પાન કાર્ડની જેમ હવે વોટર ID પણ આધાર સાથે લિંક થશે, ચૂંટણી પંચની તૈયારી

ચૂંટણી પંચ દ્વારા ચૂંટણી પારદર્શિતા વધારવાના ઉદ્દેશ્ય સાથે મતદાર કાર્ડને હવે આધારકાર્ડ સાથે લીંક કરવાની પ્રક્રિયા ઝડપી બનાવી શકાય છે. પાન કાર્ડની જેમ, હવે ચૂંટણી પંચ મતદાર ઓળખ કાર્ડ (EPIC) ને આધાર સાથે લિંક કરવાની યોજના પર ગંભીરતાથી કામ કરી રહ્યું છે. આ અંતર્ગત ચૂંટણી પંચની એક મહત્વપૂર્ણ બેઠક આવતા અઠવાડિયે યોજાવા જઈ રહી છે, જેમાં ગૃહ મંત્રાલય, કાયદા મંત્રાલય અને આધાર જારી કરતી સંસ્થા UIDAI ના ઉચ્ચ અધિકારીઓ ભાગ લેશે. આનો ઉદ્દેશ્ય નકલી અને ડુપ્લિકેટ મતદારોને ઓળખીને મતદાર યાદીને વધુ સચોટ બનાવવાનો છે.

એક અહેવાલ મુજબ, 2021માં જનપ્રતિનિધિત્વ અધિનિયમ, 1951માં સુધારો કર્યા પછી, ચૂંટણી પંચે સ્વેચ્છાએ મતદારો પાસેથી આધાર નંબર એકત્રિત કરવાનું શરૂ કર્યું. જોકે ચૂંટણી પંચે હજુ સુધી આધાર અને મતદાર ઓળખ કાર્ડ ડેટાબેઝને લિંક કર્યા નથી. આ પ્રક્રિયા ડુપ્લિકેટ મતદાર નોંધણીઓ ઓળખીને મતદાર યાદીને શુદ્ધ કરી શકાય તે માટે શરૂ કરવામાં આવી હતી, પરંતુ તેને આધાર સાથે લિંક કરવું ફરજિયાત બનાવવામાં આવ્યું ન હતું.

આ મુદ્દે મુખ્ય ચૂંટણી કમિશનર જ્ઞાનેશ કુમાર, ચૂંટણી કમિશનર સુખબીર સિંહ સંધુ અને ચૂંટણી કમિશનર વિવેક જોશી 18 માર્ચે કેન્દ્રીય ગૃહ સચિવ ગોવિંદ મોહન, વિધાનસભા વિભાગના સચિવ રાજીવ મણિ અને UIDAIના CEO ભુવનેશ કુમારને મળશે. આ બેઠક એવા સમયે થઈ રહી છે જ્યારે તૃણમૂલ કોંગ્રેસે પશ્ચિમ બંગાળ સહિત કેટલાક રાજ્યોમાં મતદારોના EPIC નંબર સમાન હોવાનો મુદ્દો ઉઠાવ્યો છે. આ અંગે ચૂંટણી પંચે સ્વીકાર્યું છે કે કેટલાક રાજ્યોમાં ખોટી આલ્ફાન્યૂમેરિક શ્રેણીને કારણે ફરીથી એ જ નંબરો જારી કરવામાં આવ્યા હતા.