રાહુલ ગાંધીના પૂર્વોત્તર પ્રવાસ દરમિયાન મણિપુરના આ વિસ્તારમાં ફરી હિંસા ભડકી, જોરદાર ફાયરિંગ

કોંગ્રેસ સાંસદ અને લોકસભામાં વિપક્ષના નેતા રાહુલ ગાંધી આજે આસામ અને મણિપુરના પ્રવાસે પહોંચ્યા છે. આસામમાં પૂરગ્રસ્ત રાહત છાવણીઓની મુલાકાત લીધા બાદ તેઓ મણિપુરમાં બાય રોડ જવાના છે. વિપક્ષ નેતા બન્યા બાદ લોકોનો અવાજ ઉઠાવવા રાહુલ ગાંધીએ ફૂલેરતાલમાં એક પૂર પ્રભાવિત રાહત શિબિરની મુલાકાત કરી હતી. ગત વર્ષે મે મહિનામાં ભડકેલી હિંસા બાદ પૂર્વોત્તર રાજ્યનો આ ત્રીજો પ્રવાસ છે. અને વિપક્ષ નેતા તરીકે તેમનો પહેલો પ્રવાસ છે.  રાહુલ ગાંધી આસામના સિલચર પહોંચતા પૂર્વ સીએમ ઓકરામ ઇબોબી સિંહે એરપોર્ટ પર તેમનું જોરદાર સ્વાગત કર્યું હતું. અહીંથી તેઓ મણિપુર જવા માટે રવાના થશે પરંતુ તે પહેલાં જિરીબામ જિલ્લામાં જોરદાર ગોળીબારી થઇ છે. 

જણાવી દઈએ કે , જિરીબામમાં 6 જૂનના રોજ 59 વર્ષીય એક ખેડૂત સોઈબામ સરતકુમા સિંહની હત્યા બાદ ફરીથી હિંસા ભડકી ઉઠી છે. મળતી માહિતી અનુસાર, વહેલી સવારથી લગભગ 3 કલાક સુધી અહીં  ફાયરિંગ થયું હતું. જિરીબામના ગુલારથલ વિસ્તારમાં કેટલાક અજાણ્યા હુમલાખોરોએ સોમવારે મોડી રાત્રે 3.30 વાગે ફાયરિંગ કરવાનું શરૂ કરતા જવાબી કાર્યવાહીમાં સુરક્ષા જવાનોએ પણ ફાયરિંગ કર્યું હતું. જોકે આ ફાયરિંગમાં હજુ સુધી કોઇ જાનહાનિના સમાચાર સામે આવ્યા નથી. ફાયરિંગ સવારે 7 વાગ્યા સુધી ચાલુ રહ્યું હતું. આ ઘટના બાદ આસપાસના રહેણાંક વિસ્તારમાં મોટી સંખ્યામાં સુરક્ષા જવાનો ગોઠવી દેવામાં આવ્યા છે. 

મણિપુરમાં હિંસા પ્રભાવિત લોકોને મળશે

આસામ બાદ રાહુલ ગાંધી મણિપુરના પ્રવાસે જશે. મણિપુરના જિરીબામ, ચુરાચાંદપુર અને ઇમ્ફાલમાં હિંસા પ્રભાવિત લોકો સાથે વાતચીત કરશે. આ ઉપરાંત રાહત છાવણીની મુલાકાત લેશે અને પીસીસી નેતાઓને પણ મળશે. લોકસભા ચુંટણીમાં સમર્થન માટે જનતાનો આભાર વ્યક્ત કરશે. મણિપુરની બંને સીટો પર કોંગ્રેસને જીત મળી હતી. રાહુલ ગાંધી ત્રણવાર મણિપુરની મુલાકાત લઇ ચૂક્યા છે જ્યારે પૂર્વોત્તરમાં વિરોધ પક્ષના નેતાના રૂપમાં આ પ્રથમ પ્રવાસ છે. 

મણિપુરમાં લગભગ 1 વર્ષથી નાની મોટી હિંસાઓ બનતી રહે છે. તાજેતરમાં 6 જૂને હિંસાની ઘટના બની હતી. રાહુલ ગાંધીએ લોકસભામાં પણ મણિપુર હિંસાનો મુદ્દો ઉઠાવ્યો હતો. રાહુલ ગાંધીએ પીએમ મોદી પર નિશાન સાધતાં કહ્યું હતું કે પીએમ મોદી દરેક જગ્યાએ જાય છે પરંતુ મણિપુર ગયા નથી. ગત 3 મેના રોજ જાતિય હિંસા બાદ મણિપુરમાં 200થી વધુ લોકોના મોત થયા છે અને હજારો બેઘર બન્યા છે. 

મણિપુરમાં હિંસા ત્યારે ભડકી હતી જ્યારે મૈતેઇ સમુદાયને અનુસૂચિત જનજાતિ (એસટી) માં સામેલ કરવાની માંગના વિરોધમાં રાજ્યના પહાડી જિલ્લામાં આદિવાસીએ માર્ચનું આયોજન કર્યું હતું. મણિપુરમાં જાતિય હિંસાને શાંત કરવા માટે અનેક પ્રયત્નો બાદ પણ હજુ મુદ્દો ગંભીર છે. અવાર-નવાર અહીં ગોળીબારીની ઘટનાઓ સામે આવે છે.