‘દેશમાં અનેક ચૂંટણીઓ ચોરાઈ છે’, SIR વિવાદ વચ્ચે સોનિયા ગાંધીનો મોદી સરકાર પર આકરો પ્રહાર

કોંગ્રેસ સંસદીય પક્ષનાં અધ્યક્ષ સોનિયા ગાંધીએ કેન્દ્રની નરેન્દ્ર મોદી સરકાર પર આકરા પ્રહાર કરતાં આક્ષેપ કર્યો છે કે છેલ્લા 12 વર્ષમાં દેશની લોકશાહી (Democracy), સંસ્થાઓ અને સામાજિક માળખાને મોટું નુકસાન થયું છે. તેમણે દાવો કર્યો કે તાજેતરના મહિનાઓમાં અનેક ચૂંટણીઓમાં ગેરરીતિઓ થઈ હોવાના પુરાવા સામે આવ્યા છે અને હવે લોકો પણ આ બાબતને સમજવા લાગ્યા છે. આ નિવેદન મતદાર યાદીઓના ખાસ સઘન પુનરીક્ષણ (Special Intensive Revision - SIR)ને લઈને ચાલી રહેલા રાજકીય વિવાદ વચ્ચે આવ્યું છે. 

ચૂંટણી પંચ અને મીડિયા પર સરકારના નિયંત્રણનો આક્ષેપ

એક અંગ્રેજી અખબારને આપેલા ઇન્ટરવ્યૂમાં સોનિયા ગાંધીએ કહ્યું કે ભાજપ સરકાર સત્તામાં આવ્યા બાદથી કોંગ્રેસ અને અન્ય વિપક્ષી પક્ષોને સમાન રાજકીય તક (Level Playing Field) મળી નથી. તેમણે આક્ષેપ કર્યો કે સરકારનું વિવિધ સંસ્થાઓ પર, ખાસ કરીને ચૂંટણી પંચ (Election Commission), પ્રભાવશાળી નિયંત્રણ છે. આ ઉપરાંત મુખ્ય પ્રવાહના મીડિયા (Mainstream Media), નાણાકીય શક્તિ અને ધર્મના રાજકીય ઉપયોગ અંગે પણ તેમણે સવાલો ઉઠાવ્યા હતા. સોનિયા ગાંધીએ કહ્યું કે છેલ્લા 12 વર્ષમાં દેશની લોકશાહી અને સંસ્થાઓને થયેલું નુકસાન સુધારવામાં સમય લાગશે. વર્તમાન સરકાર સત્તામાંથી જશે ત્યાર બાદ પણ સંસ્થાઓને ફરી મજબૂત બનાવવા માટે રાજકીય પક્ષોએ લાંબા સમય સુધી પ્રયત્નો કરવા પડશે. જોકે, તેમણે આશાવાદ વ્યક્ત કરતાં કહ્યું કે લોકો હવે આ નુકસાનને ઓળખી રહ્યા છે અને દેશમાં ફરી યોગ્ય શાસન (Good Governance)ની અપેક્ષા રાખે છે. 

કોંગ્રેસની લડત ચાલુ હોવાનો દાવો

કોંગ્રેસની રાજકીય સ્થિતિ અને ભવિષ્ય અંગે પૂછાયેલા સવાલના જવાબમાં સોનિયા ગાંધીએ નિરાશા વ્યક્ત કરવાનો ઇનકાર કર્યો હતો. તેમણે કહ્યું કે પડકારો હોવા છતાં કોંગ્રેસ સતત લડી રહી છે અને પક્ષના કાર્યકરો તથા નેતાઓએ અનેક પ્રકારના દબાણ અને મુશ્કેલીઓનો સામનો કર્યો છે. તેમ છતાં દેશના ગામડાં અને જિલ્લાઓમાં કોંગ્રેસના કાર્યકરો બંધારણનાં મૂલ્યો માટે લડત આપી રહ્યા છે.  તેમણે વધુમાં જણાવ્યું કે કોંગ્રેસ સમાન વિચારધારા ધરાવતા પક્ષો (Like-minded Parties) સાથે મળીને કામ કરી રહી છે અને પક્ષની ચૂંટણીલક્ષી સંભાવનાઓ (Electoral Prospects) દિવસેને દિવસે સુધરી રહી છે. 

ભાજપે ઇમરજન્સીનો ઉલ્લેખ કરી વળતો જવાબ આપ્યો

સોનિયા ગાંધીના નિવેદન બાદ ભાજપે પણ વળતો પ્રહાર કર્યો હતો. કેન્દ્રીય કાયદા મંત્રી અર્જુન રામ મેઘવાલે સવાલ કર્યો કે શું સોનિયા ગાંધી ઇમરજન્સી (Emergency)નો સમય ભૂલી ગયાં છે? તેમણે યાદ અપાવ્યું કે તે દરમિયાન વિવિધ રાજકીય પક્ષોના હજારો નેતાઓને જેલમાં ધકેલવામાં આવ્યા હતા અને પત્રકારોના અવાજને દબાવવામાં આવ્યા હતા. ઉલ્લેખનીય છે કે સોનિયા ગાંધીનાં પુસ્તક ‘Belonging: A Journey of Love’નું પ્રકાશન 10 નવેમ્બરે થવાનું છે. આ પુસ્તકના પ્રકાશન પહેલાં આપેલા ઇન્ટરવ્યૂમાં તેમણે મોદી સરકારની નીતિઓ, લોકશાહી સંસ્થાઓ અને કોંગ્રેસના રાજકીય ભવિષ્ય અંગે પોતાનો અભિપ્રાય રજૂ કર્યો છે.