'રાહુલ ગાંધીનો ડ્રગ્સ ટેસ્ટ કરાવવો જોઈએ...'; લોકસભામાં કંગના રનૌતના ગંભીર આરોપ

મંડીથી ભાજપની સાંસદ અને ફિલ્મ અભિનેત્રી કંગના રનૌત હંમેશા તેના ધારદાર નિવેદન માટે જાણીતી છે. હાલમાં જ તેમણે કોંગ્રેસ નેતા રાહુલ ગાંધી વિશે વિવાદાસ્પદ નિવેદન આપ્યું છે. કંગનાએ કહ્યું છે કે રાહુલ ગાંધી હંમેશા નશામાં હોય છે, તેમનો ડ્રગ્સ ટેસ્ટ કરાવવો જોઈએ. તેમણે કહ્યું કે રાહુલ ગાંધી હંમેશા બંધારણને ઠેસ પહોંચાડે છે. કંગના રનૌતે કહ્યું કે રાહુલ ગાંધી જે સ્થિતિમાં સંસદમાં પહોંચે છે અને જે પ્રકારની દલીલો કરે છે તેને જોઈને લાગે છે કે તેઓ  હંમેશા નશામાં હોય છે.

કંગના રનૌત આ પહેલા પણ રાહુલ ગાંધી પર પ્રહાર કરી ચૂકી છે. કંગનાએ 1 જુલાઈના રોજ લોકસભામાં વિપક્ષી નેતા રાહુલ ગાંધી પર આકરા પ્રહારો કર્યા હતા. તેમણે સૂચન કર્યું કે કોંગ્રેસના નેતાએ તાત્કાલિક કોઈ ઉપચાર કરવો જોઈએ. 18મી લોકસભાના પહેલા સત્રમાં રાષ્ટ્રપતિના ભાષણ પર ચર્ચા દરમિયાન કંગના રનૌતે રાહુલ ગાંધીના ભાષણને બેજવાબદાર ગણાવ્યા હતા.

છેલ્લા બે દિવસથી રાહુલ ગાંધી લોકસભામાં કેન્દ્ર સરકાર પર સતત પ્રહારો કરી રહ્યા છે. બજેટ પર ચર્ચા દરમિયાન તેમણે ભાજપના ચૂંટણી ચિન્હને ચક્રવ્યૂહનું પ્રતીક ગણાવ્યું હતું. તેમણે કહ્યું હતું કે કેન્દ્ર સરકાર ચક્રવ્યુહ બનાવીને દેશના લોકોને ઘેરી લેવાનો અને ડરાવવાનો પ્રયાસ કરી રહી છે. પોતાના ભાષણમાં તેમણે ખેડૂતો, સામાન્ય માણસ, અગ્નિવીર અને મહિલાઓના મુદ્દા ઉઠાવ્યા.

ઓલિમ્પિક ઓપનિંગ સેરેમની પર પણ કટાક્ષ

કંગના રનૌતે શનિવારે 27 જુલાઈના રોજ પેરિસ ઓલિમ્પિક્સ 2024ના ઉદ્ઘાટન સમારોહમાં પ્રદર્શનની પણ આકરી ટીકા કરી હતી. તેણે સમારંભમાં એક પ્રદર્શનને ખૂબ જ અશ્લીલ ગણાવ્યું હતું. તેમણે કહ્યું હતું કે અશ્લીલતાનું પ્રદર્શન ડાબેરીઓ દ્વારા ઓલિમ્પિક ગેમ્સને હાઇજેક કરવાનું પરિણામ છે.

મોહરમ પર ટિપ્પણીઓથી વિવાદમાં ફસાઈ હતી 

કંગના રનૌતે એક દિવસ પહેલા તેની સોશિયલ મીડિયા પોસ્ટ પર મોહર્રમના શોકનો વીડિયો ફરીથી પોસ્ટ કર્યો હતો. આને રિપોસ્ટ કરતાં કંગનાએ લખ્યું હતું કે- “આ વિચિત્ર અને ડરામણુ છે. પણ શું હિન્દુઓએ પણ ટકી રહેવા માટે આવી તાલીમ લેવી જોઈએ?

આને લઈને કંગના રનૌત સોશિયલ મીડિયા પર ખરાબ રીતે ટ્રોલ થઈ હતી. યુઝર્સે કંગનાની આ પોસ્ટ પર કઠોર અને તીક્ષ્ણ ટિપ્પણીઓ કરી હતી.