Video: "₹500કરોડ કેટલા મોટા હોય ખબર છે?" ઓડિયો ક્લિપ વિવાદ પર શિવસેના પ્રવક્તા આનંદ દુબેનો જોરદાર વળતો પ્રહાર!
મહારાષ્ટ્રના રાજકારણમાં ચર્ચાસ્પદ બનેલા કથિત ₹500 કરોડના ઓડિયો ક્લિપ પ્રકરણમાં શિવસેનાના પ્રવક્તા આનંદ દુબેએ આકરા પ્રહારો કર્યા છે. આ મામલે પક્ષની સ્પષ્ટતા રજૂ કરતાં તેમણે જણાવ્યું કે શિવસેના પોતે જ આ ક્લિપની સત્યતા બહાર લાવવા માટે પારદર્શક તપાસની તરફેણમાં છે.
આનંદ દુબેએ જણાવ્યું હતું કે, "અમારા પક્ષના નેતાઓ પોતે જઈને મુખ્યમંત્રીને મળ્યા હતા. એક પ્રતિનિધિમંડળે રૂબરૂ જઈને SIT તપાસની માગણી કરી હતી અને મુખ્યમંત્રીએ ખાતરી આપી છે કે સાચું સત્ય બહાર લાવવા માટે SITની રચના કરવામાં આવશે અને સમગ્ર ક્લિપની ફોરેન્સિક તપાસ પણ કરાશે. આ એક ખૂબ જ આવકારદાયક બાબત છે."
વિરોધીઓ પર નિશાન સાધતાં તેમણે કહ્યું, "કોઈ પણ વ્યક્તિ ગમે ત્યારે મનફાવે તેવા પાયાવિહોણા આરોપો મૂકી શકે છે. અમે વારંવાર કહીએ છીએ: રાજકારણ કરો, પરંતુ કોઈને બદનામ કરવાનો પ્રયાસ ન કરો. અમારા નેતા શ્રીકાંત શિંદેએ પણ સ્પષ્ટ કર્યું છે કે અમે પોતે પણ આ ₹૫૦૦ કરોડ ક્યાં છે તે શોધી રહ્યા છીએ! શું લોકોને ખ્યાલ પણ છે કે ₹૫૦૦ કરોડ કેટલી મોટી રકમ હોય છે? આટલા પૈસા ક્યાંથી આવ્યા, ક્યાં ગણાયા અને વાસ્તવમાં શું બન્યું હતું? કોઈના પર પણ આવી રીતે હવામાં આક્ષેપો કરવા એ સંપૂર્ણપણે હાસ્યાસ્પદ બાબત છે."
તેમણે ઉમેર્યું કે હવે જ્યારે આ સમગ્ર મામલો SIT અને ફોરેન્સિક એનાલિસિસ હેઠળ જઈ રહ્યો છે, ત્યારે ટૂંક સમયમાં દૂધનું દૂધ અને પાણીનું પાણી થઈ જશે અને ખોટા આરોપો લગાવનારાઓનો પર્દાફાશ થશે.
