રાહુલ ગાંધી ઇલ્હાન ઓમરને મળી રહ્યા છે, ભાજપ નેતા નિશિકાંત દુબેનો દાવો

ભારતીય જનતા પાર્ટી (ભાજપ)ના સાંસદ નિશિકાંત દુબેએ કોંગ્રેસ નેતા અને લોકસભામાં વિરોધ પક્ષના નેતા રાહુલ ગાંધી પર નિશાન સાધ્યું છે. તેમણે રાહુલ ગાંધીની વિદેશ યાત્રાઓ અને અમેરિકન ધારાસભ્યો ઇલ્હાન ઉમર તથા રો ખન્ના સાથેની કથિત મુલાકાતો અંગે પ્રશ્નો ઉઠાવ્યા છે. દુબેએ દાવો કર્યો છે કે છેલ્લા ૧૦ વર્ષમાં રાહુલ ગાંધીએ ઓછામાં ઓછી ૨૭૦ વખત વિદેશ પ્રવાસ કર્યો છે. તેમણે વધુમાં આક્ષેપ કર્યો કે છેલ્લા ૧૦-૧૫ દિવસોમાં દિલ્હીમાં થયેલા વિરોધ પ્રદર્શનોને કારણે સામાન્ય નાગરિકો, વેપારીઓ અને નાના ઉદ્યોગસાહસિકોને ભારે મુશ્કેલીઓનો સામનો કરવો પડ્યો છે. આ ઉપરાંત, તેમણે વિરોધ પ્રદર્શનના સ્થળોએ રાષ્ટ્રધ્વજ 'તિરંગા'નો જે રીતે ઉપયોગ કરવામાં આવ્યો, તેના પર સખત વાંધો વ્યક્ત કર્યો છે.

ગુરુવારે એક પત્રકાર પરિષદ દરમિયાન, નિશિકાંત દુબેએ ટિપ્પણી કરી કે છેલ્લા ૧૦-૧૫ દિવસોમાં દિલ્હીનું વાતાવરણ એવું હતું જાણે કે ત્યાં કોઈ કાયદા કે નિયમો અમલમાં જ ન હોય. તેમના જણાવ્યા અનુસાર, જ્યારે અન્ય લોકો વિરોધ પ્રદર્શનોમાં વ્યસ્ત હતા, ત્યારે રાહુલ ગાંધી ઘણીવાર લંચ કે ડિનર માટે બહાર જતા રહેતા હતા. તેમણે નોંધ્યું કે આ પ્રદર્શનોને કારણે દિલ્હીના સામાન્ય રહેવાસીઓને, જેમાં વેપારીઓ, ઓટો-રિક્ષા ચાલકો, ટેમ્પો ચાલકો અને ફેરિયાઓનો સમાવેશ થાય છે, તેમને ભારે પરેશાની ભોગવવી પડી છે.

રાષ્ટ્રધ્વજના ઉપયોગ અંગે ઉઠાવેલા પ્રશ્નો

 ભાજપ સાંસદે દિલ્હીમાં વિરોધ પ્રદર્શનો દરમિયાન રાષ્ટ્રધ્વજના ઉપયોગ પર પણ સવાલ ઉઠાવ્યા છે. દુબેએ આક્ષેપ કર્યો કે કેટલાક પ્રદર્શનકારીઓ તિરંગો સાથે લાવ્યા હતા, અને જે રીતે તેને સંભાળવામાં આવ્યો તે તેની ગરિમા પ્રત્યે અનાદર દર્શાવે છે. તેમણે ભારપૂર્વક કહ્યું કે તિરંગો માત્ર એક ધ્વજ નથી, પરંતુ તે રાષ્ટ્ર અને તેના બંધારણ સાથે ઊંડી રીતે જોડાયેલું પ્રતીક છે. તેમણે સૌને એ પણ યાદ અપાવ્યું કે રાષ્ટ્રધ્વજ ફરકાવવા અને તેના ઉપયોગ અંગે ચોક્કસ નિયમો અને પ્રોટોકોલ નિર્ધારિત છે.

રાહુલ ગાંધીની ૨૭૦ વિદેશ યાત્રાઓ અંગેનો દાવો 

નિશિકાંત દુબેએ રાહુલ ગાંધીની વિદેશ યાત્રાઓ અંગે પણ પ્રશ્નો ઉઠાવ્યા. તેમણે કહ્યું, "વિરોધ પક્ષના નેતા રાહુલ ગાંધીજીએ છેલ્લા દસ વર્ષમાં ઓછામાં ઓછી ૨૭૦ વખત વિદેશ પ્રવાસ કર્યો છે. માત્ર એક કે બે વાર નહીં, પરંતુ ૨૭૦ વખત." ભાજપ સાંસદે સવાલ કર્યો કે રાહુલ ગાંધી આટલી વાર વિદેશ પ્રવાસ શા માટે કરે છે અને ત્યાં તેઓ કોને મળે છે? તેમણે આરોપ લગાવ્યો કે રાહુલ ગાંધીના વિરોધ પ્રદર્શનો યુવાનોની લાગણીઓને ભડકાવે છે, જેના પરિણામે તે યુવાનોએ કાયદાકીય કાર્યવાહીનો સામનો કરવો પડે છે. પોતાના નિવેદનમાં દુબેએ આશુતોષ રંકા અને સૌરભ દાસનો પણ ઉલ્લેખ કર્યો અને જણાવ્યું કે જ્યારે રાહુલ ગાંધી વિદેશ પ્રવાસે હતા, ત્યારે તેઓ જેલમાં હતા.

