અયોધ્યા રામ જન્મભૂમિ પરિસરમાં 26 ઓક્ટોબરે રચાશે ઈતિહાસ! ટ્રસ્ટે લીધો અત્યાર સુધીનો સૌથી મોટો નિર્ણય!
શ્રી રામ જન્મભૂમિ તીર્થ ક્ષેત્ર ટ્રસ્ટ દ્વારા આગામી 26 ઓક્ટોબરના રોજ મહર્ષિ વાલ્મીકિ જયંતિની વિશેષ ધાર્મિક વિધિ-વિધાન સાથે ભવ્ય ઉજવણી કરવામાં આવશે. આ પાવન અવસરને અનુલક્ષીને તડામાર તૈયારીઓ શરૂ કરી દેવામાં આવી છે. બુધવારે યોજાયેલી ટ્રસ્ટની મહત્વપૂર્ણ બેઠકમાં સમગ્ર કાર્યક્રમની વ્યવસ્થાઓ અને આયોજન અંગે વિગતવાર ચર્ચા-વિચારણા હાથ ધરવામાં આવી હતી.
ટ્રસ્ટી ડૉ. નિર્મલા યાદવને સોંપાઈ મહત્વની જવાબદારી
આ ભવ્ય ધાર્મિક મહોત્સવના સુચારુ સંચાલન અને સંકલનની મુખ્ય જવાબદારી શ્રી રામ જન્મભૂમિ તીર્થ ક્ષેત્રના ટ્રસ્ટી ડૉ. નિર્મલા યાદવને સોંપવામાં આવી છે. તેઓ ગુરુવાર, ૨૨ ઓક્ટોબરના રોજ શિકોહાબાદથી અયોધ્યા પહોંચશે. તેમના આગમન સાથે જ ગુરુવારે કાર્યક્રમની રૂપરેખા અને વ્યવસ્થાઓને આખરી ઓપ આપવા માટે એક વિશેષ બેઠક મળશે. આ સમગ્ર મહોત્સવ સંપન્ન ન થાય ત્યાં સુધી ડૉ. નિર્મલા યાદવ અયોધ્યામાં જ ઉપસ્થિત રહી સમગ્ર આયોજન પર સીધી દેખરેખ રાખશે.
પરિસરમાં આવેલા વાલ્મીકિ મંદિરમાં યોજાશે મુખ્ય અનુષ્ઠાન
ટ્રસ્ટ દ્વારા મળેલી વિગતો અનુસાર, વાલ્મીકિ જયંતિનો મુખ્ય ધાર્મિક સમારોહ શ્રી રામ જન્મભૂમિ તીર્થ ક્ષેત્ર પરિસરમાં સ્થિત મહર્ષિ વાલ્મીકિ મંદિરમાં યોજવામાં આવશે. આ પ્રસંગે વિવિધ વૈદિક મંત્રોચ્ચાર, પૂજન-અર્ચન અને વિશેષ ધાર્મિક વિધિઓનું આયોજન કરવામાં આવ્યું છે, જેને લઈને ભક્તો અને સાધુ-સંતોમાં ઉત્સાહનો માહોલ જોવા મળી રહ્યો છે.
