CRPFની મોટી સિદ્ધિ: સતત 12 સુધી ઓપરેશનમાં એક પણ જવાનનું મૃત્યુ નહીં, 47 વર્ષનો રેકોર્ડ તૂટ્યો!
કેન્દ્રીય રિઝર્વ પોલીસ બળ (CRPF)એ પોતાના ઇતિહાસમાં એક મોટી સિદ્ધિ હાંસલ કરી છે. દેશના અલગ-અલગ સંવેદનશીલ વિસ્તારોમાં તૈનાતી હોવા છતાં, ફોર્સે સતત 12 મહિના એવા પૂરા કર્યા છે જેમાં કોઈ જવાનનું ઓપરેશનલ મૃત્યુ થયું નથી. CRPFના ઇતિહાસમાં લગભગ 47 વર્ષ પછી આવો રેકોર્ડ બન્યો છે. CRPFના મહાનિર્દેશક (DG) જી.પી. સિંહે સોમવારે આ અંગેની જાણકારી આપી હતી.
CRPFના ડીજી જ્ઞાનેન્દ્ર પ્રતાપ સિંહે પોતાના સોશિયલ મીડિયા પ્લેટફોર્મ ‘એક્સ’ પર એક પોસ્ટમાં લખ્યું, ‘CRPFના ઇતિહાસમાં એક મહત્વપૂર્ણ સીમાચિહ્ન - સતત એક વર્ષ એવું વીત્યું છે જ્યારે ફોર્સમાં કોઈ ઓપરેશનલ મૃત્યુના સમાચાર આવ્યા નથી. ફોર્સમાં છેલ્લું ઓપરેશનલ મૃત્યુ 30 ઓક્ટોબર 2025ના રોજ થયું હતું. આવું 47 વર્ષ પછી બન્યું છે, અગાઉ આ પ્રકારનો સમય જાન્યુઆરી 1979માં પૂરો થયો હતો.’
1947થી અત્યાર સુધી 2,268 જવાનોનાં ઓપરેશનલ મૃત્યુ
જી.પી. સિંહે પોતાની પોસ્ટમાં જણાવ્યું કે વર્ષ 1947થી અત્યાર સુધી CRPFના 2,268 જવાનો ઓપરેશન દરમિયાન શહીદ થયા છે, એટલે કે દર વર્ષે સરેરાશ 28થી વધુ જવાનોનાં મૃત્યુ થયા છે. જેમાં એક વર્ષમાં સૌથી વધુ 2010માં 143 જવાનોનાં મૃત્યુ થયા હતા, જેનું મુખ્ય કારણ માઓવાદી હુમલો હતો જેમાં 75 જવાનો શહીદ થયા હતા. ઉલ્લેખનીય છે કે, અગાઉ ફેબ્રુઆરી 1977 અને જાન્યુઆરી 1979 વચ્ચે 24 મહિના સુધી કોઈ ઓપરેશનલ મૃત્યુ થયું ન હતું.
‘મેડિકલ કેર આમાં મહત્વપૂર્ણ ભૂમિકા ભજવી શકે છે’
ડીજી જી.પી. સિંહે જણાવ્યું, ‘ગયા વર્ષે કરેગુટ્ટાલુ હિલ્સમાં ઓપરેશન બ્લેક ફોરેસ્ટ દરમિયાન એક પણ જાનહાનિ થઈ ન હતી, જ્યારે 21 નક્સલવાદીઓ માર્યા ગયા હતા.’ એક પોસ્ટ-એનાલિસિસમાં એવું જાણવા મળ્યું છે કે ત્રણ-ચતુર્થાંશથી ચાર-પાંચમા ભાગના મૃત્યુ ઈજા થયાના થોડા દિવસો પછી થાય છે. સમયસરની તબીબી સારવારથી આવા મૃત્યુને અટકાવી શકાય છે, જેમાં એર એમ્બ્યુલન્સ દ્વારા ખૂબ જ મદદ મળી રહી છે.
ડીજીએ આ સફળતાનો શ્રેય કોને આપ્યો?
CRPFના ડીજીએ આધુનિક હાર્ડવેર, ઉત્તમ તાલીમ, વ્યૂહાત્મક આયોજન (સ્ટ્રેટેજિક પ્લાનિંગ) અને ઘાયલ જવાનોને ઝડપથી તબીબી સુવિધાઓ સુધી પહોંચાડવાને આ સફળતાનો શ્રેય આપ્યો છે. તેમણે કહ્યું, ‘આ ખાસ કરીને એટલા માટે મહત્વપૂર્ણ છે કારણ કે આ ત્યારે થયું છે જ્યારે આપણે તમામ મોટા ઓપરેશનલ થિયેટરમાં તૈનાત છીએ અને મહત્વપૂર્ણ પરિણામો મેળવી રહ્યા છીએ. અમે દેશને તેના તમામ નાગરિકો માટે શાંતિપૂર્ણ અને સુરક્ષિત રાખવા માટે કટિબદ્ધ છીએ.’
