VIDEO: નળ તો ફિટ કરાયા પણ તેમાં પાણી જ નથી, નવાલજાના ગ્રામજનોને પીવાલાયક પાણી ન મળતા તંત્ર સામે ભારે આક્રોશ

છોટાઉદેપુર જિલ્લાના નવાલજા ગામમાં ભરઉનાળાની કાળઝાળ ગરમી વચ્ચે પીવાના પાણીની ગંભીર કટોકટી સર્જાઈ છે. સરકારની મહત્વકાંક્ષી "નલ સે જલ" યોજના હેઠળ ગામના પ્રત્યેક ઘરમાં નળ તો ફિટ કરી દેવામાં આવ્યા છે, પરંતુ તેમાં પાણી જ ન આવતા ગ્રામજનોને ભારે હાલાકી વેઠવી પડી રહી છે. સ્થાનિક પંચાયત દ્વારા નિયમિત રીતે પાણી વેરો વસૂલવામાં આવતો હોવા છતાં, ગ્રામજનોને પીવાલાયક શુદ્ધ પાણી નસીબ થતું નથી.

પરિણામે, કાળઝાળ ગરમીમાં માસૂમ બાળકો, મહિલાઓ અને વૃદ્ધોને માથે બેડાં તેમજ હાથમાં ડોલ લઈને કિલોમીટરો દૂર આવેલી નદી સુધી પાણી ભરવા જવા મજબૂર બનવું પડે છે. આ વિકટ પરિસ્થિતિને કારણે સમગ્ર પંથકના ગ્રામજનોમાં વહીવટી તંત્ર સામે ભારે આક્રોશ અને રોષ જોવા મળી રહ્યો છે.