Video: "વિગતો સામે આવશે ત્યારે ખેડૂતો ઉત્સવ મનાવશે!", ભારત-અમેરિકા ટ્રેડ ડીલ પર પીયૂષ ગોયલનો મોટો દાવો

ભારત અને અમેરિકા વચ્ચે પ્રસ્તાવિત વેપાર કરાર (US Trade Deal) અંગે કેન્દ્રીય વાણિજ્ય અને ઉદ્યોગ મંત્રી પીયૂષ ગોયલે એક અત્યંત મહત્વપૂર્ણ અને વિશ્વાસપૂર્ણ નિવેદન આપ્યું છે. નવી દિલ્હી ખાતે આયોજિત '4th ISID-IDRA નેશનલ કોન્ફરન્સ ઓન ઇન્ડિયાઝ ઇન્ડસ્ટ્રિયલ ટ્રાન્સફોર્મેશન' કાર્યક્રમમાં સંબોધન કરતા તેમણે સ્પષ્ટ શબ્દોમાં જણાવ્યું હતું કે આ કરાર ભારત અને ભારતના ખેડૂતોના હિતોનું સંપૂર્ણ રક્ષણ કરશે.

પીયૂષ ગોયલે મંચ પરથી નિશ્ચયપૂર્વક કહ્યું, "મારી પાસે સંપૂર્ણ વિશ્વાસ સાથે આ જાહેરાત કરવાની હિંમત છે કે, જ્યારે અમેરિકા સાથેના વેપાર કરારની તમામ વિગતો સામે આવશે, ત્યારે ભારતના લોકો ઉજવણી કરશે. દેશના ખેડૂતો કે કોઈપણ પક્ષકારના સંવેદનશીલ હિતો સાથે સહેજ પણ સમાધાન કરવામાં આવ્યું નથી. આ ડીલથી ભારત અત્યંત મજબૂત અને લાભદાયી સ્થિતિમાં ઊભું રહેશે."

કેન્દ્રીય મંત્રીના આ નિવેદનથી વિપક્ષ અને વિવિધ ખેડૂત સંગઠનો દ્વારા ઉઠાવવામાં આવી રહેલી ચિંતાઓ અને આશંકાઓ પર પૂર્ણવિરામ મૂકવાનો પ્રયાસ કરવામાં આવ્યો છે. વૈશ્વિક વેપાર વાટાઘાટોમાં ભારત પોતાના સ્થાનિક હિતોનું બલિદાન આપશે તેવી અટકળો વચ્ચે વાણિજ્ય મંત્રીએ ભારપૂર્વક સ્પષ્ટતા કરી છે કે રાષ્ટ્રીય હિત અને ખેડૂતોની સુરક્ષા સરકારની સર્વોચ્ચ પ્રાથમિકતા છે.