VIDEO: ખુલ્લા ફાટક પર પેસેન્જર ટ્રેનની સ્કૂલ વાન સાથે જોરદાર ટક્કર, 2 વિદ્યાર્થીઓ સહિત ૩ના મોત
છેલ્લું અપડેટ : 17 Jul 2026
પશ્ચિમ બંગાળના (West Bengal) મુર્શિદાબાદ જિલ્લાના બરહમપુરમાં શુક્રવારે વહેલી સવારે એક અત્યંત હૃદયદ્રાવક અને મોટી દુર્ઘટના (Major Accident) સર્જાઈ છે. અહીં બાળકોને લઈ જઈ રહેલી એક સ્કૂલ વાન (School Van) સાથે ટ્રેનની જોરદાર ટક્કર થઈ છે. આ ભયાનક અકસ્માતમાં બે નિર્દોષ સ્કૂલના વિદ્યાર્થીઓ સહિત કુલ ત્રણ લોકોના ઘટનાસ્થળે જ કમકમાટીભર્યા મોત થયા છે, જ્યારે અનેક બાળકો ગંભીર રીતે ઘાયલ (Injured) થયા છે.
રેલવે ફાટક ખુલ્લું હોવાના કારણે સર્જાયો અકસ્માત
મળતી માહિતી અનુસાર, આ દુર્ઘટના શુક્રવારે સવારે આશરે ૭ વાગ્યે બરહમપુર પોલીસ સ્ટેશન વિસ્તારના કર્ણસુબર્ના રેલવે ફાટક (Railway Gate) પાસે બની હતી. સવારે નાનાં બાળકોને લઈને સ્કૂલ વાન શાળાએ જઈ રહી હતી. સ્થાનિક લોકોના જણાવ્યા અનુસાર, રેલવે ક્રોસિંગ (Railway Crossing) ખુલ્લું હોવાથી વાન પાટા પરથી પસાર થઈ રહી હતી, બરાબર તે જ સમયે અચાનક આવેલી નિમટિતા-કટવા પેસેન્જર ટ્રેને (Passenger Train) સ્કૂલ વાનને જોરદાર ટક્કર મારી દીધી હતી. અકસ્માત એટલો ભયાનક હતો કે વાનનો કુરચો બોલી ગયો હતો.
ગેટમેનની ગંભીર બેદરકારી આવી સામે
ઘટનાસ્થળે હાજર પ્રત્યક્ષદર્શીઓએ જણાવ્યું કે, અપ-લાઇન (Up-line) પરથી એક ટ્રેન પસાર થઈ ગયા બાદ રેલવે ગેટ ખોલી દેવામાં આવ્યો હતો. પરંતુ, બાજુના ટ્રેક (Track) પરથી બીજી ટ્રેન આવી રહી હોવા છતાં ગેટ ફરીથી બંધ કરવામાં આવ્યો નહોતો. ગેટ ખુલ્લો જોઈને સ્કૂલ વાન આગળ વધી ગઈ અને બીજી ટ્રેનની અડફેટે આવી ગઈ. સ્થાનિક લોકો રેલવે પ્રશાસનની આ ગંભીર બેદરકારીને જ અકસ્માત માટે જવાબદાર ગણાવી રહ્યા છે.
હોસ્પિટલમાં સારવાર ચાલુ, પૂર્વ રેલવેએ આપ્યા તપાસના આદેશ (Inquiry Ordered)
આ અકસ્માતને પગલે સમગ્ર વિસ્તારમાં અફરાતફરી મચી ગઈ હતી. ઘટનાની જાણ થતાં જ પોલીસ અને રેલવેના ઉચ્ચ અધિકારીઓ (Senior Officers) ઘટનાસ્થળે દોડી આવ્યા હતા. ઘાયલ થયેલા તમામ વિદ્યાર્થીઓને તાત્કાલિક સારવાર માટે મુર્શિદાબાદ મેડિકલ કોલેજ હોસ્પિટલમાં (Murshidabad Medical College Hospital) ભરતી કરવામાં આવ્યા છે, જ્યાં કેટલાક બાળકોની સ્થિતિ નાજુક હોવાનું કહેવાય છે.
બીજી તરફ, આ ગંભીર અકસ્માત બાદ પૂર્વ રેલવે (Eastern Railway) દ્વારા સમગ્ર મામલાની ગંભીરતાથી તપાસ કરવાના આદેશો આપવામાં આવ્યા છે. રેલવેની એક સ્પેશિયલ ટીમ (Special Team) ઘટનાસ્થળે મોકલવામાં આવી છે, જે ગેટ શા માટે ખુલ્લો રહી ગયો અને કોની બેદરકારી હતી તેની ઊંડાણપૂર્વક તપાસ કરશે.