પૂર્વ વડાપ્રધાન મનમોહન સિંહનું અવસાન, દિલ્હી AIIMSમાં હતા દાખલ

Manmohan Singh passed away: આજે મોડી સાંજે પૂર્વ વડાપ્રધાન મનમોહન સિંહ દિલ્હી AIIMSના ઈમરજન્સી વિભાગમાં દાખલ કરવામાં આવ્યા હતા. ભૂતકાળમાં સ્વાસ્થ્ય સમસ્યાઓથી પીડાતા 91 વર્ષીય નેતાને તાત્કાલિક તબીબી સારવાર માટે હોસ્પિટલમાં લઈ જવામાં આવ્યા હતા. તેમના કાર્યાલયના જણાવ્યા અનુસાર, ભૂતપૂર્વ વડાપ્રધાન શ્વાસની તકલીફથી પીડાતા હતા અને તેમને ICUમાં ખસેડવામાં આવ્યા હતા.

મનમોહન સિંહ, જેમણે 2004 થી 2014 સુધી વડાપ્રધાન તરીકે સેવા આપી હતી, આ વર્ષની શરૂઆતમાં રાજ્યસભામાંથી નિવૃત્ત થયા હતા, 33 વર્ષ પછી ઉપલા ગૃહમાં તેમની રાજકીય ઇનિંગ્સનો અંત આવ્યો હતો.

મનમોહન સિંહે પીવી નરસિમ્હા રાવની આગેવાની હેઠળની સરકારમાં નાણાં પ્રધાન તરીકે શપથ લીધાના ચાર મહિના પછી 1991માં રાજ્યસભામાં પ્રવેશ્યા હતા. તેમણે ઉપલા ગૃહમાં પાંચ ટર્મ માટે આસામનું પ્રતિનિધિત્વ કર્યું અને 2019માં રાજસ્થાનથી રાજ્યસભા પહોંચ્યા હતા.

ડૉ. મનમોહન સિંહનો જન્મ 26 સપ્ટેમ્બર 1932ના રોજ અવિભાજિત ભારતના પંજાબ પ્રાંતના એક ગામમાં થયો હતો. એક સામાન્ય પૃષ્ઠભૂમિમાંથી આવતા, ડૉ. સિંહે તેમના જીવનમાં શિક્ષણ, અર્થશાસ્ત્ર અને રાજકારણમાં અસાધારણ સિદ્ધિઓ હાંસલ કરી. ડૉ.મનમોહન સિંહે 1948માં પંજાબ યુનિવર્સિટીમાંથી મેટ્રિકની પરીક્ષા પાસ કરી હતી. આ પછી તેમણે 1957માં કેમ્બ્રિજ યુનિવર્સિટી (યુકે)માંથી અર્થશાસ્ત્રમાં ફર્સ્ટ ક્લાસ ઓનર્સની ડિગ્રી મેળવી. તેમણે 1962માં ઓક્સફર્ડ યુનિવર્સિટીની નફિલ્ડ કોલેજમાંથી અર્થશાસ્ત્રમાં ડી.ફિલની ડિગ્રી મેળવી. શિક્ષણ પ્રત્યેનો તેમનો જુસ્સો તેમને પંજાબ યુનિવર્સિટી અને દિલ્હી સ્કૂલ ઑફ ઇકોનોમિક્સમાં ભણાવવા તરફ દોરી ગયો.

1971માં, ડૉ. સિંહ ભારત સરકારમાં જોડાયા અને વાણિજ્ય મંત્રાલયમાં આર્થિક સલાહકાર બન્યા. 1972માં તેમને નાણા મંત્રાલયના મુખ્ય આર્થિક સલાહકાર તરીકે નિયુક્ત કરવામાં આવ્યા હતા. આ પછી તેઓ નાણાં મંત્રાલયના સચિવ, આયોજન પંચના ઉપાધ્યક્ષ, ભારતીય રિઝર્વ બેંકના ગવર્નર, વડાપ્રધાનના આર્થિક સલાહકાર અને યુનિવર્સિટી ગ્રાન્ટ્સ કમિશન (યુજીસી)ના અધ્યક્ષ સહિત ઘણા મહત્વપૂર્ણ પદો પર રહ્યા.

નાણામંત્રી તરીકે યોગદાન

1991 થી 1996 સુધી, ડૉ. સિંહ ભારતના નાણા પ્રધાન હતા. આ સમયગાળા દરમિયાન, તેમણે આર્થિક સુધારાની વ્યાપક નીતિ અમલમાં મૂકી, જેની સમગ્ર વિશ્વમાં પ્રશંસા થઈ. આ સુધારાઓએ ભારતને આર્થિક સંકટમાંથી બહાર કાઢ્યું અને નવી દિશા આપી. ડૉ.મનમોહન સિંહ 1991માં પ્રથમ વખત રાજ્યસભાના સભ્ય બન્યા હતા. તેમણે પાંચ વખત આસામનું પ્રતિનિધિત્વ કર્યું અને 2019માં રાજસ્થાનમાંથી રાજ્યસભાના સભ્ય બન્યા. 1998 થી 2004 સુધી, જ્યારે ભારતીય જનતા પાર્ટી સત્તામાં હતી, ત્યારે ડૉ. સિંહ રાજ્યસભામાં વિરોધ પક્ષના નેતા હતા. તેમણે 1999માં દક્ષિણ દિલ્હીથી લોકસભાની ચૂંટણી પણ લડી હતી, પરંતુ તેમાં સફળતા મળી ન હતી.

2004ની સામાન્ય ચૂંટણીઓ પછી, તેઓ 22 મેના રોજ ભારતના વડાપ્રધાન તરીકે નિયુક્ત થયા. તેમણે 2009માં બીજી વખત વડાપ્રધાન તરીકે શપથ લીધા અને 2014 સુધી આ પદ પર રહ્યા.