‘CJPને ક્યારેય સમર્થન નહીં આપું, તેમનો એજન્ડા અલગ છે’: અન્નામલાઈના નિવેદનથી રાજકીય ગરમાવો

ભાજપના પૂર્વ તમિલનાડુ પ્રદેશ અધ્યક્ષ કે. અન્નામલાઈએ કોકરોચ જનતા પાર્ટી (CJP) સાથેના વિવાદ વચ્ચે સ્પષ્ટતા કરી છે કે તેઓ આ સંગઠનને ક્યારેય સમર્થન આપશે નહીં, કારણ કે બંનેના એજન્ડા અલગ છે. જોકે, તેમણે લોકશાહીમાં દરેક રાજકીય પક્ષને વિરોધ કરવાનો અધિકાર હોવાનું પણ જણાવ્યું હતું. CJPના વિરોધ પ્રદર્શન સામે પોલીસની કાર્યવાહી પર કેન્દ્ર સરકારની ટીકા કર્યા બાદ અન્નામલાઈના નિવેદનથી રાજકીય ચર્ચા વધુ તેજ બની છે.

ગુરુવારે તેમના ‘વી ધ લીડર્સ’ (We the Leaders) આંદોલનના કાર્યક્રમમાં બોલતાં અન્નામલાઈએ કેન્દ્ર સરકારની કાર્યવાહી પર સવાલ ઉઠાવ્યા હતા. સાથે જ તેમણે વડાપ્રધાન નરેન્દ્ર મોદીનાં કામનાં વખાણ પણ કર્યાં હતાં. જોકે, તેમણે સ્પષ્ટ કર્યું કે વડાપ્રધાનને સમર્થન આપવાનો અર્થ સરકારની દરેક બાબત સાથે સહમત થવું નથી.

‘CJPનો એજન્ડા અલગ, અમારો રસ્તો અલગ’

અન્નામલાઈએ કહ્યું હતું કે તેઓ ક્યારેય કોકરોચ જનતા પાર્ટીને સમર્થન આપશે નહીં. તેમનો અને CJPનો એજન્ડા અલગ છે. જોકે, લોકશાહીમાં દરેક રાજકીય પક્ષને પોતાના વિચારો રજૂ કરવા અને સરકારનો વિરોધ કરવાનો અધિકાર છે.

નોંધનીય છે કે અન્નામલાઈએ આ વર્ષની શરૂઆતમાં ભાજપ છોડીને પોતાની રાજકીય પહેલ શરૂ કરી હતી. અગાઉ તેઓ ભારતીય પોલીસ સેવા (IPS)ના અધિકારી પણ રહી ચૂક્યા છે. તેમના સ્પષ્ટવક્તા અંદાજને કારણે તેઓ વારંવાર રાજકીય ચર્ચામાં રહે છે.

CJPના પ્રદર્શન પર પોલીસ કાર્યવાહી સામે ઉઠાવ્યા સવાલ

10 ઑક્ટોબરે મુખ્ય ચૂંટણી કમિશનર (CEC) જ્ઞાનેશ કુમારના રાજીનામાની માગ સાથે CJPના કાર્યકરોએ વિરોધ પ્રદર્શન કર્યું હતું. આ દરમિયાન પોલીસની કાર્યવાહી અને અટકાયતને લઈને અન્નામલાઈએ સવાલો ઉઠાવ્યા હતા. તેમણે કહ્યું હતું કે જો પ્રદર્શનકારીઓએ કોઈ ગેરકાયદે કામ કર્યું હોય, તો તેમની સામે કાયદા અને યોગ્ય પ્રક્રિયા પ્રમાણે કાર્યવાહી થવી જોઈએ.

અન્નામલાઈએ દેશભક્તિના મુદ્દે પણ પોતાની વાત સ્પષ્ટ કરતાં કહ્યું કે તેમને કોઈએ દેશભક્તિનો પાઠ ભણાવવાની જરૂર નથી. દેશની એકતા અને અખંડિતતાને લઈને તેમને વિવિધ રાજ્યોમાં કામ કરવાનો અનુભવ છે.

તેમણે વધુમાં કહ્યું કે જો દેશની સાર્વભૌમત્વ સામે ખતરો હોય તો ગુપ્તચર બ્યુરો (IB) અને રિસર્ચ એન્ડ એનાલિસિસ વિંગ (RAW) જેવી સંસ્થાઓનો ઉપયોગ કરીને કાયદા મુજબ કાર્યવાહી કરવી જોઈએ. સોશિયલ મીડિયા પ્લેટફોર્મ X પર માત્ર આરોપો ઊભા કરીને દુશ્મનો ઊભા કરવા યોગ્ય નથી, એવો પણ તેમણે મત વ્યક્ત કર્યો હતો.

