ભાજપ પોતાના જ આ 9 ગઢ બચાવવામાં અસમર્થ, જાણો કઈ સીટ પર થયું કેટલું નુકસાન?

લોકસભા ચૂંટણી 2024ની મતગણતરી ચાલી રહી છે. અત્યાર સુધી તમામ 543 સીટો માટે ટ્રેન્ડ આવી ગયો છે, જેમાંથી ભાજપ 238 સીટો પર આગળ છે. તો વિપક્ષી ઈન્ડિયા ગઠબંધન 227 બેઠકો પર આગળ છે. આ સિવાય અન્ય પાર્ટીઓ 18 સીટો પર આગળ છે. અત્યાર સુધીના આંકડાઓ પરથી સ્પષ્ટ થઈ ગયું છે કે, મોદી સરકારના 400ને પાર કરવાના નારાને જનતાએ નકારી દીધો છે. ખાસ વાત એ છે કે, ભાજપને તેના જ 10 ગઢમાં એવું નુકસાન થયુ છે, જેનો જવાબ કદાચ પાર્ટી અને તેના વરિષ્ઠ નેતાઓ પાસે પણ નથી. ચાલો જાણીએ કે ભગવા પાર્ટી તેના કયા ગઢને બચાવવામાં નિષ્ફળ રહી છે? મોદી સરકારના નેતૃત્વમાં NDAને કેટલું નુકસાન થઈ રહ્યું છે?

યુપીમાં પલટાઈ ગઈ બાજી

દેશના સૌથી મોટા રાજકીય ક્ષ્રેત્ર એટલે કે ઉત્તર પ્રદેશમાં ભાજપે 2019ની લોકસભા ચૂંટણીમાં 62 બેઠકો જીતી હતી. એવું માનવામાં આવી રહ્યું હતું કે, 2024ની લોકસભા ચૂંટણીમાં ઉત્તર પ્રદેશ ભાજપની રાજકીય હેટ્રિકમાં સૌથી વધુ ફાળો આપશે. જોકે, ત્રણ વાગ્યા સુધીના ટ્રેન્ડ પ્રમાણે ઉત્તર પ્રદેશમાં ભાજપની સ્થિતિ નબળી જણાઈ રહી છે. અહીંની કુલ 80 લોકસભા સીટોમાંથી ભાજપ 33 સીટો પર આગળ છે. જ્યારે અખિલેશ યાદવની સમાજવાદી પાર્ટી 36 સીટો પર આગળ ચાલી રહી છે. નોંધનીય બાબત એ છે કે, 2019ની ચૂંટણીમાં સપા માત્ર પાંચ સીટો પર જ ઘટી હતી. આવી સ્થિતિમાં, આ વલણો યુપીમાં સપાની વાપસીનો સંકેત આપે છે. આ સિવાય કોંગ્રેસ 7 સીટો પર અને આરએલડી 2 સીટો પર આગળ ચાલી રહી છે. આઝાદ સમાજ પાર્ટી (કાંશીરામ) એક બેઠક પર આગળ છે.

બિહારને પણ નુકસાન થયું

બીજેપીનો ગઢ ગણાતા બિહારમાં પણ ભગવા પાર્ટીને ઈચ્છિત પરિણામ મળ્યું નથી. ત્રણ વાગ્યા સુધીના ટ્રેન્ડમાં ભાજપ 13 સીટો પર આગળ છે, જ્યારે 2019ની લોકસભા ચૂંટણીમાં પાર્ટીએ 17 સીટો જીતી હતી. આ સિવાય JDU 14 સીટો પર, LJP 5 પર, RJD 3 અને કોંગ્રેસ 2 સીટો પર આગળ છે. અન્ય પક્ષોએ 3 બેઠકો પર લીડ જાળવી રાખી છે.

રાજસ્થાનના યુદ્ધમાં પણ પાછળ રહી ગયા

રાજસ્થાનમાં ચાલી રહેલો આંતરિક ઝઘડો અત્યાર સુધીના ટ્રેન્ડ મુજબ ભાજપને નુકસાન પહોંચાડી રહ્યો હોય તેવું લાગી રહ્યું છે. 2019ની લોકસભા ચૂંટણીમાં રાજ્યની 25માંથી 24 બેઠકો જીતનાર ભાજપ આ વખતે 13 બેઠકો પર આગળ છે. જ્યારે કોંગ્રેસ 8 બેઠકો પર આગળ છે. આ સિવાય અન્ય પાર્ટીઓ 3 સીટો પર આગળ છે.

