મણિપુરમાં 11 બૂથ પર ફરીથી મતદાન કરવાનો ચૂંટણી પંચનો આદેશ, 22 એપ્રિલે યોજાશે ચૂંટણી

મણિપુરમાં આંતરિક મણિપુર લોકસભા મતવિસ્તારના 11 મતદાન કેન્દ્રો પર 22 એપ્રિલે ફરી મતદાન થશે. આ માટે ચૂંટણી પંચે શનિવારે (20 એપ્રિલ) એક આદેશ જારી કર્યો હતો. 19 એપ્રિલે લોકસભા ચૂંટણીમાં પ્રથમ તબક્કાના મતદાન દરમિયાન આ બૂથ પર આગચંપી, હિંસા અને તોડફોડ થઈ હતી. જેને લઈને ચૂંટણી પંચે પુનઃ મતદાનનો આદેશ આપ્યો છે.

મીડિયા અહેવાલો અનુસાર, મણિપુર આંતરિક લોકસભા બેઠકોના 11 બૂથ પર ફરીથી મતદાન થશે. તેમાં સજેબ, ખુરાઇ, થોંગમ, લેઇકાઇ બમન કંપુ (ઉત્તર-A), બમન કંપુ (ઉત્તર-બી), બમન કંપુ (દક્ષિણ-પશ્ચિમ), બમન કંપુ (દક્ષિણ-પૂર્વ), ખોંગમેન ઝોન-વી (એ), ઇરોશેમ્બા, મામંગ લીકાઈ, ઈરોઈશેમ્બા મયાઈ લીકાઈ અને ખાઈડેમ મખાના બૂથનો સમાવેશ થાય છે.

19 એપ્રિલના રોજ મણિપુરની બંને લોકસભા સીટો – ઇનર અને આઉટર મણિપુર સીટો માટે મતદાન થયું હતું. જ્યાં આંતરિક અને બાહ્ય મણિપુરમાં 72 ટકા મતદાન નોંધાયું હતું. ત્યાં ચૂંટણી મતદાન દરમિયાન અનેક બૂથ પર ગોળીબાર, ઈવીએમ મશીનોની તોડફોડ અને બૂથ કેપ્ચર કરવાના બનાવો નોંધાયા હતા.

બિષ્ણુપુર જિલ્લાના થમનપોકપીમાં બૂથ સેન્ટર પર ફાયરિંગમાં ત્રણ લોકો ઘાયલ થયા હતા. જો કે, આ હુમલો કોણે કર્યો તે પોલીસ શોધી શકી નથી. હિંસાની ઘટનાઓને કારણે ચૂંટણી પંચે 11 બૂથ પર મતદાનને અમાન્ય જાહેર કર્યું હતું.

મણિપુરમાં ભાજપનું NPP-NPF સાથે ગઠબંધન

મણિપુરમાં ભાજપ સૌથી મોટી પાર્ટી તરીકે ઉભરી આવી છે. અહીં ભાજપે રાજ્યની નેશનલ પીપલ્સ પાર્ટી અને નાગા પીપલ્સ ફ્રન્ટ સાથે ગઠબંધન કર્યું છે. જોકે, ભાજપે માત્ર આંતરિક મણિપુરથી જ પોતાનો ઉમેદવાર ઉતાર્યો છે. જ્યારે ભાજપ આઉટર મણિપુરમાં નાગા પીપલ્સ ફ્રન્ટને સમર્થન આપી રહ્યું છે.