VIDEO: વડોદરામાં CM ભૂપેન્દ્ર પટેલનો ચૂંટણી શંખનાદ! ભાજપ કાર્યાલયે યોજી હાઈ-લેવલ બેઠક, શેરખી અને મંજુસરમાં જાહેરસભા
છેલ્લું અપડેટ : 20 Apr 2026
VIDEO: ગુજરાતમાં સ્થાનિક સ્વરાજ્યની ચૂંટણીના પડઘમ વાગી ચૂકયા છે. ત્યારે રાજકીય ગતિવિધિઓ તેજ બની છે. આ કડીમાં આજે રાજ્યના મુખ્યમંત્રી ભૂપેન્દ્ર પટેલ વડોદરા જિલ્લાના પ્રવાસે આવી પહોંચ્યા છે. મુખ્યમંત્રીના આગમન સાથે જ વડોદરા ભાજપના કાર્યકરોમાં ભારે ઉત્સાહ જોવા મળી રહ્યો છે. વડોદરા જિલ્લા ભાજપ કાર્યાલય ખાતે મુખ્યમંત્રીએ એક ઉચ્ચસ્તરીય બેઠક યોજીને ચૂંટણીની તૈયારીઓની સમીક્ષા કરી હતી.
રણનીતિ અને ઉચ્ચસ્તરીય બેઠક
ભાજપ કાર્યાલય ખાતે યોજાયેલી આ બેઠકમાં વડોદરા જિલ્લાના તમામ ધારાસભ્યો, શહેર અને જિલ્લા ભાજપ પ્રમુખ તેમજ સંગઠનના પાયાના હોદ્દેદારો ઉપસ્થિત રહ્યા હતા. આ બેઠકમાં આગામી ચૂંટણી જીતવા માટેની ખાસ રણનીતિ અંગે ગહન ચર્ચા કરવામાં આવી હતી. નોંધનીય છે કે, શિસ્તબદ્ધ આયોજનના ભાગરૂપે આ બેઠકમાં માત્ર અપેક્ષિત અને આમંત્રિત હોદ્દેદારોને જ પ્રવેશ આપવામાં આવ્યો હતો. મુખ્યમંત્રીએ છેવાડાના માનવી સુધી સરકારની યોજનાઓ પહોંચાડવા અને પેજ સમિતિને મજબૂત કરવા પર ભાર મૂક્યો હતો.
ઝંઝાવાતી ચૂંટણી પ્રચાર અને જનસભાઓ
બેઠક બાદ મુખ્યમંત્રી વડોદરા જિલ્લાના વિવિધ વિસ્તારોમાં ભાજપના ઉમેદવારોના સમર્થનમાં ઝંઝાવાતી પ્રચાર કરશે. સાંજના સમયે મુખ્યમંત્રી શેરખી અને મંજુસર ખાતે વિશાળ જાહેર સભાઓને સંબોધશે. આ જનસભાઓ દ્વારા તેઓ ભાજપના ઉમેદવારોને જંગી મતોથી વિજયી બનાવવા માટે જનતાને અપીલ કરશે. મુખ્યમંત્રીના પ્રવાસને પગલે વડોદરા પોલીસ અને વહીવટી તંત્ર દ્વારા લોખંડી બંદોબસ્ત ગોઠવવામાં આવ્યો હતો.
