અનુપ્રિયા પટેલની પાર્ટીના નેતા ઈન્દ્રજીત પટેલની ગોળી મારી હત્યા, આરોપીની કરાઈ ધરપકડ 

યુપી પ્રયાગરાજમાંથી મોટા સમાચાર સામે આવી રહ્યા છે. અહીં રવિવારે બપોરે અનુપ્રિયા પટેલની પાર્ટી અપના દળ એસકેના નેતા ઈન્દ્રજીત પટેલની ગોળી મારીને હત્યા કરવામાં આવી હતી. ઈન્દ્રજીતની હત્યા બાદ સ્થાનિક લોકોમાં ભારે રોષ છે. ઘટના બાદ સ્થાનિક પોલીસ અને ડીસીપી ઘટના સ્થળે પહોંચી ગયા હતા. આ પછી મૃતદેહને કબજે કરીને પોસ્ટમોર્ટમ માટે મોકલવામાં આવ્યો હતો. પોલીસે આરોપી સર્વેશ પટેલની ધરપકડ કરી છે. આ ઘટના ગંગાનગર ઝોનના સોરાઓં વિસ્તારમાં બની હતી.

મળતી માહિતી મુજબ, ઈન્દ્રજીત પટેલ ગંગાપર યુનિટના લીગલ સેલના એક્ઝિક્યુટિવ મેમ્બર હતા. એટલું જ નહીં તેઓ વ્યવસાયે વકીલ હતા. પોલીસે દાવો કર્યો છે કે ઈન્દ્રજીત પટેલની અંગત અદાવતના કારણે તેના પાડોશી સર્વેશ પટેલે ગોળી મારી હત્યા કરી હતી. પોલીસને  આરોપીઓ પાસેથી બે પિસ્તોલ પણ મળી આવી છે.

ગ્રામજનોએ ઉગ્ર દેખાવો કર્યા

હત્યા બાદ ગ્રામજનોમાં રોષ જોવા મળી રહ્યો છે. હત્યાના વિરોધમાં ગ્રામજનોએ ઉગ્ર દેખાવો કર્યા હતા. ઘટના બાદ ડીસીપી અભિષેક ભારતી ઘટના સ્થળે પહોંચ્યા હતા. પોલીસના જણાવ્યા અનુસાર ઈન્દ્રજીત અને સર્વેશ વચ્ચે કોઈ મુદ્દે ઝઘડો થયો હતો અને આ વિવાદમાં ઈન્દ્રજીતે પોતાનો જીવ ગુમાવ્યો હતો. જો કે આ વિવાદ અંગે કોઈ માહિતી બહાર આવી નથી.