'આ મારું કે તમારું નહીં, ગૃહનું અપમાન', વિપક્ષના વોકઆઉટ પર બગડ્યા રાજ્યસભા અધ્યક્ષ

PM મોદીના ભાષણ વખતે વિપક્ષે રાજ્યસભામાંથી વોકઆઉટ કર્યું છે. જણાવી દઈએ કે, પીએમ મોદી રાષ્ટ્રપતિ અભિભાષણ પર ધન્યવાદ ભાષણ આપી રહ્યા હતા.એ દરમિયાન વિપક્ષે વેલીમાં આવીને પીએમ મોદીનો વિરોધ નોંધાવ્યો હતો. 

જ્યારે પીએમ મોદી રાજ્યસભામાં રાષ્ટ્રપતિના અભિભાષણ પર આભાર પ્રસ્તાવ પર બોલી રહ્યા હતા ત્યારે વિપક્ષી સાંસદોએ વિરોધ દર્શાવતા સૂત્રોચ્ચાર કર્યા અને વોકઆઉટ કર્યો. વિપક્ષી સાંસદોનું કહેવું છે કે વિપક્ષના નેતાને બોલવા દેવાયા નહોતા. તેમને બોલવા દેવા જોઈએ. 

વિપક્ષના આક્ષેપ અંગે રાજ્યસભા અધ્યક્ષ જગદીપ ધનખરે કહ્યું કે, મેં વિપક્ષના નેતા મલ્લિકાર્જુન ખડગેને કોઈપણ પ્રતિબંધ વિના બોલવાની તક આપી. આજે તેમણે ગૃહ છોડ્યું નથી, પરંતુ ગૌરવ છોડી દીધું છે. અધ્યક્ષ જગદીપ ધનખરે વોકઆઉટની નિંદા કરતા કહ્યું કે 'આનાથી દેશના 140 કરોડ લોકોને નુકસાન થશે. આજે તેઓએ ગૃહ નથી છોડ્યું, મર્યાદા છોડી દીધી છે. આ અમારું કે તમારું અપમાન નથી, આ ગૃહનું અપમાન છે. તેઓ મને પીઠ દેખાડીને નથી ગયા, પણ ભારતના બંધારણને પીઠ બતાવી છે. હું ખૂબ જ દુઃખી છું, ભારતના બંધારણનું આટલું અપમાન, આટલી મોટી મજાક. મને આશા છે કે તેઓ આત્મમંથન કરશે.'

હું તમારી પીડા સમજી શકું છું

વિપક્ષના વોકઆઉટ પર જ્યારે રાજ્યસભાના અધ્યક્ષે તેને સંસદીય પરંપરાનું અપમાન ગણાવ્યું ત્યારે વડાપ્રધાન નરેન્દ્ર મોદીએ કહ્યું, 'હું તમારી પીડા સમજી શકું છું, 140 કરોડ દેશવાસીઓએ જે જનાદેશ આપ્યો છે, આ લોકો તેને પચાવી શકતા નથી. ગઈકાલે તેના તમામ પ્રયત્નો નિષ્ફળ ગયા હતા, તો આજે તેમનામાં લડવાની હિંમત પણ ન હતી, તેથી તેઓ મેદાન છોડીને ભાગી ગયા હતા.'

મેદાન છેડીને ભાગવું જ તેમના નસીબમાં લખ્યું છે

રાજ્યસભામાં ભારે હોબાળા બાદ વિપક્ષે વોકઆઉટ કર્યું હતું. જેના પર વડાપ્રધાન મોદીએ કહ્યું , ' આ ગૃહનું અપમાન છે. દેશની જનતાએ તેમને દરેક રીતે એટલી હદે હરાવ્યા છે કે હવે તેમની પાસે શેરીઓમાં ચીસો પાડવા સિવાય કંઈ બચ્યું નથી. સૂત્રોચ્ચાર કરવો, હોબાળો કરવો અને મેદાનમાંથી ભાગી જવું એમના નસીબમાં લખેલું છે.'

આવનારા 5 વર્ષ ગરીબી સામેની લડાઈમાં નિર્ણાયક વર્ષ હશે 

વડાપ્રધાન નરેન્દ્ર મોદીએ કહ્યું કે અહીં કેટલાક લોકો બેઠા છે જે કહે છે કે આમાં શું છે, આ તો થવાનું જ છે. તેઓ ઓટો પાયલોટ મોડમાં સરકાર ચલાવવા માટે ટેવાયેલા છે, રાહ જોવામાં માને છે. અમે સખત મહેનતમાં માનીએ છીએ. આવનારા પાંચ વર્ષ મૂળભૂત સુવિધાઓના સંતૃપ્તિના છે. સામાન્ય માનવતાઓને ગૌરવપૂર્ણ જીવન જીવવા માટે જરૂરી છે. અમે તે પ્રકારનું શાસન પ્રદાન કરીશું. આવનારા પાંચ વર્ષ ગરીબી સામેની લડાઈમાં નિર્ણાયક વર્ષ છે. ગરીબી સામેની લડાઈમાં આ દેશનો વિજય થશે, હું 10 વર્ષના અનુભવના આધારે ખૂબ જ આત્મવિશ્વાસ સાથે કહી રહ્યો છું. જ્યારે દેશ વિશ્વની ત્રીજી સૌથી મોટી અર્થવ્યવસ્થા બની જશે, ત્યારે તેની અસર જીવનના દરેક ક્ષેત્ર પર પડશે. વિસ્તરણ અને વિકાસની ઘણી તકો ઉપલબ્ધ થવાની છે.

વડાપ્રધાન મોદીએ આજે રાજ્યસભામાં રાષ્ટ્રપતિ અભિભાષણ પર જવાબ આપતા કહ્યું કે, હું કોંગ્રેસના કેટલાક સાથીઓનો હૃદયપૂર્વક આભાર વ્યક્ત કરવા માંગુ છું, કારણ કે જ્યારથી પરિણામો આવ્યા અમારા એક સાથીદાર તરફથી હું જોઈ રહ્યો હતો કે, તેમની પાર્ટી તેમને સમર્થન આપતી ન હોવા છતાં એકલા ઝંડો લઈને ફરી રહ્યા હતા. તેઓ જે કહેતા હતા તેમના મોંમાં ઘી શક્કર. તેઓ વારંવાર એક તૃતિયાંશ સરકારના ઢોલ વગાડતા હતા.આપણે 10 વર્ષ પૂરા કર્યા છે. હજુ 20 વર્ષ બાકી છે. અત્યારે માત્ર એક તૃતીયાંશ જ થયું છે. બે તૃતીયાંશ હજુ બાકી છે. એવું માનવામાં આવે છે કે પીએમ મોદી જયરામ રમેશનો ઉલ્લેખ કરી રહ્યા હતા, જે એનડીએ સરકારને એક તૃતીયાંશ કહીને સંબોધતા જોવા મળ્યા હતા.