પ્રશાંત કિશોરે શરૂ કરી રાજકીય પાર્ટી, નામ આપ્યું 'જન સૂરજ પાર્ટી'

બિહારના રાજકારણમાં એક નવી પાર્ટીનો પ્રવેશ થયો છે. છેલ્લા બે વર્ષથી જન સૂરજ અભિયાન હેઠળ રાજ્યભરમાં પદયાત્રા કરી રહેલા પ્રશાંત કિશોર ઉર્ફે પીકેએ પોતાના સંગઠનને રાજકીય પક્ષમાં ફેરવી દીધું છે. પીકેની નવી પાર્ટીનું નામ જન સૂરજ પાર્ટી રાખવામાં આવ્યું છે.

પટનામાં વેટરનરી કોલેજ ગ્રાઉન્ડમાં જન સૂરજ પાર્ટીની રચના માટે એક કાર્યક્રમનું આયોજન કરવામાં આવ્યું છે. જન સૂરજ સાથે જોડાયેલા રાજ્યભરમાંથી લોકો પટનામાં એકઠા થયા છે. સભા સ્થળે એક અનોખો સ્ટેજ બનાવવામાં આવ્યો છે, જેના પર 5000 લોકો બેસી શકે તેવી વ્યવસ્થા છે. સ્ટેજ પર જામર લગાવવામાં આવ્યા છે, જેના કારણે મોબાઈલ ફોન કામ કરી રહ્યા નથી. પીકેની નવી પાર્ટીની રચના પહેલા સીતામઢીના પૂર્વ સાંસદ સીતારામ યાદવ અને પૂર્વ મંત્રી રઘુનાથ પાંડેની પુત્રવધૂ વિનીતા વિજય જન સૂરજમાં જોડાયા હતા.

X પર જુઓ

જન સૂરજ અભિયાન રાજકીય પક્ષ બનવાની સાથે તેના નેતા, નેતૃત્વ પરિષદ, બંધારણ અને અન્ય બાબતોની પણ થોડા સમયમાં જાહેરાત કરવામાં આવશે. 

પ્રશાંત કિશોર પહેલા જ સ્પષ્ટ કરી ચુક્યા છે કે તેઓ પાર્ટીનું નેતૃત્વ કરી રહેલા લોકોમાં રહેશે નહીં. તેમનો દાવો છે કે બિહારના એક કરોડ લોકો રાજકીય પક્ષ તરીકે જન સૂરજ બનાવવા જઈ રહ્યા છે. 2 ઓક્ટોબર, 2022થી પ્રશાંત કિશોર જન સૂરજ અભિયાન હેઠળ સમગ્ર બિહારમાં પદયાત્રા પર છે. તેમની પદયાત્રા અત્યાર સુધીમાં 17 જિલ્લામાં નીકળી છે. બે વર્ષમાં તેમણે લગભગ 5 હજાર કિલોમીટર ચાલીને 5500થી વધુ ગામડાઓની મુલાકાત લીધી હતી.