મોદી સરકારનાં વખાણ, પરંતુ ખોટી બાબતો સામે સવાલો

અન્નામલાઈએ વડાપ્રધાન નરેન્દ્ર મોદીનાં કામનાં વખાણ કરતાં તેમને સારા વડાપ્રધાન ગણાવ્યા હતા. જોકે, તેમણે સ્પષ્ટ કર્યું કે વડાપ્રધાનને સમર્થન આપતા હોવા છતાં તેમને ખોટી લાગતી બાબતો સામે સવાલો ઉઠાવવામાં તેઓ ખચકાશે નહીં.

તેમણે એમ પણ કહ્યું કે ચૂંટણી પંચ અને સુપ્રીમ કોર્ટ જેવી લોકશાહી સંસ્થાઓ પર લોકોનો વિશ્વાસ નબળો પાડવાના પ્રયાસો સ્વીકાર્ય નથી. આમ, CJPના વિરોધના અધિકારનો બચાવ કરવાની સાથે તેમણે લોકશાહી સંસ્થાઓની વિશ્વસનીયતા જાળવવાની જરૂરિયાત પર પણ ભાર મૂક્યો હતો.

ભાજપ અને અન્નામલાઈ વચ્ચે શાબ્દિક જંગ તેજ

અન્નામલાઈ અને તેમના પૂર્વ પક્ષ ભાજપ વચ્ચેના નિવેદનયુદ્ધ વચ્ચે આ ટિપ્પણીઓ સામે આવી છે. આ પહેલાં તેમણે CJPની વિરોધ કરવાની પદ્ધતિને ‘ગેરમાર્ગે દોરાયેલી’ ગણાવી હતી, પરંતુ સંગઠનને સરકારનો વિરોધ કરવાનો અધિકાર હોવાનું કહ્યું હતું. CJPના નેતાઓ સૌરવ દાસ અને આશુતોષ રંકાની અટકાયત અંગે પણ તેમણે સવાલો ઉઠાવ્યા હતા.

અન્નામલાઈએ 2011માં ગુજરાતના તત્કાલીન મુખ્યમંત્રી તરીકે નરેન્દ્ર મોદીએ ભ્રષ્ટાચાર વિરોધી પ્રદર્શનકારીઓ સામેની પોલીસ કાર્યવાહી અંગે આપેલા નિવેદનનો પણ ઉલ્લેખ કર્યો હતો. તેમના જણાવ્યા અનુસાર, તે સમયે મોદીએ રામલીલા મેદાનમાં પ્રદર્શનકારીઓ સામેની કાર્યવાહીનો વિરોધ કરવા દિલ્હી જવાની અને કેન્દ્ર સામે લડવાની વાત કરી હતી. અન્નામલાઈએ સવાલ કર્યો હતો કે ત્યારે જે પ્રકારની ટીકા યોગ્ય ગણાતી હતી, તેવી જ ટીકા આજે થાય ત્યારે અટકાયત અને ધરપકડ કેમ થાય છે?

‘ભાજપ CJPનો વિરોધ કરે છે કે મફત પ્રસિદ્ધિ આપે છે?’

અન્નામલાઈએ ભાજપની રણનીતિ પર પણ સવાલ ઉઠાવ્યો હતો. દિલ્હીના રામલીલા કાર્યક્રમમાં દશેરા દરમિયાન કોકરોચનું પૂતળું બાળવામાં આવ્યું હોવાનો ઉલ્લેખ કરતાં તેમણે પૂછ્યું હતું કે ભાજપ ખરેખર CJPનો વિરોધ કરી રહી છે કે પછી તેને મફત પ્રસિદ્ધિ આપી રહી છે? આ કાર્યક્રમ ભાજપના ધારાસભ્ય અશોક ગોયલના નેતૃત્વ હેઠળ યોજાયો હોવાનું અહેવાલમાં જણાવાયું છે.

તેમણે એવો પણ આરોપ લગાવ્યો કે સત્તામાં 12 વર્ષ રહ્યા બાદ ભાજપ જાણે પોતાના માટે દુશ્મનો ઊભા કરવાનો પ્રયાસ કરી રહી છે.

તમિલનાડુ ભાજપે પણ આપ્યો જવાબ

અન્નામલાઈના નિવેદન બાદ તમિલનાડુ ભાજપના પ્રવક્તા નારાયણન તિરુપતિએ તેમની ટીકા કરી હતી. તેમણે કહ્યું કે અન્નામલાઈના સવાલોથી શાંતિપૂર્ણ વિરોધ પ્રદર્શન અને જાણીજોઈને કાયદાનો ભંગ કરવા વચ્ચેની રેખા ધૂંધળી થઈ શકે છે.

તિરુપતિએ એમ પણ જણાવ્યું કે અન્નામલાઈએ જૂન 2026માં ભાજપ છોડી દીધો હતો અને હવે તેઓ પક્ષની ટીકા કરવા માટે સ્વતંત્ર છે. આ નિવેદનોથી CJPના વિરોધ પ્રદર્શન, પોલીસની કાર્યવાહી અને ભાજપની રાજકીય રણનીતિ અંગેનો વિવાદ વધુ ચર્ચામાં આવ્યો છે.