દિલ્હીમાં યોજાનારી ઇન્ડિયા-આફ્રિકા સમિટ છેલ્લી ઘડીએ મોકૂફ, ઈબોલા વાયરસનો પ્રકોપ
છેલ્લું અપડેટ : 21 May 2026
વૈશ્વિક આરોગ્ય સંકટની સીધી અસર હવે આંતરરાષ્ટ્રીય રાજકારણ પર જોવા મળી રહી છે. આફ્રિકા ખંડમાં ઝડપથી ફેલાઈ રહેલા ખતરનાક અને જીવલેણ ઇબોલા વાઈરસના પ્રકોપને ધ્યાનમાં રાખીને, ભારતમાં યોજાનારી પ્રતિષ્ઠિત ચોથી 'ઇન્ડિયા-આફ્રિકા ફોરમ સમિટ'ને સત્તાવાર રીતે મોકૂફ રાખવામાં આવી છે. ભારતીય વિદેશ મંત્રાલયે ગુરુવારે આફ્રિકન યુનિયન સાથે સંયુક્ત બેઠક કર્યા બાદ આ મોટો નિર્ણય લીધો છે.
ભારતના નાગરિકોની સુરક્ષાને ધ્યાને રાખી લેવાયેલો નિર્ણય
આ સમિટ આગામી 28થી 31 મે દરમિયાન નવી દિલ્હીમાં યોજાવાની હતી, જેમાં આફ્રિકાના 40થી વધુ દેશોના રાષ્ટ્રીય નેતાઓ અને હજારો ડેલિગેટ્સ ભાગ લેવાના હતા. પરંતુ ભારતના નાગરિકોની સુરક્ષા અને પબ્લિક હેલ્થને ટોપ પ્રાયોરિટી આપીને આ નિર્ણય લેવાયો છે.
10 વર્ષ બાદ યોજાવવાની હતી ખાસ સમિટ
આ સમિટ ભારત અને આફ્રિકાના સંબંધો માટે ખૂબ જ મહત્વપૂર્ણ હતી, કારણ કે તે 10 વર્ષના લાંબા ગાળા પછી યોજાવા જઈ રહી હતી. આની પહેલા 2008, 211 અને છેલ્લે 2015માં ત્રીજી સમિટ યોજાઈ હતી, જેમાં પીએમ મોદીએ ખાસ મુલાકાત પણ કરી હતી. આ વર્ષે આફ્રિકન યુનિયન કમિશનના સહયોગથી દિલ્હીમાં ભારત-આફ્રિકા પાર્ટનરશિપનો નવો રોડમેપ તૈયાર થવાનો હતો, જે હવે પાછળ ઠેલાયો છે.
ભારતના એરપોર્ટ્સ અને બંદરો પર ખાસ નજર
આફ્રિકામાં ઇબોલાના આઉટબ્રેકને પગલે કેન્દ્રીય આરોગ્ય મંત્રાલયે ભારતના તમામ બંદરો, એરપોર્ટ્સ અને એન્ટ્રી પોઇન્ટ્સ પર કડક હેલ્થ એડવાઇઝરી જાહેર કરી છે. ખાસ કરીને આફ્રિકાના ૩ દેશોને 'હાઇ રિસ્ક' કેટેગરીમાં મૂકવામાં આવ્યા છે: ડેમોક્રેટિક રિપબ્લિક ઓફ કોંગો, યુગાન્ડા અને દક્ષિણ સુદાન.
સરકારની નવી એડવાઇઝરી મુજબ, જો કોઈ પણ મુસાફર આ ૩ દેશોમાંથી સીધો ભારત આવી રહ્યો હોય અથવા ત્યાંથી ટ્રાન્ઝિટ કરીને ભારત પહોંચી રહ્યો હોય, તો તેણે ઇમિગ્રેશન ચેક-ઇન કાઉન્ટર પર જતાં પહેલાં જ એરપોર્ટ હેલ્થ ઓફિસર અથવા હેલ્થ ડેસ્કને રિપોર્ટ કરવો પડશે.
ઇબોલાના મુખ્ય લક્ષણો: તીવ્ર તાવ, શરીરમાં અશક્તિ અને ભારે થાક લાગવો, માથાનો દુખાવો, અસહ્ય સ્નાયુઓનો દુખાવો, ઉલ્ટી, ડાયેરિયા (ઝાડા), ગળામાં સોજો અને શરીરમાંથી અચાનક લોહી નીકળવું
ભારત તમામ શક્ય મદદ માટે તૈયાર છે: વિદેશ મંત્રાલય
સમિટ ભલે સ્થગિત થઈ હોય, પણ વિદેશ મંત્રાલયે સ્પષ્ટ કર્યું છે કે ભારત આ મુશ્કેલ સમયમાં આફ્રિકાની પ્રજા અને ત્યાંની સરકારો સાથે મજબૂતીથી ઊભું છે. આફ્રિકા સીડીસી દ્વારા વાયરસને કાબૂમાં લેવા માટે જે પણ પ્રયાસો થઈ રહ્યા છે, તેમાં ભારત તબીબી અને આર્થિક મદદ કરવા માટે સંપૂર્ણ તૈયાર છે.
