VIDEO: ANDARNI VAAT / બસ્તરમાં નક્સલી આતંકનો અંત, વર્ષો પછી વિસ્થાપિત પરિવારોની થઈ વતન વાપસી!

છત્તીસગઢના બસ્તર પ્રદેશના જગદલપુર જિલ્લામાંથી આંતરિક સુરક્ષા અને સામાજિક પરિવર્તનનો એક અત્યંત સકારાત્મક અહેવાલ સામે આવ્યો છે.. બસ્તરના નક્સલ પ્રભાવિત વિસ્તારોમાં સુરક્ષા દળોના અથાક પ્રયાસો અને સઘન અભિયાનોને કારણે નક્સલી આતંક અને ભયમાં નોંધપાત્ર ઘટાડો થયો છે. આ શાંતિપૂર્ણ વાતાવરણ સર્જાતા વર્ષો પહેલાં નક્સલી ધમકીઓ અને હિંસાના ડરથી પોતાના ઘરબાર છોડીને પલાયન કરી ગયેલા વિસ્થાપિત પરિવારો હવે સુરક્ષિત રીતે પોતાના વતન પરત ફરી રહ્યા છે. કોલેંગ અને છીંગુર જેવા અંતરિયાળ ગામોના સ્થાનિક રહીશો સોભરામ સેઠિયા અને ફુલદેવ ઠાકુર સહિતના ગ્રામજનોએ ભારે હર્ષ અને આંસુઓ સાથે પોતાના જૂના આશરાઓમાં પુન પ્રવેશ કર્યો છે. વતન પરત ફરેલા આ પરિવારોના ચહેરા પર વર્ષોની ભટકતી જિંદગી પછી સ્થિર થવાનો સંતોષ અને ખુશી સ્પષ્ટપણે જોઈ શકાય છે..

આ ઐતિહાસિક સામાજિક ઘરવાપસી અંગે બસ્તરના કલેક્ટર આકાશ છીકરાએ માહિતી આપતા જણાવ્યું કે, વહીવટી તંત્ર પરત ફરેલા તમામ વિસ્થાપિત પરિવારોના પુનર્વસન માટે સંપૂર્ણપણે પ્રતિબદ્ધ છે. પ્રશાસન દ્વારા આ પરિવારોને રેશનકાર્ડ, પાકા મકાન, પીવાનું શુદ્ધ પાણી, વીજળી અને રોજગારી જેવી પાયાની તમામ સુવિધાઓ ત્વરિત ધોરણે પૂરી પાડવામાં આવી રહી છે જેથી તેઓ નવેસરથી સન્માનજનક જીવન શરૂ કરી શકે. લોકશાહી અને વિકાસ પર લોકોનો વિશ્વાસ ફરી મજબૂત થઈ રહ્યો છે અને વર્ષોથી વેરાન બનેલા ગામડાઓ હવે ફરીથી ધમધમવા લાગ્યા છે. નક્સલવાદના અંધકારને માત આપીને શાંતિ અને વિકાસના પંથે આગળ વધી રહેલા બસ્તરનું આ નવું ચિત્ર દેશભરમાં શાંતિ પ્રક્રિયાના એક ઉત્કૃષ્ટ મોડેલ તરીકે પ્રશંસા પામી રહ્યું છે..

બ્યૂરો રિપોર્ટ જીએસટીવી