ગૃહમંત્રીના ઘૂસણખોરોના નિવેદન બાદ ગરમાયું રાજકરણ, શાસક-વિપક્ષ વચ્ચે વાકયુદ્ધ

દેશમાં 3 કરોડ બાંગ્લાદેશી ઘૂસણખોરો હોવાના કેન્દ્રીય ગૃહમંત્રી અમિત શાહના દાવા બાદ ભાજપ અને વિપક્ષ વચ્ચે રાજકીય ઘમાસાણ તેજ બન્યું છે. કેન્દ્રીય ગૃહમંત્રી અમિત શાહના આ નિવેદન સામે કોંગ્રેસ અને સમાજવાદી પાર્ટીએ વળતો પ્રહાર કરતા પૂછ્યું છે કે, જો ખરેખર દેશમાં આટલી મોટી સંખ્યામાં ઘૂસણખોરો હાજર છે, તો કેન્દ્ર સરકારે અત્યાર સુધી તેમની સામે શું પગલાં લીધાં છે. બીજી તરફ ભાજપ અને તેના સહયોગી પક્ષોએ આક્ષેપ કર્યો છે કે વિપક્ષ વોટબેંક સાચવવા ગેરકાયદે વસાહતીઓને બચાવવા માટે સ્પેશિયલ ઇન્ટેન્સિવ રિવિઝન (SIR) જેવી પ્રક્રિયાઓનો વિરોધ કરી રહ્યો છે.

‘ઘૂસણખોરોને બહાર કાઢો, તમને કોણ રોકી રહ્યું છે?’ કોંગ્રેસના કેન્દ્ર સરકાર પર પ્રહાર

કોંગ્રેસ નેતા ઉદિત રાજે અમિત શાહના પ્રહારો સામે વળતો પ્રહાર કરતાં કહ્યું કે, ‘ચૂંટણીઓ નજીક આવે ત્યારે જ તેમને ઘૂસણખોરો દેખાય છે. ઝારખંડની ચૂંટણીમાં, દિલ્હીની ચૂંટણીમાં અને બિહારની ચૂંટણીમાં પણ તેમણે ઘણો હોબાળો મચાવ્યો હતો છેલ્લા 12 વર્ષથી સરકાર કોણ ચલાવી રહ્યું છે? તેમણે શરમ અનુભવવી જોઈએ અને રાજીનામું આપવું જોઈએ. જો ઘૂસણખોરો છે તો તેમને બહાર કાઢો. 5 વર્ષ થઈ ગયા, તમને કોણ રોકી રહ્યું છે? એક લિસ્ટ બનાવો અને તમામને પાછા મોકલો. પરંતુ તેઓ દેશની જનતાને માત્ર મૂર્ખ બનાવી રહ્યા છે.’

'આટલી મોટી સંખ્યામાં ઘૂસણખોરો હોય તો ગૃહમંત્રી પદ છોડે’: કોંગ્રેસ સાંસદ ઇમરાન મસૂદ

કોંગ્રેસ સાંસદ ઇમરાન મસૂદે અમિત શાહના નિવેદન પર આકરા પ્રહાર કરતાં કહ્યું કે, ‘તો પછી આ ઘૂસણખોરો ક્યાં છે? જો દેશમાં આટલી મોટી સંખ્યામાં ઘૂસણખોરો હોય, તો અમિત શાહને પોતાના પદ પર રહેવાનો કોઈ નૈતિક અધિકાર નથી. દેશના ગૃહમંત્રી આટલું હળવાશભર્યું અને બેજવાબદાર નિવેદન આપે તેનાથી વધુ ચિંતાજનક બાબત બીજી કઈ હોઈ શકે?’

‘અમિત શાહને દરેક સામાન્ય નાગરિક ઘૂસણખોર દેખાય છે’: કોંગ્રેસ સાંસદ ઇમરાન પ્રતાપગઢી

કોંગ્રેસ સાંસદ ઇમરાન પ્રતાપગઢીએ નિશાન સાધતાં કહ્યું કે, ‘વાસ્તવમાં અમિત શાહને દરેક ભારતીય ઘૂસણખોર દેખાય છે. તેઓ દેશના સામાન્ય નાગરિકોને ઘૂસણખોર તરીકે જુએ છે. જે પણ વ્યક્તિ ભાજપનો સભ્ય નથી તે તેમને ઘૂસણખોર લાગે છે. આ જ કારણ છે કે તેઓ આવી ભાષાનો ઉપયોગ કરી રહ્યા છે.’

