બસ્તરમાં જવાનો સાથે દિવાળી મનાવશે PM મોદી, કહ્યું- જ્યાં નક્સલવાદનો કહેર હતો ત્યાં હવે વિકાસની બહારી

પ્રધાનમંત્રી નરેન્દ્ર મોદી આ વર્ષે દિવાળીના પાવન પર્વ પર છત્તીસગઢના બસ્તરમાં સુરક્ષા દળોના જવાનો સાથે ઉજવણી કરશે. તેમણે સોશિયલ મીડિયા પ્લેટફોર્મ 'X' પર પોસ્ટ કરીને આ જાણકારી આપી હતી. PM મોદીએ બસ્તરમાં આવેલા પરિવર્તનનો ઉલ્લેખ કરતાં કહ્યું કે, એક સમયે જ્યાં નક્સલવાદનો કહેર હતો, ત્યાં આજે વિકાસની બહારી જોવા મળી રહી છે. PM મોદીએ પોતાની પોસ્ટમાં લખ્યું કે, દિવાળીના શુભ અવસર પર તેઓ દેશના બહાદુર સુરક્ષાકર્મીઓ સાથે પર્વની ઉજવણી કરવા બસ્તર જઈ રહ્યા છે. તેમણે દેશની સુરક્ષામાં તહેનાત જવાનોના બલિદાન, નિઃસ્વાર્થ સેવા અને રાષ્ટ્ર પ્રત્યેના અતૂટ સમર્પણને નમન કરવાની વાત પણ કહી હતી. બસ્તર અને આસપાસના વિસ્તારોમાં છેલ્લા કેટલાક સમયથી નક્સલવાદ સામે સુરક્ષા દળોની કાર્યવાહી તેજ કરવામાં આવી છે. સાથે જ આ વિસ્તારોમાં વિકાસનાં કામોને પણ પ્રાથમિકતા આપવામાં આવી રહી છે. PM મોદીનો આ પ્રવાસ સુરક્ષાકર્મીઓનું મનોબળ વધારવાની સાથે બસ્તરમાં આવેલા પરિવર્તનને પણ ઉજાગર કરશે.

દર વર્ષે જવાનો સાથે દિવાળીની ઉજવણી

PM મોદી વર્ષ 2014થી સતત સુરક્ષા દળોના જવાનો સાથે દિવાળીની ઉજવણી કરતા આવ્યા છે. વર્ષ 2014માં તેમણે સિયાચીનમાં, 2015માં પંજાબના અમૃતસરમાં, 2016માં હિમાચલ પ્રદેશના સુમદોમાં અને 2017માં જમ્મુ-કાશ્મીરની ગુરેઝ ખીણમાં જવાનો સાથે દિવાળી મનાવી હતી. ત્યારબાદ 2018માં હર્ષિલ, 2019માં રાજૌરી, 2020માં રાજસ્થાનના લોંગેવાલા, 2021માં નૌશેરા, 2022માં કારગિલ, 2023માં હિમાચલ પ્રદેશના લેપ્ચા અને 2024માં ગુજરાતના કચ્છમાં જવાનો સાથે દિવાળીની ઉજવણી કરી હતી. જ્યારે 2025માં તેમણે ગોવા અને કારવાર નજીક INS વિક્રાંત પર નૌકાદળના જવાનો સાથે દિવાળી મનાવી હતી. આ વર્ષે બસ્તરની પસંદગી કરીને PM મોદી ફરી એકવાર દેશની સરહદો અને આંતરિક સુરક્ષામાં તહેનાત જવાનો સાથે તહેવારની ખુશીઓ વહેંચશે.