'CM પદ પરથી હટાવીને મારું અપમાન કર્યું, JMM સામે ચંપાઈ સોરેનનો ખુલ્લો બળવો
ઝારખંડની રાજનીતિમાં હાલ ભારે હલચલ જોવા મળી રહી છે. ઝારખંડના પૂર્વ મુખ્યમંત્રી ચંપાઈ સોરેન ઘણા ધારાસભ્યો સાથે ભાજપમાં જો
ઝારખંડની રાજનીતિમાં હાલ ભારે હલચલ જોવા મળી રહી છે. ઝારખંડના પૂર્વ મુખ્યમંત્રી ચંપાઈ સોરેન ઘણા ધારાસભ્યો સાથે ભાજપમાં જોડાશે એવી અટકળો ચાલી રહી છે. ત્યારે આ સ્થિતિ વચ્ચે ચંપાઈ સોરેને તેમના સોશિયલ મીડિયા પ્લેટફોર્મ Xના બાયોમાંથી તેમની પાર્ટી ઝારખંડ મુક્તિ મોરચાનું નામ હટાવી દીધું છે. હવે ચંપાઈ સોરેનના નવા બાયો પર માત્ર ઝારખંડના પૂર્વ મુખ્યમંત્રી લખવામાં આવ્યા છે.
ભાજપમાં જોડાવાની અટકળો વચ્ચે ઝારખંડના પૂર્વ મુખ્યમંત્રી ચંપાઈ સોરેને સોશિયલ મીડિયા પ્લેટફોર્મ X પર એક પોસ્ટ કરી છે, જેમાં તેમણે પોતાની નારાજગી વ્યક્ત કરી છે. ચંપાઈ સોરેને પોતાની પોસ્ટમાં લખ્યું કે, છેલ્લા ત્રણ દિવસના અપમાનજનક વર્તનને કારણે હું મારા આંસુ પર કાબૂ રાખવાનો પ્રયાસ કરી રહ્યો હતો, પરંતુ તેમને માત્ર ખુરશીની ચિંતા હતી. મને એવું લાગ્યું કે જાણે એ પક્ષમાં મારું કોઈ અસ્તિત્વ જ નથી, જે પક્ષ માટે અમે આખું જીવન સમર્પિત કર્યું હતું, તે દરમિયાન આવી ઘણી અપમાનજનક ઘટનાઓ બની હતી, જેનો હું અત્યારે ઉલ્લેખ કરવા માંગતો નથી. આટલા અપમાન અને તિરસ્કાર પછી, મને વૈકલ્પિક માર્ગ શોધવાની ફરજ પડી.
ભાજપમાં જોડાવાની અટકળોએ વધુ વેગ પકડ્યો
ઝારખંડના પૂર્વ મુખ્યમંત્રી ચંપાઈ સોરેને સોશિયલ મીડિયા પ્લેટફોર્મ Xના બાયોમાંથી ઝારખંડ મુક્તિ મોરચા(JMM)નું નામ હટાવી દીધું છે. માત્ર ઝારખંડના પૂર્વ મુખ્યમંત્રી રાખ્યું છે. પરિણામે ભાજપમાં જોડાવાની અટકળોએ વધુ વેગ પકડ્યો છે.
કોણ છે ચંપાઈ સોરેન?
તમને જણાવી દઈએ કે ઝારખંડમાં ચંપાઈ સોરેને ગયા મહિને જુલાઈમાં મુખ્યમંત્રી પદ પરથી રાજીનામું આપી દીધું હતું. આ પછી જેલમાંથી છૂટ્યા બાદ હેમંત સોરેન ફરી એકવાર ઝારખંડના સીએમ બન્યા હતા. ચંપાઈ સોરેન 2 ફેબ્રુઆરી 2024 થી 3 જુલાઈ 2024 સુધી ઝારખંડના મુખ્યમંત્રી હતા. ચંપાઈ સોરેન સાત વખત ધારાસભ્ય રહી ચૂક્યા છે. 2005થી તેઓ સતત સરાઈકેલા વિધાનસભા મતવિસ્તારનું પ્રતિનિધિત્વ કરી રહ્યા છે. 1991માં તેઓ પ્રથમ વખત સરાયકેલા બેઠક પરથી ધારાસભ્ય બન્યા હતા. હેમંત સોરેને 2019માં ચંપાઈ સોરેનને કેબિનેટ મંત્રી પણ બનાવ્યા હતા.
