્સ પર અતિ આધુનિક હાઈ-સ્પીડ સ્કેનિંગ મશીનો મૂકવામાં આવે છે, જે એક જ કલાકમાં હજારો બેલેટ પેપર સ્કેન કરીને ડેટા તૈયાર કરી નાખે છે. કાગળના બેલેટ બોક્સમાં સુરક્ષિત રહે છે અને ડિજિટલ કાઉન્ટ મશીનમાં નોંધાઈ જાય છે. જો ભવિષ્યમાં કોઈ વિવાદ થાય તો કાગળના અસલ બેલેટ દ્વારા ઓડિટ કે રીકાઉન્ટિંગ પણ સરળતાથી થઈ શકે છે.
આમ, અમેરિકા પરંપરાગત પેપર બેલેટ અને અત્યાધુનિક ઓપ્ટિકલ સ્કેનિંગ ટેકનોલોજીનું અનોખું મિશ્રણ અપનાવીને કરોડો મતોની ગણતરી ગણતરીના કલાકોમાં પૂર્ણ કરી લે છે.