સમાજવાદી પાર્ટીના સાંસદ અવધેશ પ્રસાદે ઉઠાવ્યા સવાલ

સમાજવાદી પાર્ટીના સાંસદ અવધેશ પ્રસાદે પણ અમિત શાહના દાવા સામે આકરો વાંધો ઉઠાવ્યો હતો. તેમણે જણાવ્યું કે, ‘કદાચ ગૃહમંત્રીને એ વાતની સાચી જાણકારી નથી કે ઘૂસણખોર કોણ છે. દેશની આઝાદી માટે અનેક લોકોએ સંઘર્ષ કર્યો છે અને અસંખ્ય લોકો એવા છે જેમના પૂર્વજોને આ જ દેશની ધરતીમાં દફનાવવામાં આવ્યા છે. આવા લોકોને ઘૂસણખોર ગણાવતા પહેલા તથ્યો અને વાસ્તવિકતાને સમજવી ખૂબ જરૂરી છે.’

‘SIR પ્રક્રિયા દેશમાં 11-12 વખત થઈ ચૂકી છે’: ભાજપ સાંસદ સંતોષ પાંડે

છત્તીસગઢના ભાજપ સાંસદ સંતોષ પાંડેએ અમિત શાહના નિવેદનનું સમર્થન કરતાં કહ્યું કે, ‘અમિત શાહે હંમેશાં પોતાની વાત મક્કમતાથી મૂકી છે. તેમના અને વડાપ્રધાન નરેન્દ્ર મોદીના મજબૂત સંકલ્પના કારણે જ આજે પશ્ચિમ બંગાળમાં અત્યાચારો ઘટ્યા છે. ઘૂસણખોરો બાંગ્લાદેશ પરત ફર્યા છે અને જે બાકી છે તેમને પણ જવું પડશે. SIR પ્રક્રિયા દ્વારા મૃત્યુ પામેલા લોકોના નામ મતદાર યાદીમાંથી હટાવવામાં આવશે અને જેમણે ઘર બદલ્યું છે તેમના નામ નવી જગ્યાએ ઉમેરાશે. શું આ પ્રક્રિયા પહેલીવાર થઈ રહી છે? શું પહેલાં SIR નથી થયું? આ દેશમાં 11 થી 12 વખત આવી કવાયત હાથ ધરાઈ ચૂકી છે.’

‘વોટ બચાવો યાત્રાના નામે ઘૂસણખોર બચાવો યાત્રા’: શિવસેના પ્રવક્તા શાઇના એન.સી.

શિવસેનાના રાષ્ટ્રીય પ્રવક્તા શાઇના એન.સી.એ વિપક્ષ પર પ્રહાર કરતાં કહ્યું કે, ‘રાહુલ ગાંધી રામલીલા મેદાન તરફ દોડે છે પરંતુ સંસદમાંથી ભાગી જાય છે. અમિત શાહ તેમને સંસદમાં આવીને SIR પર ચર્ચા કરવાનો પડકાર આપી રહ્યા છે. રાહુલ ગાંધી લોકશાહીના મંદિરમાં ચર્ચા કરવાથી આટલા ડરે છે કેમ? મતદાર યાદીમાંથી 3 કરોડ નામો એટલા માટે હટાવવામાં આવ્યા હતા કારણ કે તેઓ વાસ્તવિક મતદારો નહોતા પરંતુ ઘૂસણખોરો હતા. ઇન્ડિયા ગઠબંધન વોટ બચાવો યાત્રાના નામે ઘૂસણખોર બચાવો યાત્રા ચલાવીને આવા ગેરકાયદે વસાહતીઓને બચાવવામાં માને છે.’

