'વિકસિત ભારત'નું લક્ષ્ય હાંસલ થાય ત્યાં સુધી સીમાંકન મુલતવી રાખો, મોદી-શાહ પર કોંગ્રેસનો પ્રહાર

'વિકસિત ભારત'નું લક્ષ્ય હાંસલ થાય ત્યાં સુધી સીમાંકન મુલતવી રાખો, મોદી-શાહ પર કોંગ્રેસનો પ્રહાર
તસવીર: gstv
આ સમાચાર સાંભળો

કોંગ્રેસે શનિવારે જણાવ્યું હતું કે સંસદના ચોમાસુ સત્રને અનિશ્ચિત સમય માટે સ્થગિત (Adjourned Sine Die) કરવામાં આવ્યાને 100 દિવસ વીતી ગયા હોવા છતાં વડાપ્રધાન નરેન્દ્ર મોદી અને કેન્દ્રીય ગૃહમંત્રી અમિત શાહ લોકસભામાં સીમાંકન બિલ પસાર કરાવવા માટે બે તૃતીયાંશ બહુમતી મેળવવાના પ્રયાસમાં છે.

કોંગ્રેસના મહાસચિવ જયરામ રમેશે કહ્યું કે, દેશના હિતમાં એ જ રહેશે કે લોકસભાની હાલની કુલ બેઠકો અને રાજ્યો પ્રમાણેની બેઠકોનું માળખું યથાવત રાખવામાં આવે અને મહિલાઓ માટે 33 ટકા અનામતનો અમલ કરવામાં આવે. આ વ્યવસ્થા 'વિકસિત ભારત'નું લક્ષ્ય હાંસલ ન થાય ત્યાં સુધી ચાલુ રાખવી જોઈએ.

જાહેરાત

જયરામ રમેશે સોશિયલ મીડિયા પ્લેટફોર્મ X પર એક પોસ્ટમાં લખ્યું, "આજે 2026ના ચોમાસુ સત્રને અનિશ્ચિત સમય માટે સ્થગિત કરવામાં આવ્યાને 100 દિવસ થઈ ગયા છે અને હજુ સુધી સંસદનું સત્રાવસાન (Prorogation) કરવામાં આવ્યું નથી."

તેમણે વધુમાં કહ્યું કે, "વડાપ્રધાન અને ગૃહમંત્રીની જોડી હજુ પણ બંધારણીય સુધારા બિલ એટલે કે સીમાંકન બિલ પસાર કરાવવા માટે લોકસભામાં બે તૃતીયાંશ બહુમતી મેળવવાની શોધમાં છે." કોંગ્રેસના નેતાએ કહ્યું કે 17 એપ્રિલે જૂનું બિલ ભારે બહુમતીથી પરાજિત થયા બાદ નવા બિલમાં શું જોગવાઈઓ હશે તેની કોઈને જાણ નથી.

તેમણે દાવો કર્યો કે નવા બિલ અંગે કોઈપણ રાજકીય પક્ષ સાથે ગંભીર અને વ્યવસ્થિત રીતે કોઈ ચોક્કસ દરખાસ્ત પર ચર્ચા કરવામાં આવી નથી. આ ઉપરાંત, કોંગ્રેસ અધ્યક્ષ મલ્લિકાર્જુન ખડગેએ વડાપ્રધાનને ચાર પત્રો લખ્યા હોવા છતાં હજુ સુધી સર્વપક્ષીય બેઠક પણ બોલાવવામાં આવી નથી.

સીમાંકન કરતાં દેશના અન્ય પડકારો વધુ મહત્ત્વના: કોંગ્રેસ

જયરામ રમેશે કહ્યું કે દેશ સામે આર્થિક, રાજકીય, સામાજિક, લશ્કરી અને વિદેશ નીતિ સંબંધિત અનેક ગંભીર પડકારો છે, જેના પર તાત્કાલિક ધ્યાન આપવાની જરૂર છે. તેમના મતે, વ્યાપક સીમાંકનની પ્રક્રિયા હાલ મુલતવી રાખી શકાય છે.

તેમણે ભૂતકાળનાં ઉદાહરણ આપતાં કહ્યું કે, 1976માં પૂર્વ વડાપ્રધાન ઈન્દિરા ગાંધીએ સીમાંકન પ્રક્રિયા 25 વર્ષ માટે મુલતવી રાખી હતી. ત્યારબાદ 2001માં પૂર્વ વડાપ્રધાન અટલ બિહારી વાજપેયીએ પણ તેને વધુ 25 વર્ષ માટે એટલે કે 2026 પછીની પ્રથમ વસ્તી ગણતરીનાં પરિણામો જાહેર થાય ત્યાં સુધી મુલતવી રાખી હતી. જયરામ રમેશે બંને નેતાઓને સમજદાર અને રાષ્ટ્રવાદી વડાપ્રધાન ગણાવ્યા હતા.

તેમણે વધુમાં કહ્યું કે, 19 નવેમ્બરે ફિક્કી (FICCI)ના સંમેલનમાં વડાપ્રધાન નરેન્દ્ર મોદીએ દેશની અર્થવ્યવસ્થાની સ્થિતિ અંગે ગંભીર ચિંતા વ્યક્ત કરી હતી.

જયરામ રમેશે કટાક્ષ કરતાં કહ્યું કે, વડાપ્રધાન હાલ માનસિક રીતે ખૂબ જ વિચલિત જણાય છે અને દેશની આર્થિક સ્થિતિને લઈને તેમની ચિંતા સ્વાભાવિક પણ છે. તેમના મતે, સીમાંકન જેવા મહત્ત્વપૂર્ણ મુદ્દા પર ચર્ચા કરવા માટે શાંત ચિત્તે વિચારવાની જરૂર છે. આ માટે વિવિધ હિતધારકો સાથે વ્યાપક પરામર્શ પણ જરૂરી છે.

'વિકસિત ભારત'નું લક્ષ્ય હાંસલ ન થાય ત્યાં સુધી હાલનું માળખું યથાવત રાખો

કોંગ્રેસના નેતા જયરામ રમેશે અંતમાં કહ્યું કે, વર્તમાન પરિસ્થિતિમાં દેશના હિતમાં એ જ રહેશે કે લોકસભાની હાલની બેઠકોની સંખ્યા અને રાજ્યો પ્રમાણેની બેઠકોનું માળખું યથાવત રાખવામાં આવે તથા મહિલાઓ માટે 33 ટકા અનામતનો અમલ કરવામાં આવે.

તેમણે સૂચન કર્યું કે 'વિકસિત ભારત'નું લક્ષ્ય હાંસલ ન થાય ત્યાં સુધી આ વ્યવસ્થાને સ્થિર રાખવી જોઈએ. તેમના મતે, જ્યારે વિકસિત ભારતનું લક્ષ્ય વાસ્તવિકતામાં પરિવર્તિત થઈ જશે, ત્યારે સીમાંકનના કારણે ઊભા થનારા મોટા ફેરફારો અને તેની અસરોને સંભાળવી વધુ સરળ બનશે.

આ સમાચાર શેર કરો

જાહેરાત