બાબા સિદ્દીકી હત્યા કેસમાં લોરેન્સ બિશ્નોઈ ગેંગની સંડોવણી, ધરપકડ કરાયેલા આરોપીઓની પૂછપરછમાં ખુલાસો

NCP નેતા બાબા સિદ્દીકીની હત્યામાં લોરેન્સ બિશ્નોઈ ગેંગની સંડોવણી સામે આવી રહી છે. મુંબઈ ક્રાઈમ બ્રાન્ચના સૂત્રોના જણાવ્યા અનુસાર, આરોપીઓએ પૂછપરછ દરમિયાન લોરેન્સ બિશ્નોઈ ગેંગ સાથે સંકળાયેલા હોવાનો દાવો કર્યો છે. જોકે, પોલીસ હજુ પણ તેના દ્વારા આપવામાં આવેલા નિવેદનનું ક્રોસ વેરિફિકેશન કરી રહી છે. સૂત્રોના જણાવ્યા અનુસાર ત્રણેય આરોપીઓ છેલ્લા 25-30 દિવસથી તે વિસ્તારની રેકી કરી રહ્યા હતા. ઘટના પહેલા ત્રણેય આરોપી ઓટો રિક્ષા દ્વારા બાંદ્રા ઈસ્ટ પહોંચ્યા હતા. સૂત્રોએ જણાવ્યું કે બાબા સિદ્ધિકી પર ગોળીબાર કરતા પહેલા ત્રણેય ત્યાં થોડીવાર રાહ જોઈ રહ્યા હતા.

પોલીસનું માનવું છે કે બાબા સિદ્દીકીને ત્રણ-ચાર ગોળી વાગી હતી પરંતુ પોસ્ટ મોર્ટમ રિપોર્ટ આવ્યા બાદ સમગ્ર બાબત સ્પષ્ટ થશે. મુંબઈ પોલીસે બાબા સિદ્દીકીની હત્યા કેસમાં બે આરોપીઓની ધરપકડ કરી છે. જ્યારે ત્રીજા આરોપીની શોધખોળ ચાલુ છે. પ્રથમ આરોપી કરનૈલ સિંહ હરિયાણાનો રહેવાસી છે અને ધર્મરાજ કશ્યપ ઉત્તર પ્રદેશનો રહેવાસી છે.