રૂમમાં બંધ કરી પાસપોર્ટ છીનવ્યો, બિયર શોપમાં વેચી દીધી! પોર્ટુગલ પહોંચેલી ભારતીય મહિલાની દર્દનાક આપવીતી
છેલ્લું અપડેટ : 08 Aug 2026
પુણે: મહારાષ્ટ્રના નાગપુરની 28 વર્ષીય મહિલા સાથે વિદેશમાં નોકરી અપાવવાના નામે એક એવી ચોંકાવનારી ઘટના સામે આવી છે, જે સાંભળીને કોઈના પણ હોશ ઊડી જાય. પુણેની એક કન્સલ્ટન્સીએ (Consultancy) મહિલાને પોર્ટુગલમાં સારી નોકરી અને મોટા પગારના સપના બતાવ્યા હતા. પરંતુ વિદેશ પહોંચતા જ તેની જિંદગી નરક સમાન બની ગઈ હતી.
મહિલાને પોર્ટુગલ પહોંચતા જ કથિત રીતે એક બીયર શોપના માલિકને વેચી દેવામાં આવી હતી, જ્યાં તેની પાસે માનવ તસ્કરીનો (Human Trafficking) ભોગ બનાવીને જબરદસ્તીથી કામ કરાવવામાં આવ્યું અને શારીરિક તથા માનસિક ત્રાસ આપવામાં આવ્યો હતો.
₹1.5 લાખનો પગાર અને 8 કલાક કામની લાલચ (Job Trap)
મળતી માહિતી મુજબ આ મામલો ગયા મહિનાનો છે. મહિલાનો ઈન્સ્ટાગ્રામ (Instagram) દ્વારા પુણેની 'We Migrate' નામની કન્સલ્ટન્સી એજન્સી સાથે સંપર્ક થયો હતો. કંપનીના સંચાલકોએ તેને પોર્ટુગલમાં કેશિયરની (Cashier) નોકરી અપાવવાનો વિશ્વાસ આપ્યો હતો. તેને કહેવામાં આવ્યું હતું કે દર મહિને આશરે ₹1.5 લાખ પગાર મળશે અને દિવસમાં માત્ર 8 કલાક જ કામ કરવાનું રહેશે.
મહિલા તેમની જાળમાં ફસાઈ ગઈ હતી. વિઝા (Visa) અને અન્ય દસ્તાવેજો તૈયાર કરવાના નામે તેની પાસેથી અલગ-અલગ હપ્તામાં આશરે ₹11 લાખ પડાવી લેવામાં આવ્યા હતા.
પાસપોર્ટ છીનવી લીધો અને બે દિવસ બંધક બનાવી
જ્યારે મહિલા પોર્ટુગલ પહોંચી ત્યારે વાસ્તવિકતા તદ્દન અલગ હતી. આરોપ છે કે ત્યાં પહોંચતા જ એજન્ટોએ તેનો પાસપોર્ટ (Passport) છીનવી લીધો હતો અને તેને બે દિવસ સુધી એક રૂમમાં બંધક બનાવી રાખી હતી.
ત્યારબાદ મહિલાને પોર્ટુગલમાં એક બીયર શોપના માલિકને વેચી દેવામાં આવી હતી. ત્યાં તેની પાસે અમાનવીય રીતે બળજબરીથી કામ કરાવવામાં આવતું હતું. મહિલાએ જ્યારે આનો વિરોધ કર્યો અને પોતાનો પાસપોર્ટ પાછો માંગ્યો, ત્યારે તેને શારીરિક અને માનસિક યાતનાઓ આપવામાં આવી તથા પાસપોર્ટ આપવાના બદલે વધુ પૈસાની માંગણી કરવામાં આવી.
લગભગ એક મહિના સુધી આ ત્રાસ સહન કર્યા પછી મહિલાને ત્યાંથી ભાગવાનો મોકો મળ્યો. તે પહેલા બસ દ્વારા પોર્ટુગલના લિસ્બન (Lisbon) પહોંચી અને ત્યાંથી મેડ્રિડ (Madrid) ગઈ. ત્યારબાદ તે દોહા (Doha) થઈને માંડ માંડ ભારત પરત ફરી હતી.
ભારત આવ્યા પછી પણ ધમકીઓ યથાવત
ભારત પાછા આવ્યા પછી પણ મહિલાની મુશ્કેલીઓનો અંત આવ્યો નહોતો. આરોપ છે કે કન્સલ્ટન્સી સાથે જોડાયેલા લોકોએ તેની પાસે ફરીથી ₹3 લાખની માંગણી કરી હતી અને આ વખતે તેને માલ્ટામાં (Malta) નોકરી અપાવવાની લાલચ આપી હતી.
જ્યારે મહિલાએ પૈસા આપવાની સ્પષ્ટ ના પાડી, ત્યારે આરોપીઓએ તેના પતિને જાનથી મારી નાખવાની અને મહિલાને ખોટા કેસમાં ફસાવી દેવાની ધમકી આપી હતી.
આખરે કંટાળીને મહિલાએ પુણે પોલીસનો (Pune Police) સંપર્ક કર્યો હતો. પોલીસે આ મામલે 'We Migrate' ના સંચાલકો સહિત કુલ 8 લોકો સામે માનવ તસ્કરી (Human Trafficking), છેતરપિંડી (Fraud) અને જબરદસ્તી પૈસા પડાવવા (Extortion) સહિતની ગંભીર કલમો હેઠળ ગુનો નોંધ્યો છે અને આગળની તપાસ હાથ ધરી છે.
