આગ્રામાં મોટી દુર્ઘટના: બેઝમેન્ટના બાંધકામ દરમિયાન દીવાલ થઈ ધરાશાયી, 7 લોકો કાટમાળમાં દબાયા
છેલ્લું અપડેટ : 21 Dec 2025
ઉત્તર પ્રદેશના આગ્રામાં એક મકાનના નિર્માણ કાર્ય દરમિયાન મોટી દુર્ઘટના સર્જાઈ હતી. બેઝમેન્ટ માટે ચાલી રહેલા ખોદકામ દરમિયાન અચાનક બાજુની દિવાલ ધરાશાયી થતા સાત લોકો કાટમાળ નીચે ફસાયા હતા. આ ઘટનાને પગલે વિસ્તારમાં અરેરાટી વ્યાપી ગઈ હતી.
દુર્ઘટના સર્જાતા જ આસપાસના લોકો ઘટનાસ્થળે દોડી આવ્યા હતા. પોલીસ અને પ્રશાસનની રાહ જોયા વિના સ્થાનિકોએ કાટમાળ હટાવવાનું કામ શરૂ કર્યું હતું અને કાટમાળ નીચે દબાયેલા તમામ સાત ઘાયલોને સુરક્ષિત બહાર કાઢ્યા હતા. તમામ ઇજાગ્રસ્તોને તાત્કાલિક નજીકના સામુદાયિક આરોગ્ય કેન્દ્ર (CHC) ખાતે ખસેડવામાં આવ્યા છે.
4 લોકોની હાલત અત્યંત નાજુક
હોસ્પિટલના તબીબોના જણાવ્યા અનુસાર, સારવાર હેઠળના સાત લોકોમાંથી ચારની હાલત ગંભીર છે. ગંભીર ઇજાગ્રસ્તોને હાલ સ્પેશિયલ ઓબ્ઝર્વેશન હેઠળ રાખવામાં આવ્યા છે અને જરૂર જણાયે તેમને હાયર સેન્ટર રિફર કરવાની તૈયારી પણ રાખવામાં આવી છે.
ઘટનાની જાણ થતા જ એસડીએમ બાહ અને પોલીસ કાફલો સ્થળ પર પહોંચી ગયો હતો. પ્રાથમિક તપાસમાં સામે આવ્યું છે કે, બેઝમેન્ટ માટે ઊંડું ખોદકામ કરવામાં આવી રહ્યું હતું. ખોદકામના કારણે પાયા નબળા પડતા ઉપરની દિવાલ ધસી પડી હતી. બાંધકામ દરમિયાન સુરક્ષાના નિયમોનું પાલન કરવામાં આવ્યું હતું કે નહીં તેની તપાસ શરૂ કરવામાં આવી છે. પોલીસે હાલ સમગ્ર વિસ્તારને કોર્ડન કરી લીધો છે અને બાંધકામ માલિક વિરુદ્ધ નિયમોના ઉલ્લંઘન બદલ તપાસ હાથ ધરી છે.
