VIDEO:"અમરનાથ યાત્રા માટે હાઈટેક સુરક્ષા, ‘પહેચાન’ એપથી થશે ઓળખની ચકાસણી!"

આ વર્ષની અમરનાથ યાત્રા 3 જુલાઈથી 28 ઓગસ્ટ સુધી યોજાવાની છે, જેને ધ્યાનમાં રાખીને જમ્મુ-કાશ્મીર પોલીસે સુરક્ષાના કડક અને આધુનિક બંદોબસ્ત ગોઠવ્યા છે. યાત્રામાર્ગને સંપૂર્ણ સુરક્ષિત બનાવવા માટે સુરક્ષા દળોની ભારે તૈનાતી કરવામાં આવી રહી છે. પ્રથમ વખત યાત્રા માર્ગ પર સેવા આપતા તમામ ટટ્ટૂવાલા, કુલી, દુકાનદારો અને ટેક્સી ડ્રાઇવરોને ‘પહેચાન’ એપ સાથે જોડવામાં આવ્યા છે. પોલીસ વેરિફિકેશન બાદ આ તમામ લોકોને વિશેષ ક્યુઆર કોડ આપવામાં આવશે. શ્રદ્ધાળુઓ પોતાના મોબાઇલથી ક્યુઆર કોડ સ્કેન કરીને સંબંધિત વ્યક્તિની ઓળખ અને વિગતો ચકાસી શકશે. અનંતનાગના એસએસપી આમોદ અશોક નાગપુરેએ જણાવ્યું કે ‘પહેચાન’ એપ યાત્રાની સુરક્ષા માટે એક અનોખી અને અદ્યતન પહેલ છે. ક્યુઆર કોડ સ્કેન થતાં જ સેવા પ્રદાતાની સંપૂર્ણ માહિતી સામે આવશે, જેથી યાત્રાળુઓને વિશ્વાસ અને સુરક્ષાની લાગણી મળશે. આ નવી વ્યવસ્થાથી અમરનાથ યાત્રાને વધુ સુરક્ષિત અને પારદર્શક બનાવવાનો પ્રયાસ કરવામાં આવ્યો છે.