ઈલ્હાન ઉમર અને રો ખન્ના સાથેની મુલાકાતો અંગે પ્રશ્નો 

નિશિકાંત દુબેએ પોતાના નિવેદનમાં અમેરિકી સાંસદો ઈલ્હાન ઉમર અને રો ખન્નાનો પણ ઉલ્લેખ કર્યો. તેમણે દાવો કર્યો કે રાહુલ ગાંધી જ્યારે પણ અમેરિકાની મુલાકાતે જાય છે, ત્યારે તેઓ સતત આ બે સાંસદોને મળે છે. દુબેએ આ મુલાકાતોને જ્યોર્જ સોરોસ સાથે સંકળાયેલા એક ફાઉન્ડેશન સાથે જોડી અને આ સંપર્કો પાછળના ઉદ્દેશ્ય અંગે પ્રશ્નો ઉઠાવ્યા.ઉલ્લેખનીય છે કે સપ્ટેમ્બર ૨૦૨૪માં રાહુલ ગાંધીની અમેરિકા મુલાકાત દરમિયાન, તેઓ ઈલ્હાન ઉમર અને રો ખન્ના સહિતના અમેરિકી સાંસદોના એક જૂથને મળ્યા હતા.

ઈલ્હાન ઉમરની પાકિસ્તાન મુલાકાતનો સંદર્ભ 

ભાજપના સાંસદે અમેરિકી સાંસદ ઈલ્હાન ઉમરની પાકિસ્તાન મુલાકાત અને કાશ્મીર અંગેના તેમના કથિત નિવેદનો પર પણ વાંધો ઉઠાવ્યો. તેમણે આરોપ લગાવ્યો કે પાકિસ્તાન મુલાકાત દરમિયાન, ઉમરે કાશ્મીરને પાકિસ્તાનનો ભાગ ગણાવ્યું હતું અને ભારતમાં મુસ્લિમો સાથે ખરાબ વર્તાવ થતો હોવાના આક્ષેપો કર્યા હતા.

ઈલ્હાન ઉમરે એપ્રિલ ૨૦૨૨માં પાકિસ્તાન અને પાકિસ્તાન અધિકૃત કાશ્મીર (PoK)ની મુલાકાત લીધી હતી. જે મુલાકાત સામે ભારત સરકારે વાંધો વ્યક્ત કર્યો હતો. ઉમરે અવારનવાર ભારત સરકારની નીતિઓ અને દેશમાં ધાર્મિક લઘુમતીઓની સ્થિતિ અંગે ટીકાત્મક ટિપ્પણીઓ પણ કરી છે. નિશિકાંત દુબેએ કહ્યું, "ઈલ્હાન ઉમર એ જ કોંગ્રેસવુમન (સાંસદ) છે જેમણે પાકિસ્તાનની મુલાકાત લીધી હતી અને દાવો કર્યો હતો કે કાશ્મીર પાકિસ્તાનનો ભાગ છે. તેમણે આરોપ લગાવ્યો હતો કે ત્યાં મુસ્લિમો પર અત્યાચાર થઈ રહ્યો છે અને તેમની હત્યા કરવામાં આવી રહી છે, એટલું જ નહીં, તેમણે તો એવું પણ સૂચન કર્યું હતું કે સમગ્ર વિશ્વએ ભારત પર હુમલો કરવો જોઈએ આ એ જ ઈલ્હાન ઉમર છે.

હાલમાં, ટ્રમ્પ વહીવટીતંત્ર અને FBI દ્વારા ઈલ્હાન ઉમર, તેમની બહેન અને પરિવારના અન્ય સભ્યોના ત્યાં વારંવાર દરોડા પાડવામાં આવી રહ્યા છે. એવી માહિતી સામે આવી છે કે તેઓ એક એવી સંસ્થાના સભ્ય છે જેના માધ્યમથી તેમણે ખોટી માહિતી આપીને અમેરિકી નાગરિકત્વ મેળવ્યું હતું. શક્ય છે કે તેમને દેશનિકાલ કરવામાં આવે અથવા જેલમાં પણ મોકલી દેવામાં આવે. આ બધું ટ્રમ્પ કરી રહ્યા છે; મારે તેની સાથે કોઈ લેવાદેવા નથી."