પતિએ દારૂના નશામાં કર્યો ઝઘડો, વિફરેલી પત્નીએ મંગળસૂત્ર વડે કાઢ્યું કાસળ

એક મહિલાએ પોતાના જ મંગળસૂત્ર વડે ગળું દબાવીને પતિનો જીવ લીધો હતો. આ ઘટના દક્ષિણ ભારતના તમિલનાડુ રાજ્યમાં બની હતી. આ ઘટના પાછળનું કારણ ઘરેલું વિવાદ હોવાનું કહેવાય છે. હાલમાં પોલીસે આ અંગે સત્તાવાર રીતે કંઈ કહ્યું નથી. પોલીસે હત્યાના આરોપમાં આરોપી મહિલાની ધરપકડ કરી છે અને તપાસ ચાલુ છે.

મામલો તમિલનાડુની રાજધાની ચેન્નાઈના ટ્રિપ્લિકેનનો છે. 28 વર્ષીય મણિવન્નન તેની પત્ની નાગમમલ (35) સાથે અસદુદ્દીન ખાન સ્ટ્રીટ પર રહેતો હતો. નાગમમલ ગ્રેટર ચેન્નાઈ કોર્પોરેશનમાં કોન્ટ્રાક્ટ પર કામ કરતો હતો. ખાસ વાત એ છે કે તે પહેલા પણ બે વાર લગ્ન કરી ચુકી છે. અહેવાલ મુજબ, મંગળવારે રાત્રે જ્યારે મણિવન્નન દારૂના નશામાં ઘરે પહોંચ્યો ત્યારે બંને વચ્ચે ઝઘડો થયો હતો.

આ પછી મહિલાએ તેના મંગળસૂત્ર વડે પતિનું ગળું દબાવી દીધું હતું. જ્યારે મણિવન્નન બેભાન થઈ ગયો, ત્યારે નાગમમલ ગભરાઈ ગઈ, અને ઉતાવળે તેની બહેન અબીરામીને બોલાવી લાવી, આ પછી અબીરામી તેના પતિ નંદકુમાર સાથે મણિવન્નનને ઓમન્દુર સરકારી હોસ્પિટલમાં લઈ ગયા.  અહીં તબીબોએ તેને મૃત જાહેર કર્યો હતો. ગરદન પર નિશાન જોઈને હોસ્પિટલે આ અંગે ટ્રિપ્લિકેન પોલીસને જાણ કરી હતી.

પોલીસ એક્શનમાં આવી ગઈ અને નાગમમલ, અબીરામી અને નંદકુમારને કસ્ટડીમાં લેવામાં આવ્યા. પૂછપરછ દરમિયાન નાગમમલે જણાવ્યું કે તેનો પતિ તેને વારંવાર હેરાન કરતો હતો, જેના કારણે તેણે હત્યા કરી હતી. હત્યાના આરોપમાં નાગમમલની ધરપકડ કરવામાં આવી છે.