અયોધ્યામાં 30 લાખ દીવડાઓથી ભવ્ય દીપોત્સવ, 56 ઘાટો રોશનીથી ઝળહળ્યા
અયોધ્યામાં 7 નવેમ્બર, 2026ના રોજ 10મા ભવ્ય દીપોત્સવ (Deepotsav)નો ભવ્ય પ્રારંભ થયો છે. સરયુ નદીના કિનારે આવેલા 56 ઘાટો પર આશરે 30 લાખ દીવડાઓ પ્રગટાવવામાં આવ્યાં હતાં. લાખો દીવડાઓની રોશનીથી રામ કી પૈડી સહિત સમગ્ર રામનગરી ઝળહળી ઊઠી હતી. આ ભવ્ય અને દિવ્ય નજારો નિહાળવા માટે દેશના વિવિધ રાજ્યો ઉપરાંત વિદેશમાંથી પણ મોટી સંખ્યામાં શ્રદ્ધાળુઓ અને પ્રવાસીઓ અયોધ્યા પહોંચ્યા હતા.
ઉપરાષ્ટ્રપતિ સહિતના મહાનુભાવોની ઉપસ્થિતિ
દીપોત્સવના મુખ્ય કાર્યક્રમમાં ભારતના ઉપરાષ્ટ્રપતિ સી. પી. રાધાકૃષ્ણન, ઉત્તર પ્રદેશનાં રાજ્યપાલ આનંદીબેન પટેલ અને મુખ્યમંત્રી યોગી આદિત્યનાથ ઉપસ્થિત રહ્યાં હતાં. આ પ્રસંગે મુખ્યમંત્રી યોગી આદિત્યનાથે સરયુ નદીના કિનારે ભવ્ય આરતી કરી હતી. ત્યારબાદ તેમણે રામલલ્લાનાં દર્શન કરીને આશીર્વાદ મેળવ્યા હતા. ઉપરાષ્ટ્રપતિ સી. પી. રાધાકૃષ્ણને પોતાના સંબોધનમાં જણાવ્યું હતું કે વડાપ્રધાન નરેન્દ્ર મોદી અને મુખ્યમંત્રી યોગી આદિત્યનાથના નેતૃત્વમાં રામ મંદિર સમગ્ર હિન્દુ સમાજના આત્મસન્માનનું પ્રતીક બની ગયું છે. તેમણે રામનગરીના આ ભવ્ય આયોજનને ભારતીય સંસ્કૃતિ અને પરંપરાનું ગૌરવ ગણાવ્યું હતું.
સુરક્ષા માટે 6 હજારથી વધુ જવાનો તૈનાત
દીપોત્સવમાં મોટી સંખ્યામાં લોકો ઉમટવાની શક્યતાને ધ્યાનમાં રાખીને અયોધ્યામાં ચુસ્ત સુરક્ષા વ્યવસ્થા (Security Arrangement) ગોઠવવામાં આવી હતી. સમગ્ર આયોજન ક્ષેત્રને 20 ઝોન અને 53 સેક્ટરમાં વહેંચવામાં આવ્યું હતું. સુરક્ષા વ્યવસ્થામાં આશરે 6,000 પોલીસકર્મીઓ ઉપરાંત પ્રાંતીય સશસ્ત્ર કોન્સ્ટેબ્યુલરી (PAC)ની 9 કંપનીઓ, રેપિડ એક્શન ફોર્સ (RAF)ની 3 કંપનીઓ અને આતંકવાદ વિરોધી દળ (ATS)ની કમાન્ડો ટીમો તૈનાત કરવામાં આવી હતી. સરયુ નદીમાં સુરક્ષા અને બચાવ કામગીરી માટે રાષ્ટ્રીય આપત્તિ પ્રતિભાવ દળ (NDRF) તથા રાજ્ય આપત્તિ પ્રતિભાવ દળ (SDRF)ની ટીમો પણ તૈનાત રાખવામાં આવી હતી.
વિદેશી મહેમાનો પણ દીપોત્સવના સાક્ષી બન્યા
અયોધ્યાના આ ભવ્ય દીપોત્સવનો ઉત્સાહ માત્ર ભારતમાં જ નહીં, પરંતુ વિદેશોમાં પણ જોવા મળ્યો હતો. ઓસ્ટ્રેલિયા અને મલેશિયા સહિતના દેશોમાંથી શ્રદ્ધાળુઓ અને વિદેશી નાગરિકો ખાસ આ આયોજન નિહાળવા અયોધ્યા પહોંચ્યા હતા. 30 લાખ દીવડાઓની રોશની, સરયુ આરતી અને ભક્તિમય વાતાવરણ વચ્ચે અયોધ્યાનો દીપોત્સવ ભારતીય સંસ્કૃતિ અને ધાર્મિક પરંપરાની ભવ્ય ઝલક રજૂ કરતો ઉત્સવ બન્યો હતો.
