સૌરવ-રાંકાના જામીન પર અભિજિત દીપકે થયો ભાવુક, શાહરુખ ખાનનો VIDEO શેર કરી આપી પ્રતિક્રિયા
કોકરોચ જનતા પાર્ટી (CJP)ના નેતાઓ સૌરવ દાસ અને આશુતોષ રાંકાને દિલ્હીની વિશેષ કાર્યપાલક મેજિસ્ટ્રેટ (SEM) કોર્ટ તરફથી મોટી રાહત મળી છે. કોર્ટે બંને નેતાઓને જામીન પર મુક્ત કરવાનો મહત્વનો આદેશ આપ્યો છે. આ નિર્ણય સામે આવતાં જ CJPના સ્થાપક અભિજિત દીપકેએ સોશિયલ મીડિયા પર અત્યંત ભાવુક પોસ્ટ શેર કરીને ખુશી વ્યક્ત કરી છે. બીજી તરફ, જેલમુક્ત થયા બાદ સૌરવ દાસે પોતાની પ્રતિક્રિયા આપતાં જણાવ્યું કે આખરે ‘સત્યની જીત થઈ છે.’
https://x.com/abhijeet_dipke/status/2112895445244813448
અભિજિત દીપકેનું ઇમોશનલ રિએક્શન: 'મેરે ભાઈ અબ આઝાદ હૈં'
સાથી નેતાઓને જામીન મળ્યા બાદ અભિજિત દીપકેએ બોલિવૂડ અભિનેતા શાહરૂખ ખાનની પ્રખ્યાત ફિલ્મ 'ચક દે ઇન્ડિયા' નો એક ભાવનાત્મક વીડિયો શેર કર્યો હતો. આ સાથે જ તેમણે ઇન્સ્ટાગ્રામ પર પણ એક વીડિયો પોસ્ટ કરીને પોતાના દિલની વાત શેર કરી હતી. દીપકેએ પોસ્ટ સાથે લખ્યું કે, ‘મારા ભાઈઓ હવે આઝાદ છે.’ આ પોસ્ટ સોશિયલ મીડિયા પર ઝડપથી વાયરલ થઈ રહી છે અને સમર્થકો તેને ખૂબ શેર કરી રહ્યા છે.
SEM કોર્ટે આપ્યો જામીન પર મુક્ત કરવાનો આદેશ
દિલ્હીની સ્પેશિયલ એક્ઝિક્યુટિવ મેજિસ્ટ્રેટ (SEM) કોર્ટે જંતર-મંતર ખાતે 14 ઑક્ટોબરના રોજ યોજાયેલા વિરોધ પ્રદર્શનના કેસમાં બુધવારે (21 ઑક્ટોબર) સુનાવણી હાથ ધરી હતી. બંને નેતાઓને મેજિસ્ટ્રેટ સમક્ષ રજૂ કરવામાં આવ્યા હતા, જ્યાં કાયદાકીય પ્રક્રિયા અંતર્ગત જામીનદારોના તમામ જરૂરી દસ્તાવેજો જમા કરાવ્યા બાદ કોર્ટે બંનેને તાત્કાલિક મુક્ત કરવાનો આદેશ કર્યો હતો.
14 ઑક્ટોબરે લેવાયા હતા ન્યાયિક કસ્ટડીમાં
જંતર-મંતરને પ્રદર્શન સ્થળ તરીકે દૂર કરવામાં આવ્યા બાદ પણ ત્યાં પ્રવેશ કરવા અને શાંતિ જાળવવાના બોન્ડનું ઉલ્લંઘન કરવા બદલ પોલીસે સૌરવ દાસ અને આશુતોષ રાંકાની અટકાયત કરી હતી. ત્યારબાદ 14 ઑક્ટોબરે કોર્ટે તેમને શરૂઆતમાં 5 દિવસની ન્યાયિક કસ્ટડીમાં મોકલ્યા હતા.
દિલ્હી હાઈકોર્ટે દખલ કરવાનો કર્યો હતો ઈનકાર
કસ્ટડીની મુદત પૂર્ણ થતાં 19 ઑક્ટોબરે કોર્ટે તેમની કસ્ટડી વધુ 2 દિવસ માટે લંબાવી હતી, જે મુદત બુધવારે પૂર્ણ થતી હતી. આ દરમિયાન દિલ્હી હાઈકોર્ટે તેમની ન્યાયિક કસ્ટડીના મામલામાં કોઈ પણ પ્રકારની દખલગીરી કરવાનો સ્પષ્ટ ઈનકાર કર્યો હતો. હાઈકોર્ટે સ્પષ્ટતા કરી હતી કે તેઓ SEM કોર્ટના નિર્ણયની રાહ જુએ અને જો કોઈ ફરિયાદ બાકી રહે તો ઉપલી અદાલતનો સંપર્ક કરે. આખરે SEM કોર્ટે બંનેને જામીન આપતાં આ કાનૂની લડાઈમાં તેમને મોટી રાહત મળી છે.
