ઉજ્જવળ ભવિષ્યની આશા રોળાઈ: કેનેડામાં અભ્યાસ કરતી આણંદની ૨૨ વર્ષીય યુવતીની ઘાતકી હત્યા
છેલ્લું અપડેટ : 28 May 2026
Anand Girl Dies In Canada: કેનેડાથી ગુજરાતી યુવતીની હત્યાની ઘટના સામે આવી છે. આણંદ જિલ્લાના બોરસદની 22 વર્ષીય વિધી કલ્પેશભાઈ મેઘાની કેનેડામાં ચપ્પુના ઘા મારીને હત્યા કરી દેવામાં આવતા ચકચાર મચી ગઈ છે. યુવતીના મોતના સમાચાર મળતા જ બોરસદમાં રહેતા તેના પરિવાર અને સગાસંબંધીઓમાં ભારે શોકનું મોજું ફરી વળ્યું છે.
અભ્યાસ સાથે નોકરી કરતી હતી વિધી
મળતી માહિતી અનુસાર, મૃતક વિધી મેઘા છેલ્લા ચાર વર્ષથી કેનેડાના નાયગ્રા રીજન વિસ્તારમાં રહેતી હતી. તે ત્યાં અભ્યાસ કરવાની સાથે-સાથે પોતાનું ગુજરાન ચલાવવા માટે નોકરી પણ કરતી હતી. અન્ય ભારતીય વિદ્યાર્થીઓની જેમ તે પણ પોતાના ઉજ્જવળ ભવિષ્ય માટે કેનેડા ગઈ હતી. આ હત્યાની ઘટના ગત 15મી મેના રોજ અમેરિકની સરહદ નજીક આવેલા વિસ્તારમાં બની હતી. વિધી પર કોઈ અજ્ઞાત કારણોસર ચપ્પુ વડે ઘાતકી હુમલો કરવામાં આવ્યો હતો, જેમાં ગંભીર ઈજાઓ થવાના કારણે તેનું મોત નિપજ્યું હતું.
કેનેડાની પોલીસે આ મામલે હત્યાનો ગુનો નોંધી લીધો છે. હુમલાખોર કોણ હતો અને હત્યા પાછળનો ચોક્કસ હેતુ શું હતો, તે દિશામાં પોલીસે ચક્રો ગતિમાન કરીને સઘન તપાસ હાથ ધરી છે.
