રાહુલ ગાંધી સહિત ઇન્ડિયા ગઠબંધનના નેતાઓએ ચૂંટણી પંચને ઘેર્યું, CECને 48 સવાલ પૂછવાની માગી મંજૂરી

મુખ્ય ચૂંટણી કમિશનર (CEC) અને ચૂંટણી પંચની કામગીરી સાથે જોડાયેલા મામલે સુપ્રીમ કોર્ટમાં થનારી સુનાવણી પહેલાં રાહુલ ગાંધી સહિત ઇન્ડિયા ગઠબંધનના નેતાઓએ નવી અરજી દાખલ કરી છે. આ મામલે મંગળવાર, 17 નવેમ્બરે સુનાવણી થવાની છે. અરજદારો દ્વારા ચૂંટણી પંચે દાખલ કરેલા સોગંદનામા સામે અસંતોષ વ્યક્ત કરવામાં આવ્યો છે. તેમણે મુખ્ય ચૂંટણી કમિશનર, બંને ચૂંટણી કમિશનરો અને ચૂંટણી પંચના IT મહાનિર્દેશકને 48 સવાલો પૂછવાની મંજૂરી માગી છે.
આ અરજીમાં ચૂંટણી પંચની નિર્ણય લેવાની પ્રક્રિયા, સ્પેશિયલ ઇન્ટેન્સિવ રિવિઝન (SIR) અને ડિજિટલ સિસ્ટમમાં કરવામાં આવેલા ફેરફારોને લઈને અનેક સવાલો ઉઠાવવામાં આવ્યા છે. અરજદારોનું કહેવું છે કે ચૂંટણી પંચે પોતાના સોગંદનામામાં દાવો કર્યો છે કે તમામ નિર્ણયો સર્વસંમતિથી અને સત્તાવાર ફાઇલો મારફતે લેવામાં આવ્યા હતા. જોકે, RTI દ્વારા મળેલી માહિતીમાં કેટલાક નિર્ણયો અંગે કોઈ ઔપચારિક નિર્ણય લેવામાં આવ્યો ન હોવાની વાત સામે આવી હતી.
CECના અભિપ્રાય સાથે અન્ય બંને ચૂંટણી કમિશનરો અસંમત હતા?
અરજીમાં સવાલ કરવામાં આવ્યો છે કે એવા કેટલા નિર્ણયો લેવામાં આવ્યા હતા, જેમાં મુખ્ય ચૂંટણી કમિશનરના અભિપ્રાય સાથે અન્ય બંને ચૂંટણી કમિશનરો અસંમત હતા? દેશભરમાં એકસાથે SIR કરાવવાનો અંતિમ નિર્ણય કોણે લીધો હતો? નવા મતદારોની નોંધણી માટે ફોર્મ-6ના ફોર્મેટ અને નિયમોમાં ફેરફાર કોના નિર્દેશથી કરવામાં આવ્યો હતો?
આ ઉપરાંત, ચૂંટણી પંચની ERONET અને ECINET ડિજિટલ સિસ્ટમને કેન્દ્રીયકૃત કરવાનો નિર્ણય કોણે લીધો હતો અને આ માટે કઈ ટેકનિકલ પ્રક્રિયા અપનાવવામાં આવી હતી, તે અંગે પણ જવાબ માગવામાં આવ્યો છે.
અરજદારોએ એ પણ પૂછ્યું છે કે મુખ્ય ચૂંટણી કમિશનર અને બંને ચૂંટણી કમિશનરોએ ચૂંટણી પંચ તરફથી દાખલ કરવામાં આવેલા સંયુક્ત સોગંદનામાને ક્યારે અને કઈ પ્રક્રિયા હેઠળ મંજૂરી આપી હતી?
48 સવાલો દ્વારા ચૂંટણી પંચ પાસે જવાબ માગ્યા
અરજીમાં પશ્ચિમ બંગાળમાં ન્યાયિક અધિકારીઓના નિર્ણયો વિરુદ્ધ મોટા પાયે અપીલો દાખલ થવાના મામલે પણ સવાલો ઉઠાવવામાં આવ્યા છે. અરજદારોએ ચૂંટણી પંચના એ દાવાનો વિરોધ કર્યો છે કે આ અપીલો ચૂંટણી પંચની જાણકારી અને મંજૂરી વિના દાખલ કરવામાં આવી હતી.
કાનૂની આધાર તરીકે અરજદારોએ બંધારણની કલમ 32 અને સુપ્રીમ કોર્ટના નિયમોનો ઉલ્લેખ કર્યો છે. તેમણે જસ્ટિસ કે.એસ. પુટ્ટસ્વામી કેસનું ઉદાહરણ આપતાં જણાવ્યું છે કે ટેકનિકલ અને પ્રક્રિયાગત હકીકતો સ્પષ્ટ કરવા માટે સંબંધિત અધિકારીઓને સીધા સવાલો પૂછી શકાય છે.
અરજદારોએ સુપ્રીમ કોર્ટને વિનંતી કરી છે કે સંબંધિત અધિકારીઓને આ 48 સવાલોના જવાબ રેકોર્ડના આધારે સોગંદનામા મારફતે રજૂ કરવાનો નિર્દેશ આપવામાં આવે. સાથે જ, જો કોઈ દસ્તાવેજને ગોપનીય ગણાવીને આપવાનો ઇનકાર કરવામાં આવે, તો તેની પાછળનો કાનૂની આધાર પણ સ્પષ્ટ કરવામાં આવે તેવી માગ કરવામાં આવી છે.













