મોદી સરકારની વિદેશ નીતિ ફરી રંગ લાવી, ઈરાને 5 ભારતીય ખલાસીઓને કર્યા મુક્ત 

ઈરાનમાં ભારતીય દૂતાવાસે જણાવ્યું હતું કે તેહરાન દ્વારા જપ્ત કરવામાં આવેલા ઈઝરાયેલી માલિકીના જહાજ (MSC Aries) પર સવાર પાંચ ભારતીય ખલાસીઓને ગુરુવારે મુક્ત કરવામાં આવ્યા હતા અને તેઓ ઈરાન છોડી ગયા છે. રાજદ્વારી સફળતામાં, ઈરાન દ્વારા જપ્ત કરવામાં આવેલા ઈઝરાયેલ સંબંધિત જહાજમાં સવાર પાંચ ભારતીય ખલાસીઓને ગુરુવારે મુક્ત કરવામાં આવ્યા હતા. ઈરાનમાં ભારતીય દૂતાવાસે આ જાણકારી આપી છે. તેમની મુક્તિની વિગતો શેર કરતી વખતે, ભારતીય દૂતાવાસે બંદર અબ્બાસમાં દૂતાવાસ અને ભારતીય વાણિજ્ય દૂતાવાસ સાથે સંકલન માટે ઈરાની સત્તાવાળાઓનો આભાર માન્યો.

ઈઝરાયલનું કાર્ગો જહાજ ઈરાન દ્વારા 13 એપ્રિલે જપ્ત કરવામાં આવ્યું હતું, જેમાં 17 ભારતીય નાગરિકો સવાર હતા. ઈરાનના ઈસ્લામિક રિવોલ્યુશનરી ગાર્ડ કોર્પ્સ નેવીએ સ્ટ્રેટ ઓફ હોર્મુઝ નજીક કન્ટેનર જહાજને જપ્ત કર્યું છે. MSC Ariesને છેલ્લે 12 એપ્રિલે દુબઈના દરિયાકાંઠે સ્ટ્રેટ ઓફ હોર્મુઝ તરફ જતું  જોવા મળ્યું  હતું. 

આ પહેલા કેરળના થ્રિસુરની એન ટેસા જોસેફ 18 એપ્રિલે સુરક્ષિત રીતે પોતાના દેશમાં પરત આવી હતી. વિદેશ મંત્રાલયે કહ્યું હતું કે 17 ભારતીય ક્રૂ સભ્યોમાંથી એક સુરક્ષિત રીતે ભારત પરત ફરી છે અને અન્ય સુરક્ષિત છે.

ભારતમાં ઈરાનના રાજદૂત ઈરાજ ઈલાહીએ પણ કહ્યું કે MSC Ariesના ક્રૂ મેમ્બર્સમાં સામેલ ભારતીય નાગરિકોની અટકાયત કરવામાં આવી નથી. તેઓ જવા માટે મુક્ત છે.

કન્ટેનર જહાજને જપ્ત કર્યાના પગલે, વિદેશ પ્રધાન એસ જયશંકરે તેમના ઈરાનના સમકક્ષ હોસેન અમીર-અબ્દોલ્લાહિયન સાથે વાત કરી, 17 ભારતીય ક્રૂ સભ્યોની મુક્તિનો મુદ્દો ઉઠાવ્યો.  અમીરાબ્દોલ્લાહિયાને જણાવ્યું હતું કે, "જહાજએ ઈરાનના પ્રાદેશિક પાણીમાં તેનું રડાર બંધ કરી દીધું હતું અને નેવિગેશનની સલામતીને જોખમમાં મૂક્યું હતું. તેમને ન્યાયિક નિયમો હેઠળ અટકાયતમાં લેવામાં આવ્યું હતું."