મહિસાગર/ બોગસ વોટિંગ મામલે ચૂંટણી પંચનો મહત્ત્વપૂર્ણ નિર્ણય, 11 મેએ ફરી સંતરામપુરના પરથમપુરમાં થશે મતદાન

મહિસાગરના સંતરામપુરના પરમથમપુરમાં ફરી મતદાન કરવાનો નિર્ણય ચૂંટણી પંચ દ્વારા લેવામાં આવ્યો છે. ભાજપના નેતાના પુત્રએ EVM બુથમાં જઇને સોશિયલ મીડિયા પર બોગસ વોટિંગનું LIVE કર્યું હતું. તે પછી ચૂંટણી પંચ દ્વારા હવે ફરીથી મતદાન કરાવવાનો નિર્ણય લેવામાં આવ્યો છે. 11 મેએ સંતરામપુરના પરથમપુરમાં ફરીથી મતદાન થશે. ચૂંટણીનું પરિણામ 4 જૂને જાહેર કરવામાં આવશે.

11 મેએ ફરી મતદાન

દાહોદ લોકસભા બેઠકના એક બુથમાં બુથ કેપ્ચરિંગની ઘટના બની હતી. મહિસાગરના સંતરામપુર તાલુકાના પરથમપુરા ગામના એક બુથ પર ફરી મતદાનનો નિર્મય લેવામાં આવ્યો છે. દાહોદ લોકસભા અંતર્ગત આવતા બુથ નંબર 220માં ફરી મતદાન થશે.

ભાજપના નેતા રમેશ ભાભોરના પુત્ર વિજય ભાભોરે બુથ કેપ્ચર કરતા વિવાદ થયો હતો. જિલ્લા ચૂંટણી અધિકારીએ ચૂંટણી પંચને રિપોર્ટ સોપ્યો હતો. રિપોર્ટમાં અનધિકૃત મતદાન થયું હોવાનો સ્વીકાર થયો છે. કેટલાક મતો અનધિકૃત રીતે પડ્યા હોવાનો રિપોર્ટમાં ઉલ્લેખ કરવામાં આવ્યો હતો. જે બાદ ફરી મતદાનનો નિર્ણય કરવામાં આવ્યો છે. 11 મેના રોજ સવારે 7 વાગ્યાથી સાંજના 6 વાગ્યા સુધી ફરી મતદાન થશે.

ભાજપના નેતાના પુત્રએ EVM બુથ હાઇજેક કર્યું હતું

ભાજપના નેતા રમેશ ભાભોરના પુત્ર વિજય ભાભોરનો વીડિયો સોશિયલ મીડિયા પર વાયરલ થયો હતો. વીડિયોમાં વિજય ભાભોર પરથમપુર બુથ નંબર 220 મતદાન મથકના સ્ટાફને ધમકાવતો જોવા મળ્યો હતો. બુથના સ્ટાફને ધમકાવીને મત નાખવા આવતા લોકોને સહી કરાવી અને મોટાભાગના મત જાતે જ નાખતો જોવા મળ્યો હતો. મતદાન મથકની બહાર પોલીસ સહિત અન્ય સુરક્ષા વ્યવસ્થા હોવા છતાં ખુલ્લે આમ ભાજપના નેતાના પુત્રની દાદાગીરી સામે આવી હતી. આખુ બુથ જ હાઇજેક કરી નાખ્યુ હતું અને આખી ઘટનાને LIVE કરી હતી. જોકે, વિવાદ થયા બાદ વિજય ભાભોરે સોશિયલ મીડિયા પરથી આ વીડિયો હટાવી દીધો છે.