‘વિપક્ષ બોગસ વોટિંગ માટે ઘૂસણખોરોને રાખવા માંગે છે’: યુપી મંત્રી ઓમપ્રકાશ રાજભર

ઉત્તર પ્રદેશ સરકારના મંત્રી ઓમપ્રકાશ રાજભરે અમિત શાહના સમર્થનમાં કહ્યું કે, ‘અમિત શાહની વાત બિલકુલ સાચી છે. કોંગ્રેસ હોય કે અન્ય કોઈ વિરોધ પક્ષ, તેઓ મતદાર યાદીમાં ઘૂસણખોરોના નામ જાળવી રાખવા માંગતા હતા. તેઓ એક જ વ્યક્તિના ત્રણ-ત્રણ નામ નોંધાવીને બોગસ વોટિંગ કરાવતા હતા, એટલા માટે જ અત્યારે તેમને સૌથી વધુ ચિંતા થઈ રહી છે.’

‘કોંગ્રેસ અને TMC શા માટે નકલી મતદારો ઇચ્છે છે?’: સ્મૃતિ ઈરાનીના આક્ષેપ

ભાજપ નેતા સ્મૃતિ ઈરાનીએ કોલકાતા ખાતે વિપક્ષ પર નિશાન સાધતાં કહ્યું કે, ‘કોંગ્રેસ અને TMC મતદાર યાદીમાં ડુપ્લિકેટ અને નકલી મતદારો કેમ રાખવા માંગે છે? TMCએ પોતાના રાજકીય ફાયદા માટે ઘૂસણખોરોને આશરો આપ્યો છે.’

અમિત શાહના દાવાના સમર્થનમાં ભાજપે વસ્તીના આંકડા ટાંક્યા

બીજી તરફ, ભાજપના ઝારખંડ પ્રવક્તા પ્રતુલ શાહ દેવે અમિત શાહના નિવેદનનો બચાવ કરતા આરોપ લગાવ્યો કે ગેરકાયદે ઘૂસણખોરીના કારણે ઝારખંડ સહિતના કેટલાક વિસ્તારોની જનસંખ્યાના માળખા પર મોટી અસર પડી છે. તેમણે જણાવ્યું કે, દેશમાં છેલ્લી વસ્તી ગણતરી 2011માં થઈ હતી અને છેલ્લા કેટલાક દાયકાઓમાં વસ્તીના બંધારણમાં મોટો ફેરફાર જોવા મળ્યો છે.

વિપક્ષી પક્ષો પર ગેરકાયદે વસાહતીઓને પ્રોત્સાહન આપવાનો આરોપ

ભાજપના પ્રવક્તાએ આરોપ મૂક્યો કે લાંબા સમય સુધી સત્તામાં રહેલી કોંગ્રેસે બાંગ્લાદેશી ઘૂસણખોરો અને રોહિંગ્યાઓને ગેરકાયદે રીતે ભારતમાં પ્રવેશવાની છૂટ આપી હતી. આ ઉપરાંત તેમણે ઝારખંડ મુક્તિ મોરચા (JMM)ના નેતાઓ પર પણ રાજકીય સમર્થન મેળવવા ઘૂસણખોરોને પ્રોત્સાહન આપવાનો આરોપ લગાવ્યો હતો. તેમણે દાવો કર્યો કે સ્થાનિક વહીવટી તંત્રની મદદથી ગેરકાયદે વસાહતીઓએ આધાર અને મતદાર ઓળખપત્રો પણ બનાવી લીધા છે.

જનસંખ્યાના આંકડાકીય ફેરફારો દર્શાવ્યા

જનસંખ્યાના આંકડાઓ ટાંકતા ભાજપના પ્રવક્તાએ દાવો કર્યો કે, ઝારખંડમાં સંથાલ આદિવાસી સમુદાયની વસ્તી જ્યાં 1951માં 44 ટકા હતી, તે 2011માં ઘટીને 28 ટકા થઈ ગઈ છે. બીજી તરફ, આ જ સમયગાળા દરમિયાન મુસ્લિમ વસ્તી 9 ટકાથી વધીને 23 ટકા થઈ ગઈ છે. તેમણે આ ડેમોગ્રાફિક ફેરફારોને ગેરકાયદે ઘૂસણખોરીનું સીધું પરિણામ ગણાવ્યું હતું.