VIDEO : જૂનાગઢની સરકારી શાળાના 9મા ધોરણના બાળકોને ABCD ન આવડતા શિક્ષણ પર સવાલો

જૂનાગઢ જિલ્લાના ભેસાણ તાલુકાના વિશળહડમતીયા ગામની સરકારી ગ્રાન્ટેડ પ્રાથમિક શાળામાં તાજેતરમાં યોજાયેલા પ્રવેશોત્સવ દરમિયાન શિક્ષણની કથળેલી સ્થિતિનો એક ચોંકાવનારો કિસ્સો સામે આવ્યો છે. આ કાર્યક્રમમાં હાજર રહેલા શ્રમ અને રોજગાર વિભાગના નાયબ સચિવે જ્યારે ક્લાસરૂમમાં જઈને ધોરણ-9માં અભ્યાસ કરતા વિદ્યાર્થીઓ સાથે વાર્તાલાપ કર્યો અને તેમને 'ABCD આવડે છે?' તેવો સામાન્ય સવાલ પૂછ્યો, ત્યારે વિદ્યાર્થીઓએ 'ના' પાડી દીધી હતી. આ સાંભળીને નાયબ સચિવ પણ આશ્ચર્યચકિત થઈ ગયા હતા. આ અત્યંત ગંભીર બાબત પ્રકાશમાં આવતા જ જિલ્લા પ્રાથમિક શિક્ષણાધિકારીએ તાત્કાલિક તપાસના આદેશ આપી ભેસાણ તાલુકા શિક્ષણ અધિકારીના વડપણ હેઠળ એક વિશેષ તપાસ સમિતિની રચના કરી છે. સમિતિને વિદ્યાર્થીઓનો પ્રોગ્રેસ રિપોર્ટ રજૂ કરવા જણાવાયું છે અને આ રિપોર્ટ આવ્યા બાદ શાળા અને જવાબદાર શિક્ષકો સામે કડક કાયદેસરની કાર્યવાહી કરવામાં આવશે.