Video: સુવર્ણ અક્ષરોમાં લખાયા 700 શહીદોના નામ: અંબાલામાં ગૃહમંત્રી અમિત શાહે દેશને અર્પણ કર્યું અદભુત સ્મારક

કેન્દ્રીય ગૃહમંત્રી અમિત શાહે હરિયાણાના અંબાલા કેન્ટ ખાતે ૧૮૫૭ના પ્રથમ સ્વાતંત્ર્ય સંગ્રામના વીર શહીદોની સ્મૃતિમાં નવનિર્મિત ભવ્ય શહીદ સ્મારક અને મ્યુઝિયમનું લોકાર્પણ કર્યું છે. આ પ્રસંગે જાહેર જનસભાને સંબોધતા ગૃહમંત્રીએ જણાવ્યું હતું કે, આ ઐતિહાસિક સ્મારક સમગ્ર દેશના યુવાનો અને કિશોરો માટે દેશભક્તિ અને રાષ્ટ્રપ્રેમનું અખૂટ પ્રેરણાસ્ત્રોત સાબિત થશે.

અમિત શાહે ભારતીય સૈન્યમાં હરિયાણાના વિશિષ્ટ યોગદાનને બિરદાવતા કહ્યું કે, "આજે હરિયાણા ભૌગોલિક કદની દ્રષ્ટિએ ભલે નાનું રાજ્ય હોય, પરંતુ ભારતીય સેનામાં સૌથી વધુ જવાનો મોકલવામાં તે દેશભરમાં મોખરે છે. સરહદોની રક્ષા હોય કે રાષ્ટ્રની સુરક્ષા, હરિયાણાના વીર જવાનો હંમેશા અગ્રેસર રહ્યા છે."

૧૮૫૭ના ક્રાંતિવીરોની વીરગાથાને જીવંત કરતું સ્મારક

અંદાજે ₹૮૦૦ કરોડના ખર્ચે ૨૨ એકરમાં તૈયાર કરાયેલા આ સ્મારકમાં ૧૮૫૭ના પ્રથમ સ્વતંત્રતા સંગ્રામના ૭૦૦થી વધુ અનામી અને અમર નાયકોના નામ સુવર્ણ અક્ષરોમાં અંકિત કરવામાં આવ્યા છે. ગૃહમંત્રીએ ઉમેર્યું કે ૧૮૫૭ના શહીદોના સર્વોચ્ચ બલિદાનના પાયા પર જ આજે 'વિકસિત ભારત'નું સપનું સાકાર થઈ રહ્યું છે, અને આવા નાયકોનું સન્માન કરવું એ દરેક ભારતીયની નૈતિક ફરજ છે. આ કાર્યક્રમમાં કેન્દ્રીય મંત્રી મનોહર લાલ ખટ્ટર, હરિયાણાના મુખ્યમંત્રી નાયબ સિંહ સૈની અને કેબિનેટ મંત્રી અનિલ વિજ સહિતના વરિષ્ઠ આગેવાનો ઉપસ્થિત રહ્યા હતા.