Video: અયોધ્યા અને ભારત સામે દેશ-વિદેશમાંથી મોટું ષડયંત્ર? વિજયાદશમીએ યોગી આદિત્યનાથે ઉઘાડા પાડ્યા દુશ્મનોના મનસૂબા!

ઉત્તર પ્રદેશના ગોરખપુર ખાતે મુખ્યમંત્રી યોગી આદિત્યનાથે વિજયાદશમી પર્વ નિમિત્તે સંબોધન કરતા દેશ અને અયોધ્યા વિરુદ્ધ કાવતરાં ઘડનારા તત્વો સામે આકરા પ્રહારો કર્યા હતા. તેમણે સ્પષ્ટ શબ્દોમાં જણાવ્યું કે, જે લોકોને ભારતની વધતી શક્તિ, અખંડિતતા અને એકતા પચી રહી નથી, તેઓ આજે અયોધ્યા અને દેશની છબિ ખરડવા માટે દુષ્પ્રચાર (Malicious Propaganda) ફેલાવી રહ્યા છે. આ દેશવિરોધી તત્વો દેશની અંદર પણ સક્રિય છે અને તેમને વિદેશી તાકાતો તરફથી પણ પીઠબળ મળી રહ્યું છે.

રાજ્યમાં સાંસ્કૃતિક ચેતના અને જીવંત સમાજનો ઉલ્લેખ કરતા મુખ્યમંત્રીએ જણાવ્યું કે, "આજે ઉત્તર પ્રદેશમાં ૪૫,૦૦૦ જેટલા સ્થળોએ દુર્ગા પૂજા મહોત્સવ અને આશરે આટલા જ સ્થળોએ રામલીલાનું ભવ્ય આયોજન થઈ રહ્યું છે. આ સમગ્ર આયોજનો કોઈપણ સરકારી આર્થિક સહાય વિના જનતા દ્વારા સ્વયંભૂ થઈ રહ્યા છે, જે દર્શાવે છે કે આપણો સમાજ કેટલો ચેતનવંત અને સંગઠિત છે."

દશેરાના દિવસે રાવણ દહન પર તાત્વિક વિચાર રજૂ કરતા સીએમ યોગીએ કહ્યું કે, રાવણ માત્ર એક પૌરાણિક પાત્ર નથી પણ બદીઓનું પ્રતીક છે. રાવણના દસ માથા એટલે—અધર્મ, અસત્ય, અન્યાય, અત્યાચાર, અમર્યાદા, ભ્રષ્ટાચાર, દુરાચાર, ભ્રમ, દુષ્પ્રચાર અને નશો. આજના યુગમાં આ તમામ દુર્ગુણો સામે લડીને તેમનો નાશ કરવો એ જ સાચો વિજયાદશમીનો સંદેશ છે.