દિલ્હીમાં યોજાનારા BRICS સંસદીય મંચમાં ઈરાનના સ્પીકર ગાલિબાફ નહીં જોડાય
ભારતમાં યોજાનારા 12મા BRICS સંસદીય મંચમાં ઈરાનની સંસદના સ્પીકર મોહમ્મદ બાઘેર ગાલિબાફ હાજરી નહીં આપે. ઈરાનના દૂતાવાસે શનિવારે આ અંગે જાહેરાત કરતાં જણાવ્યું હતું કે ‘અણધાર્યા સંજોગો’ને કારણે ગાલિબાફ બેઠકમાં ભાગ લઈ શકશે નહીં. જોકે, તેમની જગ્યાએ ઈરાનનું સંસદીય પ્રતિનિધિમંડળ બેઠકમાં હાજરી આપશે. ઈરાનના દૂતાવાસે સ્પષ્ટ કર્યું હતું કે BRICSના સભ્ય દેશ તરીકે ઈરાન આ સંગઠનની બેઠકો અને શિખર સંમેલનોમાં સક્રિય અને અસરકારક ભાગીદારી માટે પ્રતિબદ્ધ છે. ઈરાની પ્રતિનિધિમંડળ અન્ય સભ્ય દેશોના પ્રતિનિધિઓ સાથે સંવાદ અને ચર્ચા ચાલુ રાખશે. ખાસ કરીને સંસદીય સંબંધો અને સહકારને વધુ મજબૂત બનાવવા પર ભાર મૂકવામાં આવશે.
ભારતની યજમાનીની ઈરાને કરી પ્રશંસા
ઈરાનના દૂતાવાસે બેઠકના આયોજન અને મહેમાનગતિ બદલ ભારત સરકારનો આભાર વ્યક્ત કર્યો હતો. દૂતાવાસે આશા વ્યક્ત કરી હતી કે આ મંચથી BRICSના સભ્ય દેશો વચ્ચે સહકાર વધશે અને સંસદીય સ્તરે પરસ્પર સંબંધો વધુ મજબૂત બનશે.
26 અને 27 ઓક્ટોબરે દિલ્હીમાં બેઠક
12મો BRICS સંસદીય મંચ 26 અને 27 ઓક્ટોબર, 2026ના રોજ નવી દિલ્હીમાં સંવિધાન સદનના સેન્ટ્રલ હોલમાં યોજાવાનો છે. આ બેઠકમાં BRICSના સભ્ય અને ભાગીદાર દેશોના સંસદીય નેતાઓ તથા પ્રતિનિધિમંડળો ભાગ લેશે. લોકસભાના સ્પીકર ઓમ બિરલા બેઠકની અધ્યક્ષતા કરશે, જ્યારે વડાપ્રધાન નરેન્દ્ર મોદી પણ તેમાં હાજરી આપે તેવી અપેક્ષા છે. બેઠકમાં સંસદીય સહકાર, લોકોના હિતને કેન્દ્રમાં રાખતો વિકાસ, નૈતિક કૃત્રિમ બુદ્ધિમત્તા (AI), ડિજિટલ પરિવર્તન અને વૈશ્વિક શાસન વ્યવસ્થામાં સુધારા જેવા મુદ્દાઓ પર ચર્ચા થવાની છે. આયોજકોના જણાવ્યા અનુસાર, BRICSના 11 સભ્ય દેશો અને 10 ભાગીદાર દેશોના સંસદીય પ્રતિનિધિમંડળો તેમાં જોડાય તેવી અપેક્ષા છે.
BRICSમાં ભારત-ઈરાનના સંબંધો પણ મહત્ત્વના
ભારતે અગાઉ 12 અને 13 સપ્ટેમ્બરે નવી દિલ્હીમાં BRICS નેતાઓનું શિખર સંમેલન યોજ્યું હતું. તેમાં ઈરાનના રાષ્ટ્રપતિ મસૂદ પેઝેશ્કિયાન સહિત રશિયા, ચીન, દક્ષિણ આફ્રિકા અને અન્ય દેશોના નેતાઓએ ભાગ લીધો હતો. આ દરમિયાન વડાપ્રધાન નરેન્દ્ર મોદી અને ઈરાનના રાષ્ટ્રપતિ વચ્ચે દ્વિપક્ષીય વાતચીત પણ થઈ હતી, જેમાં ભારત-ઈરાન સંબંધો અને પશ્ચિમ એશિયાની સ્થિતિ અંગે ચર્ચા થઈ હતી. નોંધનીય છે કે ગાલિબાફની ગેરહાજરીનું કારણ ઈરાનના દૂતાવાસે ‘અણધાર્યા સંજોગો’ ગણાવ્યું છે. જોકે, આ સંજોગો અંગે વધુ વિગતો જાહેર કરવામાં આવી નથી.
