દિલ્હીમાં કોન્સર્ટની પરવાનગી મળ્યા બાદ દિલજીત દોસાંજે શેર કર્યો ખાસ વીડિયો
દિલજીત દોસાંજના કોન્સર્ટને દિલ્હીમાં પરવાનગી મળી ગઈ છે. દિલ્હી પોલીસ તરફથી લીલી ઝંડી મળ્યા બાદ પંજાબી ગાયકે એક વીડિયો પોસ્ટ કર્યો છે. આ વીડિયોમાં તે અગાઉ પરવાનગી ન મળવા બાબતે કટાક્ષ કરતા જોવા મળી રહ્યો છે. દિલ્હી પોલીસે કેટલીક શરતો સાથે દિલજીતના કોન્સર્ટને પરવાનગી આપી છે.
દિલ્હીમાં 30 ઓક્ટોબરે થશે દિલજીતનો કોન્સર્ટ
દિલ્હીમાં દિલજીતનો કોન્સર્ટ 30 ઓક્ટોબરે થવાનો છે. શુક્રવારે જ દિલજીતના શોને પરવાનગી મળી છે અને તેણે શુક્રવારે જ પોતાના લાઈવનો એક વીડિયો પોસ્ટ કર્યો છે. આ વીડિયોમાં દિલજીત કહે છે કે રીલ્સ બની ગઈ, ચર્ચાઓ થઈ... હવે 30 તારીખે દિલ્હીમાં મળીએ છીએ.
પરવાનગી મળવા પર દિલજીતનો કટાક્ષ
દિલજીતે જે વીડિયો પોસ્ટ કર્યો છે તેમાં દિલજીત દોસાંજ પહાડોની વચ્ચે કોઈ છત પર બેસીને ગ્રીન ટી પીતો જોવા મળી રહ્યો છે. દિલજીત વીડિયોમાં કહે છે- કેવો સારો દિવસ છે, કેવી સરસ વાઇબ્સ આવી રહી છે. હું એ કહેતો હતો કે રીલ્સ બની ગઈ, ટ્વીટ્સ થઈ ગયા, ન્યૂઝરૂમની ચર્ચાઓ થઈ ગઈ? તો હવે દિલ્હીમાં મળીએ છીએ. પહેલા સમાચારની ખાતરી કરી લીધા કરો, વાતની સત્યતા જાણી લીધા કરો. અટકળો લગાવવા કરતા સારું છે કે, પહેલા વાતચીત કરો. ચર્ચાઓ પર ચર્ચાઓ ચાલી રહી છે, ટ્વીટ પર ટ્વીટ્સ ચાલી રહ્યા છે. પહેલા વાત કરો, પછી આગળ વધો.
અનેક બેઠકો પછી દિલજીતના કોન્સર્ટને મળી પરવાનગી
દિલજીતના કોન્સર્ટ અંગે મળેલી માહિતી અનુસાર, અનેક બેઠકો પછી દિલ્હી પોલીસ પરવાનગી આપવા માટે રાજી થઈ. પોલીસ સાથે આયોજકોની ઘણી વખત બેઠક થઈ. આયોજકોએ સુરક્ષાના કારણો અંગે વિગતવાર આયોજન જણાવ્યું. આ આયોજનથી સંતુષ્ટ થયા પછી પોલીસે કોન્સર્ટને લીલી ઝંડી બતાવી છે.
શા માટે દિલજીતના શોને પહેલાં મંજૂરી નહોતી મળી?
દિલજીતનો કોન્સર્ટ દિલ્હીના જવાહરલાલ નેહરુ સ્ટેડિયમમાં થવાનો છે. પહેલા શો રદ થવાને લઈને સમાચાર આવ્યા હતા, પરંતુ બુકમાયશો (BookMyShow) એ આ અંગે એક નિવેદન બહાર પાડ્યું. તેમણે કહ્યું કે ઓરા ઇન્ડિયા ટૂર કોન્સર્ટ રદ થવાના સમાચાર ખોટા છે. તેમણે જણાવ્યું કે તહેવારોની સિઝનને ધ્યાનમાં રાખીને દિલ્હી પોલીસે સુરક્ષા, ટ્રાફિક અને ભીડ વ્યવસ્થાપન સાથે જોડાયેલી કેટલીક વધારાની વ્યવસ્થાઓ કરવા માટે કહ્યું હતું. આ વ્યવસ્થાઓ પૂરી થાય ત્યાં સુધી પરવાનગી કામચલાઉ ધોરણે અટકાવવામાં આવી હતી, ન કે તેને રદ કરવામાં આવી હતી.
