રાજ્યસભા સાંસદની પુત્રીએ ફૂટપાથ પર સૂતેલા વ્યક્તિ પર ચઢાવી BMW, તાત્કાલિક મળ્યા જામીન

મુંબઈ પોર્શ કારનો મામલો હજુ ઠંડો પડ્યો નહોતો ત્યારે ચેન્નાઈથી વધુ એક હિટ એન્ડ રનનો કિસ્સો પ્રકાશમાં આવ્યો છે. મળતી માહિતી મુજબ ચેન્નાઈમાં સોમવારે સાંજે YSR કોંગ્રેસ પાર્ટી (YSRCP)ના રાજ્યસભા સાંસદની દીકરીએ ફૂટપાથ પર સૂઈ રહેલા એક વ્યક્તિને તેની લક્ઝરી કાર વડે કચડી નાખ્યો હતો. જે બાદ વ્યક્તિનું મોત નીપજ્યું હતું. તે જ સમયે, આરોપીને માત્ર એક દિવસ પછી જ આ કેસમાં જામીન મળી ગયા.

ફૂટપાથ પર સૂતેલા વ્યક્તિને કચડી નાખ્યો

માહિતી અનુસાર, YSR કોંગ્રેસ પાર્ટી (YSRCP) રાજ્યસભા સાંસદ બિડા મસ્તાન રાવની પુત્રી માધુરીએ સોમવારે સાંજે ચેન્નાઈમાં તેની BMW કારથી એક વ્યક્તિને કચડી નાખ્યો હતો. મીડિયા રિપોર્ટ્સ અનુસાર, 21 વર્ષીય ચિત્રકાર સૂર્યાનું મૃત્યુ થયું હતું, જ્યારે માધુરીની ધરપકડ કરવામાં આવી હતી. ત્યારબાદ મંગળવારે આરોપી માધુરીને જામીન પર મુક્ત કરવામાં આવી હતી.

પૂણેમાં પણ બની હતી આવી  ઘટના

પુણેના કલ્યાણી નગર વિસ્તારમાં 19 મેના રોજ એક શ્રીમંત વ્યક્તિએ કથિત રીતે બાઇકને તેની પોર્શ કાર સાથે અથડાવ્યા બાદ આ ઘટના બની હતી, જેમાં એક મહિલા સહિત બે યુવાન સોફ્ટવેર પ્રોફેશનલ્સના મોત થયા હતા. કિશોરને હાલમાં પુણેના સુધારક ગૃહમાં રાખવામાં આવ્યો છે. 

સાંસદ પુત્રી જામીન પર મુક્ત

ચેન્નાઈ પોલીસે જણાવ્યું કે, એક ઝડપે આવતી BMW કારે ફૂટપાથ પર સૂઈ રહેલા એક વ્યક્તિને કચડી નાખ્યો, પરિણામે તેનું મૃત્યુ થયું. પોલીસે જણાવ્યું કે મહિલા અને તેની સાથે રહેલી અન્ય એક મહિલા ઘટના બાદ તરત જ સ્થળ પરથી ભાગી ગઈ હતી. મૃતક સૂર્યા સોમવારે રાત્રે બેસંત નગરમાં ફૂટપાથ પર સૂતો હતો ત્યારે તેને એક લક્ઝરી કારે કચડી નાખ્યો હતો. ટ્રાફિક પોલીસે IPC કલમ 304A (બેદરકારીથી મૃત્યુનું કારણ) હેઠળ કેસ નોંધ્યો છે, જે જામીનપાત્ર ગુનો છે, અને કાર માલિકને નોટિસ પણ જારી કરી છે.

મૃતકના લગ્નને 8 મહિના જ થયા હતા.

મીડિયા રિપોર્ટ્સ અનુસાર, માધુરી ઘટના બાદ તરત જ ઘટનાસ્થળેથી ભાગી ગઈ હતી, પરંતુ તેની મિત્ર કારમાંથી નીચે ઉતરી એકઠા થયેલા લોકો સાથે દલીલ કરવા લાગી હતી. થોડા સમય પછી તે પણ ત્યાંથી નીકળી ગઈ હતી. ભીડમાંથી કેટલાક લોકો સૂર્યાને હોસ્પિટલ લઈ ગયા, પરંતુ ગંભીર ઈજાઓને કારણે તેનું મૃત્યુ થયું. સૂર્યાના લગ્નને માત્ર 8 મહિના જ થયા હતા. તેના સંબંધીઓ અને પડોશીઓ ન્યાયની માંગ સાથે J-5 શાસ્ત્રીનગર પોલીસ સ્ટેશનમાં એકઠા થયા હતા. તે જ સમયે, સીસીટીવી કેમેરા ફૂટેજ જોયા પછી, પોલીસને જાણવા મળ્યું કે કાર BMR (બીડા મસ્તાન રાવ) જૂથની છે અને તે પુડુચેરીમાં નોંધાયેલ છે. ત્યારબાદ માધુરીની ધરપકડ કરવામાં આવી હતી પરંતુ તેને પોલીસ સ્ટેશનમાંથી જામીન મળી ગયા હતા.

લોકો સાથે દલીલ કરી

તે જ સમયે, સોશિયલ મીડિયા પર એક વીડિયો સામે આવ્યો છે જેમાં માધુરીની મિત્ર સ્થાનિક લોકો સાથે દલીલ કરતી જોવા મળે છે. તે સ્થાનિક લોકોને કહી રહી હતી કે, તેણે સૂર્યાને હોસ્પિટલ લઈ જવા માટે એમ્બ્યુલન્સ બોલાવી હતી. બિડા મસ્તાન રાવ વર્ષ 2022માં રાજ્યસભાના સાંસદ બન્યા છે, આ પહેલા તેઓ ધારાસભ્ય પણ રહી ચૂક્યા છે, જે બીએમઆર ગ્રુપ સાથે પણ જોડાયેલા છે, જે સીફૂડ ઈન્ડસ્ટ્રીમાં  એક મોટું નામ છે.