મહારાષ્ટ્રમાં પણ મળી રહી છે હાર

મહારાષ્ટ્રમાં ભાજપને જનતાની નારાજગીનો સામનો કરવો પડ્યો છે. એવું માનવામાં આવે છે કે, અહીં શિવસેના અને એનસીપી વચ્ચેની તોડફોડના કારણે લોકોનું મન બીજેપીથી દૂર થઈ ગયું છે. આ જ કારણ છે કે, અત્યાર સુધીના ટ્રેન્ડ પ્રમાણે રાજ્યની 48માંથી 12 સીટો પર ભાજપ આગળ છે. જ્યારે કોંગ્રેસ 11 બેઠકો પર આગળ છે, શિવસેના ઉદ્ધવ 11 પર, NCP શરદ પવાર 7 બેઠકો પર અને શિવસેના શિંદે જૂથ 5 બેઠકો પર આગળ છે. આ સિવાય અન્ય પાર્ટીઓ 2 સીટો પર આગળ છે. ઉલ્લેખનીય છે કે, 2019માં ભાજપે મહારાષ્ટ્રમાં 23 સીટો જીતી હતી.

હરિયાણામાં પણ ન ચાલ્યો જાદુ

2019ની લોકસભા ચૂંટણીમાં હરિયાણાની તમામ 10 બેઠકો જીતનાર ભાજપ અહીં 2024ની લોકસભા ચૂંટણીમાં સંઘર્ષ કરી રહી છે. અત્યાર સુધીના ટ્રેન્ડમાં ભગવા પાર્ટી અને કોંગ્રેસ વચ્ચે જબરદસ્ત રસ્સાકસી જોવા મળી રહી છે. અત્યારે ભાજપ અને કોંગ્રેસ બંને 5 સીટો પર આગળ ચાલી રહી છે.

ભાજપ ઝારખંડમાં પણ મુશ્કેલ સ્થિતિમાં

2019ની લોકસભા ચૂંટણીમાં ભાજપે ઝારખંડમાં 14માંથી 11 બેઠકો જીતી હતી. જ્યારે 2024માં અત્યાર સુધીના વલણો અનુસાર, ભગવા પાર્ટી માત્ર 8 સીટો પર આગળ છે. જેએમએમ 3 બેઠકો પર, કોંગ્રેસ 2 પર અને AJSUP 1 પર આગળ ચાલી રહી છે.

છત્તીસગઢમાં પણ સ્થિતિ ખરાબ

છત્તીસગઢને ભાજપનો ગઢ પણ માનવામાં આવે છે. 2019ની લોકસભા ચૂંટણીમાં ભગવા પાર્ટીએ રાજ્યની 11 લોકસભા બેઠકોમાંથી 9 બેઠકો જીતી હતી. એવું માનવામાં આવતું હતું કે, 2024માં ભાજપ અહીં તમામ સીટો જીતી શકે છે, પરંતુ અત્યાર સુધીના ટ્રેન્ડ પ્રમાણે પાર્ટી માત્ર 10 સીટો પર આગળ ચાલી રહી છે.

ગુજરાતમાં પણ નારાજગી

ભાજપનો ગઢ ગણાતા ગુજરાતમાં પણ પાર્ટીની હાલત સારી દેખાઈ રહી નથી. ભાજપ, જેણે 2019માં અહીંની તમામ 26 લોકસભા બેઠકો જીતી હતી. પરંતુ અત્યાર સુધીના વલણમાં તેણે બનાસકાંઠાની 1 સીટ ગુમાવી છે અને 1 સીટ પર જીત હાંસલ કરી છે. સમાચાર લખાય છે ત્યાં સુધી પાર્ટી 24 સીટો પર આગળ છે.

બંગાળમાં પણ આશાઓ ફળીભૂત ન થઈ

2019ની ચૂંટણી દરમિયાન ભાજપે પશ્ચિમ બંગાળમાં 18 લોકસભા બેઠકો જીતી હતી. એવું માનવામાં આવતું હતું કે, 2024ની લોકસભા ચૂંટણીમાં ભગવા પાર્ટી અહીં પોતાની તાકાત બતાવશે અને મમતા બેનર્જીની ટીએમસીને હરાવી દેશે. અત્યાર સુધીના વલણો અનુસાર, TMC 30 બેઠકો પર આગળ છે, જ્યારે ભાજપ માત્ર 11 બેઠકો પર આગળ છે. તો કોંગ્રેસ 1 સીટ પર આગળ છે.